TANA: తానా న్యూజెర్సీ ఆధ్వర్యంలో 'హైకింగ్-26' విజయవంతం! 200 మందికిపైగా ప్రవాస తెలుగు కుటుంబాలు..

ప్రకృతి ఒడిలో తానా 'హైకింగ్-26'.. ఆరోగ్య సందేశంతో విజయవంతమైన కార్యక్రమం..

చక్కటి ఆరోగ్యం ఒక్క అడుగుతోనే.. తానా న్యూజెర్సీ హైకింగ్-26 విజయవంతం..

న్యూజెర్సీ: ఉత్తర అమెరికా తెలుగు సంఘం (తానా) న్యూజెర్సీ విభాగం ఆధ్వర్యంలో నిర్వహించిన 'హైకింగ్-26' కార్యక్రమం ఉత్సాహభరిత వాతావరణంలో విజయవంతంగా సాగింది. "చక్కటి ఆరోగ్యం ఒక్క అడుగుతోనే ప్రారంభం" (Better Tomorrow Begins with a Step) అనే సందేశంతో జూలై 11న హిల్స్బరో టౌన్షిప్లోని సౌర్లాండ్ మౌంటెన్ హైకింగ్ ట్రయిల్ వద్ద నిర్వహించిన ఈ కార్యక్రమంలో 200 మందికిపైగా ప్రవాస తెలుగు కుటుంబాలు పాల్గొని ప్రకృతి ఒడిలో ఆరోగ్యకరమైన ఉదయాన్ని ఆస్వాదించాయి.

చిన్నారుల నుంచి పెద్దల వరకు కుటుంబ సమేతంగా హాజరైన సభ్యులు పచ్చని ప్రకృతి మధ్య నడుస్తూ ఆరోగ్యం, ఆనందం, ఆత్మీయతను ఒకేసారి అనుభవించారు. కార్యక్రమం ప్రారంభానికి ముందు నిర్వాహకులు హైకింగ్ మార్గం, భద్రతా సూచనలు, వేసవి కాలంలో తీసుకోవాల్సిన జాగ్రత్తలను వివరించారు. అనంతరం అందరూ కలిసి గ్రూప్ ఫొటో దిగిన తర్వాత ట్రయిల్పై నడక ప్రారంభించారు.

దట్టమైన చెట్లు, సహజసిద్ధమైన రాతి నిర్మాణాలు, పక్షుల కిలకిలారావాలతో ప్రసిద్ధి చెందిన సౌర్లాండ్ మౌంటెన్ ప్రిజర్వ్ పాల్గొన్న ప్రతి ఒక్కరికి ప్రత్యేక అనుభూతిని కలిగించింది. ప్రకృతి అందాలను ఆస్వాదిస్తూ కుటుంబ సభ్యులతో కలిసి నడవడం, కొత్త స్నేహాలు ఏర్పరుచుకోవడం, అందమైన దృశ్యాలను కెమెరాల్లో బంధించడం కార్యక్రమానికి ప్రత్యేక ఆకర్షణగా నిలిచాయి. తొలిసారి హైకింగ్లో పాల్గొన్నవారు కూడా అనుభవజ్ఞులైన వలంటీర్ల సహకారంతో విజయవంతంగా ట్రయిల్ను పూర్తి చేశారు.

ముందస్తు ప్రణాళికతో పటిష్ట ఏర్పాట్లు
ఈ కార్యక్రమం విజయవంతం కావడానికి తానా న్యూజెర్సీ బృందం పలు వారాల ముందుగానే ప్రణాళిక రూపొందించింది. అంచనాలకు మించి 200 మందికిపైగా సభ్యులు పాల్గొనడంతో పార్కింగ్, ట్రయిల్ మార్గదర్శనం, వాటర్ స్టేషన్లు, వలంటీర్ల సమన్వయం వంటి అంశాలపై ప్రత్యేక దృష్టి సారించారు.

పాల్గొనేవారికి ముందుగా వార్మప్ వ్యాయామాలు నిర్వహించగా, ట్రయిల్ పొడవునా తాగునీటి కేంద్రాలు, ప్రథమ చికిత్సా సదుపాయాలు ఏర్పాటు చేశారు. అనుభవజ్ఞులైన వలంటీర్లు బృందాలుగా పనిచేస్తూ ఎవరూ వెనుకబడిపోకుండా జాగ్రత్తలు తీసుకున్నారు.

యువత సేవలు ప్రశంసనీయం
"మన యువత – మన వారసత్వం" అనే తానా భావనకు అనుగుణంగా యువ వలంటీర్లు ఈ కార్యక్రమంలో కీలక పాత్ర పోషించారు. ట్రయిల్ మార్గనిర్దేశం, వాటర్ స్టేషన్ల నిర్వహణ, పాల్గొనేవారికి సహాయం వంటి బాధ్యతలను సమర్థంగా నిర్వర్తించి అందరి ప్రశంసలు అందుకున్నారు.

నేటి వేగవంతమైన జీవనశైలిలో మొబైల్ ఫోన్లు, డిజిటల్ స్క్రీన్లు, ఒత్తిడికి దూరంగా ప్రకృతి మధ్య కొంత సమయం గడపడం శారీరక ఆరోగ్యంతో పాటు మానసిక ప్రశాంతతకు కూడా ఎంతో ఉపయోగకరమని పలువురు పాల్గొన్నవారు అభిప్రాయపడ్డారు. ఇలాంటి కార్యక్రమాలు తెలుగు కుటుంబాల మధ్య స్నేహబంధాలను మరింత బలోపేతం చేస్తాయని పేర్కొన్నారు.

సమన్వయ బృందానికి నిర్వాహకుల కృతజ్ఞతలు 
కార్యక్రమం విజయవంతం కావడానికి సహకరించిన ప్రతి ఒక్కరికీ హైకింగ్ కోఆర్డినేటర్ దశరథ తలపనేని, యూత్ కోఆర్డినేటర్ శ్రీనివాస్ చెరుకూరి ప్రత్యేకంగా కృతజ్ఞతలు తెలిపారు.

ఈ సందర్భంగా తానా ఫౌండేషన్ కోశాధికారి శ్రీనివాస్ ఓరుగంటి, ప్రాంతీయ ప్రతినిధి సుధీర్ నారెపాలెపు, కోశాధికారి రాజా కసుకుర్తి, ఫౌండేషన్ ట్రస్టీ సతీష్ మేకా, శ్యామ్ ప్రసాద్ అంబటిలకు ప్రత్యేక ధన్యవాదాలు తెలిపారు.

అలాగే తానా న్యూజెర్సీ సమన్వయ బృంద సభ్యులు వెంకట్ ఏట్రింతల, భగత్ మారెళ్ల, డా. పద్మ చావా, చంద్ర తమ్మినీడి, సమత కోగంటి, హరిబాబు గంగవరపు, ప్రవీణ్ కల్వకొల్లు, రవి మాచెర్ల, భాను నల్లమోతు, రామకృష్ణ చెరుకూరి, ప్రశాంత్ తుంగం, మధు పరిటాల, శరత్ తాటిపాముల, రవి మోసమ్, రాజేష్ కళ్లెంపూడి, శ్రీనివాస్ కురువిళ్ల, ప్రణతి కురువిళ్ల, త్రివేణి బోడెంపూడి, కోమలి మందలపు కార్యక్రమ నిర్వహణలో కీలక పాత్ర పోషించారు.

యువ వలంటీర్లు ఆకాంక్ష తలపనేని, బవేష్ కళ్లెంపూడి, నిత్యా చెరుకూరి, ఆరాధ్య చెరుకూరి, వంశీచంద్ నారెపాలెపు, వర్షాచంద్ నారెపాలెపు, సాయి పుసులూరి, హాసిని పుసులూరి, నవిత్ బాసన, విధిత బాసన, మేఘ చెరుకూరి, గీతిక మారెళ్ల సేవలు అందించారు.

హైకింగ్ అనంతరం పాల్గొన్న అందరికీ రుచికరమైన అల్పాహారం ఏర్పాటు చేశారు. ఈ ఏర్పాట్లకు సహకరించిన ఎడిసన్ శ్రీ సాయి దత్త పీఠం-శివ విష్ణు ఆలయ ప్రధాన అర్చకులు రఘుశర్మ శంకరమంచి, నాగేంద్రలకు నిర్వాహకులు కృతజ్ఞతలు తెలిపారు.

తానా నాయకత్వం అభినందనలు 
కుటుంబ సమేతంగా ప్రకృతికి దగ్గరగా ఆరోగ్యకరమైన జీవనశైలిని ప్రోత్సహించే ఈ కార్యక్రమాన్ని విజయవంతంగా నిర్వహించిన తానా న్యూజెర్సీ బృందాన్ని తానా అధ్యక్షుడు డా. నరేన్ కొడాలి, కార్యనిర్వాహక ఉపాధ్యక్షుడు శ్రీనివాస్ లావు, తానా ఫౌండేషన్ చైర్మన్ డా. ప్రసాద్ నల్లూరి, తానా బోర్డు చైర్మన్ డా. శ్రీనివాస్ నాగేంద్ర కొడాలి ప్రత్యేకంగా అభినందించారు.

అమెరికాలో తెలుగు సంస్కృతి, కుటుంబ విలువలు, ఆరోగ్యకరమైన జీవనశైలిని ప్రోత్సహించడంలో ఇలాంటి కార్యక్రమాలు కీలక పాత్ర పోషిస్తున్నాయని వారు పేర్కొన్నారు. భవిష్యత్తులో కూడా న్యూజెర్సీ వ్యాప్తంగా మరిన్ని విజ్ఞానదాయక, ఆరోగ్యవంతమైన, కుటుంబ సమేత కార్యక్రమాలను నిర్వహించనున్నట్లు తానా స్థానిక నాయకత్వం వెల్లడించింది.