స్వయంగా న్యూజిలాండ్‌ ప్రధానమంత్రి పార్లమెంటులో దీపావళి వేడుకలు! బిత్తర పోయిన ప్రపంచ దేశాలు!

• వెల్లింగ్టన్‌లోని పార్లమెంట్ హౌస్‌లోనూ దీపావళి వేడుకలు: భారతీయ సమాజంపై ప్రధాని ప్రశంసల జల్లు!

• భారతీయులతో కలిసి అడుగులేసిన స్థానిక కివీలు: భాంగ్రా, క్లాసికల్, బాలీవుడ్ పాటల హోరు!

• విదేశీ గడ్డపై గుబాళించిన దేశీ రుచులు: సమోసాలు, జిలేబీలు, చాట్ కోసం ఎగబడ్డ స్థానికులు!

Newzealand: భారతదేశానికి సుమారు 12,000 కిలోమీటర్ల దూరంలో, పసిఫిక్ మహాసముద్ర తీరాన ఉన్న ప్రశాంత ద్వీప దేశం న్యూజిలాండ్‌లో భారతీయ పండుగల వెలుగులు వెల్లివిరిశాయి. ప్రపంచంలోనే అందమైన ప్రకృతికి, రగ్బీ క్రీడకు పేరుగాంచిన ఈ దేశంలో దీపావళి పండుగ సందర్భంగా భారతీయ వాతావరణం నెలకొంది. ప్రధాన నగరమైన ఆక్లాండ్ వీధులు రంగురంగుల విద్యుత్ దీపాలు, వేలాది మంది భారతీయ, స్థానిక కివీ పౌరుల రాకతో జనసంద్రంగా మారాయి. భారతీయ సంప్రదాయ దుస్తులైన కుర్తాలు, పైజామాలు, చీరలు ధరించిన మహిళలు, పురుషులు పండుగ శోభను రెట్టింపు చేశారు.

ప్రధాని క్రిస్టోఫర్ లక్సన్ ప్రత్యేక ఆకర్షణ

ఈ భారీ ఉత్సవానికి న్యూజిలాండ్ ప్రధానమంత్రి క్రిస్టోఫర్ లక్సన్ ముఖ్య అతిథిగా విచ్చేశారు. కేవలం లాంఛనప్రాయంగా వచ్చి వెళ్లడమే కాకుండా, హిందూ సంప్రదాయ పద్ధతిలో అత్యంత భక్తిశ్రద్ధలతో, అంకితభావంతో మట్టి ప్రమిదల్లో జ్యోతి ప్రజ్వలన చేసి పండుగను ప్రారంభించారు. గతంలోనూ భారతీయ వేడుకల్లో స్వయంగా జిలేబీలు వేయడం, బీఏపీఎస్ (BAPS) ఆలయాలను సందర్శించడం వంటి కార్యక్రమాలతో భారతీయులకు అత్యంత సన్నిహితంగా మారిన ప్రధాని లక్సన్.. వేదికపై స్థానిక ప్రజలతో కలిసిపోయి సెల్ఫీలు దిగుతూ సందడి చేశారు.

పార్లమెంట్ హౌస్ వేదికగా ప్రత్యేక వేడుకలు

ఆక్లాండ్ నగరంలోనే కాకుండా న్యూజిలాండ్ రాజధాని వెల్లింగ్టన్‌లోని పార్లమెంట్ హౌస్ బ్యాంకెట్ హాల్‌లో సైతం ప్రభుత్వం అధికారికంగా దీపావళి వేడుకలను నిర్వహించింది. దేశానికి చట్టాలు చేసే అత్యున్నత పార్లమెంట్ ప్రాంగణంలో దీపాలు వెలిగించి మన సంస్కృతిని సమున్నతంగా గౌరవించారు. ఈ కార్యక్రమంలో ప్రధాని లక్సన్, పలువురు మంత్రులు, భారత హైకమిషనర్ పాల్గొన్నారు. దీపావళి కేవలం భారతీయులకే పరిమితం కాదని, చీకటిపై వెలుగు సాధించిన విజయానికి ప్రతీకగా యావత్ ప్రపంచం జరుపుకోవాల్సిన పండుగని అక్కడి మంత్రులు కొనియాడారు.

దేశీ వంటకాల స్టాళ్లు & డ్యాన్స్ పెర్ఫార్మెన్స్‌లు

ఈ ఉత్సవాల్లో బ్యాంక్ ఆఫ్ న్యూజిలాండ్ (BNZ) ప్రధాన స్పాన్సర్‌గా వ్యవహరించింది. వేదికలపై భారతీయ శాస్త్రీయ నృత్యాలు, పంజాబీ భాంగ్రా స్టెప్పులు, బాలీవుడ్ మ్యూజిక్ హోరుతో పండుగ ప్రాంగణం దద్దరిల్లింది. భారత సంతతి ప్రజలతో పాటు స్థానిక న్యూజిలాండ్ పౌరులు సైతం చిందులేస్తూ ఉత్సాహంగా పాల్గొన్నారు. మరోవైపు వేడివేడి సమోసాలు, జిలేబీలు, చాట్, బిర్యానీ సువాసనలు ఆహార ప్రియులను కట్టిపడేశాయి. భారతీయ రుచులను ఆస్వాదించేందుకు స్థానిక కివీలు పెద్ద ఎత్తున క్యూ లైన్లలో నిలబడి కొనుగోలు చేయడం ప్రత్యేక ఆకర్షణగా నిలిచింది.

న్యూజిలాండ్‌లో భారతీయుల బలమైన ప్రభావం

న్యూజిలాండ్‌లో భారతీయ సమాజం ఎంతటి కీలక శక్తిగా మారిందో తాజా జనాభా లెక్కలు రుజువు చేస్తున్నాయి. మొత్తం 53.40 లక్షల జనాభా కలిగిన న్యూజిలాండ్‌లో సుమారు 3 లక్షల మంది భారతీయులు ఉన్నారు, ఇది దేశ జనాభాలో దాదాపు 6 శాతానికి సమానం. యూరోపియన్లు, స్థానిక మావోరీల తర్వాత చైనీయులను వెనక్కి నెట్టి భారతీయులే 3వ అతిపెద్ద సమాజంగా నిలిచారు. ఒక్క ఆక్లాండ్ నగరంలోనే 1.76 లక్షల మంది భారతీయులు నివసిస్తున్నారు. అంతేకాకుండా న్యూజిలాండ్‌లో అత్యధికంగా మాట్లాడే భాషల్లో హిందీ 4వ స్థానంలో, పంజాబీ 9వ స్థానంలో ఉండటం గమనార్హం. దేశ ఆర్థిక, సామాజిక ఎదుగుదలలో భారత సమాజం పోషిస్తున్న పాత్రను ప్రధాని లక్సన్ ప్రత్యేకంగా ప్రశంసించారు.