USA: బే ఏరియాలో దేవిశ్రీ ప్రసాద్ సంగీత సందడి.. ‘బ్యాక్ ఇన్ ది బే’ లైవ్ కాన్సర్ట్‌కు భారీ ఏర్పాట్లు!

డీఎస్పీ కోసం ఎదురుచూస్తున్న బే ఏరియా తెలుగు అభిమానులు..

దేవిశ్రీ ప్రసాద్ లైవ్ కాన్సర్ట్‌కు సిద్ధమైన శాన్ హోసే.. సంగీత ప్రియుల్లో ఉత్సాహం..

శాన్ హోసే: ప్రముఖ సంగీత దర్శకుడు, రాక్‌స్టార్ దేవిశ్రీ ప్రసాద్ (DSP) తన సంగీతంతో బే ఏరియా తెలుగు ప్రేక్షకులను అలరించేందుకు సిద్ధమయ్యారు. ఇటీవల ఫిలడెల్ఫియాలో జరిగిన అమెరికన్ తెలుగు అసోసియేషన్ (MATA) మహాసభల్లో డీఎస్పీ సంగీత విభావరి ప్రేక్షకులను ఉర్రూతలూగించిన విషయం తెలిసిందే. అదే ఉత్సాహంతో ఇప్పుడు బే ఏరియాలో మరోసారి తన సంగీత మాయాజాలాన్ని పంచుకోనున్నారు.

బే ఏరియా విమానాశ్రయానికి చేరుకున్న దేవిశ్రీ ప్రసాద్‌కు తెలుగు సంఘాల నాయకులు ఘన స్వాగతం పలికారు. బే ఏరియా తెలుగు అసోసియేషన్ (BATA) నాయకులు వీరు ఉప్పల, ప్రసాద్ మంగిన, కరుణ్ వెలిగేటి తదితరులు ఆయనను ఆహ్వానించారు.

BATA, బే ఏరియా ఎంటర్‌టైన్‌మెంట్స్, నాగరాజ్ అన్నయ్య సంయుక్త ఆధ్వర్యంలో అపెక్స్ కన్సల్టింగ్ సర్వీసెస్ సహకారంతో ఈ భారీ లైవ్ మ్యూజిక్ కాన్సర్ట్ నిర్వహించనున్నారు. జూన్ 26, 2026 శుక్రవారం శాన్ హోసే సివిక్ వేదికగా జరగనున్న ఈ కార్యక్రమానికి ‘బ్యాక్ ఇన్ ది బే’ అనే పేరు పెట్టారు.

డీఎస్పీ తన ప్రత్యేకమైన పాటలు, ఎనర్జిటిక్ పెర్ఫార్మెన్స్‌తో ప్రేక్షకులను మంత్రముగ్ధులను చేయనున్నారు. ఈ సంగీత వేడుకలో ఆయనతో పాటు టాలీవుడ్‌కు చెందిన ప్రముఖ గాయకులు కూడా పాల్గొంటున్నారు. సాగర్, సమీరా భరద్వాజ్, రీటా, కార్తీక్ తమ గాత్రంతో సంగీత ప్రియులను అలరించనున్నారు.

దేవిశ్రీ ప్రసాద్ లైవ్ కాన్సర్ట్ కోసం బే ఏరియాలోని తెలుగు సంగీత అభిమానులు ఎంతో ఆసక్తిగా ఎదురుచూస్తున్నారు. కుటుంబ సమేతంగా సంగీతాన్ని ఆస్వాదించేలా ఈ కార్యక్రమాన్ని ప్రత్యేకంగా రూపొందించారు.

కార్యక్రమానికి సంబంధించిన టికెట్లను www.bata.org వెబ్‌సైట్ ద్వారా పొందవచ్చు. పోస్టర్‌లోని QR కోడ్‌ను స్కాన్ చేసి కూడా టికెట్లు కొనుగోలు చేయవచ్చు. మరిన్ని వివరాల కోసం 510-421-3535 లేదా 650-776-1203 నంబర్లను సంప్రదించాలని నిర్వాహకులు తెలిపారు. తెలుగు సంగీతం, సంస్కృతికి ప్రతీకగా నిలిచే ఈ కార్యక్రమం బే ఏరియాలో మరో మధురమైన సంగీత అనుభూతిని అందించనుంది.