USA:  ఫ్లోరిడా టాంపాలో నీతా అంబానీకి హ్యూమానిటేరియన్ అవార్డు – ‘కీ టు ది సిటీ’తో ఘన సత్కారం!

నీతా అంబానీకి ‘కీ టు ది సిటీ ఆఫ్ టాంపా’ – అమెరికాలో ఘన గౌరవం..

సామాజిక సేవలకు గుర్తింపు – నీతా అంబానీకి అంతర్జాతీయ అవార్డు..

రిలయన్స్ ఫౌండేషన్ వ్యవస్థాపకురాలు, ధీరూభాయ్ అంబానీ ఇంటర్నేషనల్ స్కూల్ ఛైర్పర్సన్ నీతా అంబానీకి అంతర్జాతీయ స్థాయిలో మరో ప్రతిష్టాత్మక గౌరవం లభించింది. అమెరికాలోని ఫ్లోరిడా రాష్ట్రం టాంపా నగరంలో జరిగిన ఓ కార్యక్రమంలో ఆమెకు అమెరికన్ అసోసియేషన్ ఆఫ్ ఫిజిషియన్స్ ఆఫ్ ఇండియన్ ఆరిజిన్ (AAPI) తరఫున హ్యూమానిటేరియన్ అవార్డు ప్రదానం చేశారు.

ఈ అవార్డు ప్రధానంగా ఆరోగ్యం, విద్య, క్రీడలు, సంస్కృతి, అలాగే సమాజ అభివృద్ధి వంటి రంగాల్లో అసాధారణ సేవలు అందించిన వ్యక్తులను గౌరవించడానికి అందిస్తారు. నీతా అంబానీ ఈ రంగాల్లో చేసిన విస్తృత సేవలను గుర్తించి ఈ పురస్కారాన్ని ఇచ్చినట్లు నిర్వాహకులు తెలిపారు. ముఖ్యంగా ఆమె సామాజిక సేవా కార్యక్రమాలు, దాతృత్వ కార్యక్రమాలపై చూపిన నిబద్ధతను ఈ సందర్భంగా ప్రత్యేకంగా ప్రశంసించారు.

అదే కార్యక్రమంలో మరో ముఖ్య ఘట్టం చోటు చేసుకుంది. టాంపా నగర మేయర్ జేన్ కాస్టర్, నీతా అంబానీకి “కీ టు ది సిటీ ఆఫ్ టాంపా”ను అందజేశారు. అమెరికాలో ఇది అత్యంత ప్రతిష్టాత్మకమైన పౌర గౌరవాలలో ఒకటిగా భావిస్తారు.

ఈ గుర్తింపు సాధారణంగా ఒక వ్యక్తి సేవలను, వ్యక్తిత్వాన్ని, మానవతా దృక్పథాన్ని గౌరవిస్తూ “ఈ నగరం మీకు హృదయపూర్వక స్వాగతం పలుకుతోంది” అనే అర్థంతో అందజేస్తారు. నీతా అంబానీ సేవా భావాన్ని, సమాజ అభివృద్ధికి ఆమె చేస్తున్న కృషిని గుర్తిస్తూ ఈ ప్రత్యేక సత్కారం ఇచ్చినట్లు అధికారులు తెలిపారు. ఈ రెండు గౌరవాలతో నీతా అంబానీ అంతర్జాతీయ వేదికపై భారత ప్రతిష్టను మరింత పెంచారని కార్యక్రమ నిర్వాహకులు పేర్కొన్నారు.