Independence Day Celebrations: వాషింగ్టన్‌లో భారత్ స్వాతంత్ర్య వేడుకలు... ప్రవాసాంధ్రుల ఘన నివాళి!

• దేశభక్తి మాటల్లో కాదు.. ఆచరణలో ఉండాలి: ప్రవాసాంధ్రుల సభలో రవి అడుసుమిల్లి పిలుపు

• వాషింగ్టన్‌లో రెపరెపలాడిన త్రివర్ణ పతాకం: రాయబారి వినయ్ మోహన్ క్వాత్రాకు ప్రవాస ప్రముఖుల శుభాకాంక్షలు

• మహాత్మా గాంధీ, శాస్త్రిజీలకు ప్రవాసుల ఘన నివాళి: ఉత్సాహంగా సాగిన స్వాతంత్ర్య దినోత్సవం

Washington DC: అమెరికా రాజధాని వాషింగ్టన్ డీసీలో బృహత్తర వాషింగ్టన్ తెలుగు సాంస్కృతిక సంఘం (జీడబ్ల్యూటీసీఎస్ - GWTCS) ఆధ్వర్యంలో భారత 80వ స్వాతంత్ర్య దినోత్సవ వేడుకలను అత్యంత వైభవంగా, దేశభక్తి భావనలు ఉట్టిపడేలా నిర్వహించారు. జీడబ్ల్యూటీసీఎస్ అధ్యక్షుడు రవి అడుసుమిల్లి, ప్రధాన కార్యదర్శి భానుప్రకాష్ మాగులూరి నేతృత్వంలో ఏర్పాటు చేసిన ఈ వేడుకలకు ప్రవాస భారతీయులు, స్థానిక తెలుగు కుటుంబాలు భారీ సంఖ్యలో తరలివచ్చాయి. పండుగ వాతావరణంలో జరిగిన ఈ కార్యక్రమంలో మువ్వన్నెల జాతీయ పతాకాన్ని గగనవీధిలో ఆవిష్కరించి, అందరూ గౌరవ వందనం సమర్పించారు. అనంతరం జాతీయ స్వాతంత్ర్య సమరయోధుల త్యాగాలను స్మరించుకుంటూ మహాత్మా గాంధీ, లాల్ బహదూర్ శాస్త్రి చిత్రపటాలకు పుష్పాంజలి ఘటించి ఘనంగా నివాళులర్పించారు. ఈ సంబరాల సందర్భంగా ప్రత్యేకంగా కేక్ కట్ చేసి, హాజరైన ప్రవాసులందరూ ఒకరికొకరు స్వాతంత్ర్య దినోత్సవ శుభాకాంక్షలు మరియు మిఠాయిలు పంచుకుంటూ ఆనందోత్సాహాలతో గడిపారు.

ఈ వేడుకలను ఉద్దేశించి సంఘం అధ్యక్షుడు రవి అడుసుమిల్లి ప్రసంగిస్తూ, భారతదేశ స్వాతంత్ర్య సమరం ప్రపంచ చరిత్రలోనే అత్యంత విశిష్టమైనదని పేర్కొన్నారు. ప్రపంచానికి సరికొత్తగా అహింసా మార్గాన్ని ప్రబోధించిన జాతిపిత మహాత్మా గాంధీతో పాటు దేశ విముక్తి కోసం తమ ప్రాణాలను తృణప్రాయంగా అర్పించిన స్వాతంత్ర్య సమరయోధుల జీవితాలు మనందరికీ నిత్య ఆదర్శప్రాయమని కొనియాడారు. పరాయి పాలన నుంచి విముక్తి కోసం తమ సర్వస్వాన్ని ధారపోసిన సమరయోధులు, అహింసావాదుల మహోన్నత త్యాగాల పునాదుల పైనే నేటి స్వేచ్ఛా స్వతంత్ర భారత దేశం సగర్వంగా నిలబడిందని ఆయన స్పష్టం చేశారు. ఆ మహనీయుల ఆశయాలను ముందుకు తీసుకెళ్లడం ప్రతి భారతీయుడి బాధ్యత అని వివరించారు.

దేశభక్తి ప్రాధాన్యతను వివరిస్తూ మహాకవి గురజాడ అప్పారావు చెప్పిన "దేశమంటే మట్టి కాదోయ్.. దేశమంటే మనుషులోయ్" అనే సూక్తిని రవి అడుసుమిల్లి గుర్తు చేశారు. నిజమైన దేశభక్తి అనేది కేవలం మాటలకే పరిమితం కాకుండా మనం చేసే ప్రతి పనిలోనూ, ఆచరణలోనూ స్పష్టంగా ప్రతిబింబించాలని ఆయన పిలుపునిచ్చారు. ప్రపంచంలో ఏ మూలన నివసిస్తున్నప్పటికీ ప్రవాస భారతీయులు తమ మాతృభూమి, మాతృభాష అయిన తెలుగు మరియు సనాతన భారతీయ సంస్కృతీ సంప్రదాయాల పట్ల నిరంతరం బాధ్యతాయుతంగా వ్యవహరించాలని కోరారు. సమాజ హితం కోసం పాటుపడుతూ మన మూలాలను కాపాడుకోవడమే మనం దేశానికి ఇచ్చే నిజమైన నివాళి అని ఉద్ఘాటించారు.

యువత ప్రాధాన్యతను ప్రముఖంగా ప్రస్తావిస్తూ, యువతే నవ భారత నిర్మాణానికి అసలైన బలమని, దేశ భవిష్యత్తు వారి చేతుల్లోనే ఆధారపడి ఉందని రవి అడుసుమిల్లి పేర్కొన్నారు. విదేశాల్లో పెరుగుతున్న భావితరాల్లో జాతీయ సమైక్యత, సహోదరభావం, పరస్పర గౌరవాన్ని పెంపొందించడం పెద్దల కర్తవ్యమని సూచించారు. ఆధునిక విజ్ఞానంతో ముందుకు సాగుతూనే దేశ ఔన్నత్యాన్ని కాపాడే పౌరులుగా ఎదగాలని ఆకాంక్షించారు.

వేడుకల అనంతరం ఒక ప్రత్యేక బృందం వాషింగ్టన్ డీసీలోని భారత రాయబార కార్యాలయాన్ని (Indian Embassy) సందర్శించింది. అక్కడ భారత రాయబారి వినయ్ మోహన్ క్వాత్రాను మర్యాదపూర్వకంగా కలిసి, ప్రవాసాంధ్రుల తరఫున 80వ స్వాతంత్ర్య దినోత్సవ శుభాకాంక్షలు అందజేశారు. ఈ బృందంలో ఉప్పుటూరి రామ్ చౌదరి, భానుప్రకాష్ మాగులూరి సహా పలువురు ప్రవాస పెద్దలు పాల్గొని దౌత్యవేత్తతో ముచ్చటించారు.

ఈ స్వాతంత్ర్య దినోత్సవ సంబరాల్లో ప్రవాస ప్రముఖులు సీతారామారావు ఎందూరు, చంద్రనాథ్ నంబూరు, వల్లభనేని వీరభద్రరావు, కందుల అభిరామ్, చింతా రాంబాబు, శ్రీకాకుళం రామ సత్యనారాయణ, అన్నం పూర్ణచంద్రరావు, రాధాకృష్ణ మైనేని, బత్తా భిక్షపతి, సూరేపల్లి బ్రహ్మం, సి.హెచ్. సత్యనారాయణ, చిట్టెల సుబ్బారావు, జంపాల కృష్ణమోహన్, డాక్టర్ అల్లం లింగం, యోగానంద్ వంకిన, గంగారావు పొనగోటి, భాస్కరరావు, బీటీ, సత్తయ్య మారిశెట్టి, చెరుకూరి ఇందుశేఖర్, పి. నర్సింగరావు, యాదగిరి గుండ తదితరులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.