UAE: యుఏఈ ప్రవాసులకు బిగ్ రిలీఫ్... 30 నిమిషాల్లోనే పాస్పోర్ట్...!!
UAE: యుఏఈలోని 43 లక్షల మంది భారతీయుల కోసం 16 కాన్సులర్ కేంద్రాల ద్వారా వేగవంతమైన పాస్పోర్ట్, కాన్సులర్ సేవలను భారత కాన్సులేట్ అందుబాటులోకి తెచ్చింది. సాధారణ సేవల్లో 7-15 రోజుల్లో, తత్కాల్ విధానంలో కేవలం 3 రోజుల్లోనే పాస్పోర్ట్ ప్రాసెసింగ్ పూర్తి కానుంది.
బ్యాక్లాగ్ సమస్యకు చెక్ పెట్టిన ఇండియన్ కాన్సులేట్.. ఈ నెల 15 నాటికి క్లియరెన్స్ గ్యారెంటీ..!
నవజాత శిశువులు, సీనియర్ సిటిజన్లకు డైరెక్ట్ ఎంట్రీ.. కాన్సులేట్ తెచ్చిన సరికొత్త వెసులుబాటు..!
యుఏఈ వ్యాప్తంగా 16 కొత్త సేవా కేంద్రాలు లభ్యం.. బర్ దుబాయ్ యుడబ్ల్యూ మాల్లో బృహత్తర కేంద్రం..!
UAE: యూఏఈలోని మొత్తం ఏడు ఎమిరేట్లలో భారతీయ పౌరుల సౌకర్యార్థం 16 ఇండియన్ కాన్సులర్ అప్లికేషన్ సెంటర్లను (ICAC) ఏర్పాటు చేశారు. అబుదాబిలో 6, దుబాయ్లో 2, షార్జాలో 2, అలాగే అజ్మాన్, ఫుజైరా, ఉమ్ అల్ కువైన్, ఖోర్ఫక్కన్, కల్బా మరియు రాస్ అల్ ఖైమాలలో ఒక్కో కేంద్రం చొప్పున సేవలు అందిస్తున్నాయి. వీటిలో బర్ దుబాయ్లోని 'యుడబ్ల్యూ మాల్' (UW Mall) లో 12,000 చదరపు అడుగుల భారీ విస్తీర్ణంలో 70కి పైగా కౌంటర్లతో అతిపెద్ద ప్రధాన కేంద్రాన్ని ఏర్పాటు చేశారు. ఇక్కడ ప్రతిరోజూ వేలాది మందికి సేవలు అందించే సామర్థ్యం ఉందని, ప్రతి దరఖాస్తుదారునికి కేవలం 30 నిమిషాల్లోపే ప్రక్రియ పూర్తయ్యేలా చర్యలు తీసుకుంటున్నామని నిర్వాహకులు తెలిపారు.
అత్యవసర పరిస్థితుల్లో ప్రవాసులకు ఉపశమనం కలిగించేలా ముందస్తు అపాయింట్మెంట్ లేకుండా నేరుగా వెళ్లే 'వాక్-ఇన్' (Walk-in) వెసులుబాటును కల్పించారు. తత్కాల్ దరఖాస్తుదారులు, తొలి పాస్పోర్ట్ కోసం దరఖాస్తు చేసే నవజాత శిశువులు, 60 ఏళ్లు దాటిన సీనియర్ సిటిజన్లు, మరియు పాస్పోర్ట్ పోగొట్టుకుని 'ఎమర్జెన్సీ సర్టిఫికెట్' అవసరమైన వారు అత్యవసర విమాన టికెట్ లేదా వైద్య/అధికారిక పత్రాలను సమర్పించి నేరుగా వాక్-ఇన్ సేవలను పొందవచ్చు.
కాన్సులేట్ నిబంధనల ప్రకారం, పేరు, పుట్టిన తేదీ, చిరునామా వంటి వ్యక్తిగత వివరాల్లో ఎలాంటి మార్పులు లేకుండా కేవలం పాస్పోర్ట్ పునరుద్ధరణ (రెన్యువల్) చేసుకునేవారు మాత్రమే 'తత్కాల్' సేవలకు అర్హులు. పాస్పోర్ట్ పోయినా, తీవ్రంగా దెబ్బతిన్నా, వివరాల మార్పులు ఉన్నా లేదా క్రిమినల్ కేసులు ఉన్నవారికి తత్కాల్ వర్తించదు. 2026 జూలై 1 నుంచి అమల్లోకి వచ్చిన సవరించిన రుసుముల ప్రకారం 36 పేజీల సాధారణ పాస్పోర్ట్ రెన్యువల్ రుసుము 450 దిర్హామ్లు (Dh 450) కాగా, తత్కాల్ రెన్యువల్కు 900 దిర్హామ్లుగా (Dh 900) నిర్ణయించారు. దీనికి అదనంగా ప్రాసెసింగ్, బయోమెట్రిక్, కొరియర్ ఛార్జీలతో కలిపి 19 దిర్హామ్ల (Dh 19) సర్వీస్ ఛార్జీ వర్తిస్తుంది.
అపాయింట్మెంట్లు సులువుగా లభించేందుకు ప్రతిరోజూ యూఏఈ కాలమానం ప్రకారం ఉదయం 9 గంటలకు మరియు రాత్రి 9 గంటలకు పోర్టల్లో కొత్త స్లాట్లను విడుదల చేస్తున్నారు. ఈ సమయాల్లో లాగిన్ కావడం వల్ల వేగంగా అపాయింట్మెంట్ పొందే అవకాశం ఉంటుంది. సాధారణ సేవల్లో 7 నుండి 15 పనిదినాల్లో, తత్కాల్ విధానంలో కేవలం 3 పనిదినాల్లోనే పాస్పోర్ట్ జారీ అవుతుందని భారత కాన్సులేట్ స్పష్టం చేసింది.
Tags
Be the first to react
