H1B Visa: హెచ్-1బి వీసా అలర్ట్.. కేవలం ఈ చిన్న కారణంతో కూడా మీ దరఖాస్తుకు 'నో' చెప్పవచ్చు! ఫీజు వెనక్కి ఇవ్వరు, దరఖాస్తు కూడా రద్దు..

• హెచ్-1బి, గ్రీన్ కార్డు దరఖాస్తులపై అమెరికా కొత్త నిబంధనలు..
   
• NRI: జూలై 10 నుంచి అమల్లోకి రానున్న తాత్కాలిక తుది నియమం..

H1B Visa: అమెరికాలో స్థిరపడాలని లేదా ఉద్యోగం చేయాలని ఆశపడే అంతర్జాతీయ నిపుణులకు, ముఖ్యంగా భారతీయులకు అక్కడి వలసల విభాగం ఒక అత్యంత కీలకమైన హెచ్చరిక జారీ చేసింది. యూఎస్‌లో ప్రతిష్టాత్మక హెచ్-1బి (H-1B) వీసా మరియు పీఆర్ లభించే గ్రీన్ కార్డు కోసం దరఖాస్తు చేసుకునే అభ్యర్థులు తమ ఇమ్మిగ్రేషన్ ఫారమ్‌లపై సంతకాలు చేసేటప్పుడు నిబంధనలు పాటించకపోతే తీవ్ర నష్టాన్ని చవిచూడాల్సి వస్తుందని స్పష్టం చేసింది. దరఖాస్తు పత్రాలపై సరైన శైలిలో సంతకం లేకపోతే, సదరు దరఖాస్తును ఏమాత్రం మొహమాటం లేకుండా తిరస్కరిస్తామని, అంతకంటే ముఖ్యంగా ఫైలింగ్ ప్రక్రియ కోసం అప్పటికే చెల్లించిన వేలాది డాలర్ల ఫీజును కూడా ఎట్టి పరిస్థితుల్లోనూ తిరిగి ఇవ్వబోమని (నో రిఫండ్) తేల్చి చెప్పింది. ఈ మేరకు యునైటెడ్ స్టేట్స్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) అధికారికంగా కొత్త కఠిన నిబంధనలను ప్రకటించింది. అమెరికా హోమ్‌ల్యాండ్ సెక్యూరిటీ డిపార్ట్‌మెంట్ (DHS) నివేదికల ప్రకారం.. ఇటీవల కాలంలో నకిలీ మరియు డిజిటల్‌గా దుర్వినియోగం చేసిన సంతకాలతో దాఖలవుతున్న వలస దరఖాస్తుల సంఖ్య విపరీతంగా పెరుగుతున్న నేపథ్యంలోనే ఈ కఠినమైన నిర్ణయం తీసుకోవాల్సి వచ్చింది. ఈ తాత్కాలిక అంతిమ నియమం (ఇంటెరిమ్ ఫైనల్ రూల్) రాబోయే జూలై 10వ తేదీ నుంచి అధికారికంగా అమలు కానుంది. ఈ నూతన విధానం అమల్లోకి వచ్చిన తర్వాత, ఒకసారి దరఖాస్తును ప్రాథమికంగా స్వీకరించినప్పటికీ, తదుపరి తుది పరిశీలన దశలో సంతకం చెల్లనిదని తేలితే దానిని పూర్తిగా రద్దు చేసే సర్వాధికారాలు యూఎస్ సీఐఎస్ పరిధిలోనే ఉంటాయి.

ఈ విధంగా కేవలం చిన్న సంతకం పొరపాటు కారణంగా దరఖాస్తు తిరస్కరణకు గురైతే, అభ్యర్థులు ఆర్థికంగా భారీగా నష్టపోవాల్సి వస్తుంది. ఎందుకంటే సంతకం చెల్లని కారణంగా అప్లికేషన్‌ను పక్కన పెట్టినప్పటికీ, ఆ కేసును తాము పూర్తిగా పరిశీలించినట్టుగానే (ప్రాసెస్డ్) పరిగణిస్తామని వలసల విభాగం స్పష్టం చేసింది. ఇది దరఖాస్తుదారుల ప్రస్తుత ఇమ్మిగ్రేషన్ స్టేటస్, అమెరికాలో ఉద్యోగం చేసుకునేందుకు లభించే వర్క్ పర్మిట్ (EAD), మరియు గ్రీన్ కార్డు రేసులో ఎంతో కీలకమైన ప్రయారిటీ డేట్స్ (Priority Dates) వంటి వాటిపై తీవ్రమైన ప్రతికూల ప్రభావాన్ని చూపుతుంది. ఈ నేపథ్యంలో ఎలాంటి సంతకాలను చెల్లనివిగా పరిగణిస్తారనే దానిపై కూడా అధికారులు స్పష్టత ఇచ్చారు. సాధారణంగా చేతిరాతతో నేరుగా కాగితంపై చేసిన అసలైన పెన్ను సంతకాలను (వెట్-ఇంక్ సిగ్నేచర్స్) మాత్రమే ప్రామాణికంగా తీసుకుంటారు. ఒకవేళ ఆ ఒరిజినల్ సంతకం ఉన్న పత్రాన్ని స్కాన్ చేసినా, ఫ్యాక్స్ ద్వారా పంపినా లేదా ఫోటోకాపీ (జెరాక్స్) తీసినా సాధారణ పరిస్థితుల్లో అంగీకరిస్తారు. అయితే కంప్యూటర్లలో వివిధ సాఫ్ట్‌వేర్ల సాయంతో కాపీ-పేస్ట్ చేసిన సంతకాలు, ఇతరులు డిజిటల్‌గా సృష్టించినవి, సంతకం స్టాంపులు మరియు ఒకే సంతకం ఇమేజ్‌ను పదేపదే వివిధ పత్రాలపై వాడే విధానాలను పూర్తిగా చెల్లనివిగా ప్రకటిస్తారు. కేవలం యూఎస్ సీఐఎస్ అధికారిక ఆన్‌లైన్ ఫైలింగ్ పోర్టళ్లలో దరఖాస్తు సమర్పించేటప్పుడు మాత్రమే డిజిటల్ లేదా ఎలక్ట్రానిక్ సంతకాలకు చెల్లుబాటు ఉంటుంది. ఈ విప్లవాత్మక మార్పుల నేపథ్యంలో దరఖాస్తుదారులు మరియు వారికి స్పాన్సర్ చేసే అమెరికన్ యజమానులు ఫైలింగ్ ప్రక్రియలో మరింత అప్రమత్తంగా వ్యవహరించడం తప్పనిసరి.