హర్మూజ్ జలసంధి తెరవాల్సిందే - అమెరికా అధ్యక్షుడి అల్టిమేటం.
గడువు ముగిస్తే ఇరాన్ విద్యుత్ ప్లాంట్లపై దాడి …
సోమవారం రాత్రి 7:44 గంటలకు ముగియనున్న డెడ్లైన్…
Donald Trump Warning: అంతర్జాతీయ రాజకీయాల్లో తీవ్ర ఉత్కంఠ రేపుతూ, హర్మూజ్ జలసంధిని (Strait of Hormuz) వెంటనే తెరవాలని ఇరాన్ దేశానికి అమెరికా అధ్యక్షుడు డొనాల్డ్ ట్రంప్ సంచలన అల్టిమేటం జారీ చేశారు. ఈ వ్యూహాత్మక జలమార్గాన్ని ఎటువంటి బెదిరింపులు లేకుండా పునరుద్ధరించడానికి ఇరాన్కు కేవలం 48 గంటల సమయం మాత్రమే ఇచ్చారు. ఈ గడువు సోమవారం రాత్రి 7:44 గంటలతో ముగియనుంది. ప్రపంచ ఇంధన సరఫరాకు అత్యంత కీలకమైన ఈ మార్గాన్ని అడ్డుకోవడంపై ట్రంప్ తీవ్ర ఆగ్రహం వ్యక్తం చేస్తూ, గడువులోగా స్పందించకపోతే తీవ్ర పరిణామాలు ఉంటాయని హెచ్చరించారు.
ఒకవేళ ఇరాన్ ఈ హెచ్చరికను బేఖాతరు చేసి జలసంధిని పూర్తిగా తెరవకపోతే, అమెరికా సైన్యం ఇరాన్పై దాడులు చేస్తుందని ట్రంప్ స్పష్టం చేశారు. ముఖ్యంగా ఇరాన్లోని అతిపెద్ద విద్యుత్ ప్లాంట్తో పాటు ఆ దేశపు మొత్తం విద్యుత్ మౌలిక సదుపాయాలను (Infrastructure) లక్ష్యంగా చేసుకుని దాడులు నిర్వహిస్తామని అగ్రరాజ్యం హెచ్చరించింది. ఈ పరిణామాల వల్ల గల్ఫ్ దేశాల్లో యుద్ధ మేఘాలు కమ్ముకున్నాయి. అగ్రరాజ్యం ఇచ్చిన గడువు ముగియడానికి సమయం దగ్గరపడుతుండటంతో ప్రపంచవ్యాప్తంగా చమురు ధరలు మరియు సరఫరా వ్యవస్థపై ఆందోళనలు వ్యక్తమవుతున్నాయి.
