TANA: అట్లాంటాలో తానా ఆధ్వర్యంలో సీపీఆర్ శిక్షణ శిబిరం..

‘సీపీఆర్ అవగాహన, శిక్షణ’ కార్యక్రమం.. 

సుమారు 50 మందికి పైగా సభ్యులు హాజరు.. 

ఉత్తర అమెరికా తెలుగు సంఘం (తానా) సమాజ సేవలో భాగంగా నిర్వహిస్తున్న కార్యక్రమాలకు మంచి ఆదరణ లభిస్తోంది. ఇందులో భాగంగా ‘తానా సౌత్ ఈస్ట్’ విభాగం అట్లాంటాలో నిర్వహించిన ‘సీపీఆర్ అవగాహన, శిక్షణ’ కార్యక్రమం విజయవంతంగా జరిగింది. మార్చి 29న స్థానికంగా ‘అకేషన్స్’ వేదికగా జరిగిన ఈ శిబిరానికి అక్కడి తెలుగు సమాజం నుంచి మంచి స్పందన కనిపించింది.

ఈ కార్యక్రమంలో పాల్గొన్న వారు అత్యవసర పరిస్థితుల్లో చేయాల్సిన ప్రాథమిక వైద్య చర్యలపై అవగాహన పొందారు. ముఖ్యంగా గుండెపోటు వంటి ప్రమాదకర పరిస్థితుల్లో సీపీఆర్ (CPR) ఎలా చేయాలి అనే అంశాన్ని ప్రముఖ వైద్యురాలు డాక్టర్ లలిత మేడెపల్లి తన బృందంతో కలిసి సులభంగా, స్పష్టంగా వివరించారు.

సుమారు 50 మందికి పైగా పాల్గొన్న వారికి బొమ్మల ద్వారా హ్యాండ్స్-ఆన్ ప్రాక్టీస్ చేయించడం ఈ శిక్షణకు ప్రత్యేక ఆకర్షణగా నిలిచింది. ప్రాణాపాయ స్థితిలో ఉన్న వ్యక్తికి వైద్య సహాయం అందే వరకు ప్రాణాలను నిలబెట్టే ఈ నైపుణ్యం ఎంత ముఖ్యమో పాల్గొన్న ప్రతి ఒక్కరికీ అవగాహన కల్పించారు.

తానా అధ్యక్షుడు నరేన్ కొడాలి, ఈవీపీ శ్రీని లావుల ప్రోత్సాహంతో ఈ కార్యక్రమం నిర్వహించకడం జరిగింది. ఉమెన్ సర్వీసెస్ కో-ఆర్డినేటర్ సోహిని అయనాల ఈ శిబిరాన్ని సమన్వయం చేసి విజయవంతం చేశారు. ఈ సందర్భంగా తానా నాయకులు మాట్లాడుతూ, సమాజంలో ఆరోగ్యంపై అవగాహన పెంచేందుకు ఇలాంటి కార్యక్రమాలను భవిష్యత్తులో మరింత విస్తరించాలని సంకల్పించారు.

ఈ కార్యక్రమంలో సౌత్ ఈస్ట్ రీజినల్ రిప్రజెంటేటివ్ శేఖర్ కొల్లు, ఫౌండేషన్ ట్రస్టీ మధుకర్ యార్లగడ్డ, బోర్డ్ ఆఫ్ డైరెక్టర్ భరత్ మద్దినేని, మాజీ అధ్యక్షుడు అంజయ్య చౌదరి లావు, సోషల్ వెల్ఫేర్ కోఆర్డినేటర్ సునీల్ దేవరపల్లి తదితరులు పాల్గొన్నారు.

అలాగే ఈ శిక్షణ కార్యక్రమం విజయవంతం కావడానికి కృషి చేసిన స్థానిక తానా ప్రతినిధులు మాలతి నాగభైరవ, పూలని జస్టి, ఆర్థక అన్నే, ఉప్పు శ్రీనివాస్, అనిల్ యలమంచిలి, కోటి కండిమల్ల, నరేన్ నల్లూరి, చైతన్య కొర్రపాటిల సేవలను నాయకత్వం ప్రత్యేకంగా అభినందించింది. కార్యక్రమానికి వేదికను అందించిన కిషోర్ తాటికొండకు కూడా ప్రత్యేక కృతజ్ఞతలు తెలిపారు.

సమాజంలో అత్యవసర సమయంలో ప్రాణాలను రక్షించే సీపీఆర్ వంటి నైపుణ్యాలపై అవగాహన పెంచడంలో ఈ శిబిరం ఒక మంచి ముందడుగుగా నిలిచింది.