బేర్ గ్రిల్స్ పేరును వినగానే ప్రపంచంలోని అతి క్లిష్టమైన అడవుల్లో కూడా జీవించగల సాహస యోధుడు మన కళ్ల ముందుకొస్తాడు. ఎంతో ప్రమాదకరమైన పరిస్థితుల్లో అతను ఎలా ఆహారం సమకూర్చుకుంటాడో, ఎలా బతికేస్తాడో మనకు తెలుసు. అయితే ఇంట్లో ఉన్నప్పుడు అతను నిజంగా ఏమి తింటాడు? అతని రోజువారీ ఆహారపు అలవాట్లు ఎలా ఉంటాయి? అనే ప్రశ్నలకు ఆయన తాజాగా సోషల్‌ మీడియాలో ఇచ్చిన సమాధానం ఇప్పుడు ప్రపంచవ్యాప్తంగా ఆసక్తిని రేకెత్తిస్తోంది. ఆశ్చర్యకరంగా, బేర్ గ్రిల్స్ రోజంతా తినేది చాలా సాధారణమైన, సహజమైన, రైతుల వద్ద నుంచే నేరుగా వచ్చే పదార్థాలేనని ఆయన వెల్లడించారు.
తాను ఎప్పుడు బయటకైనా వెళ్లే ముందు ప్రకృతిలో కొద్దిసేపు గడపడం, తర్వాత సరళమైన అల్పాహారంతో రోజు ప్రారంభించడం అలవాటని గ్రిల్స్ చెప్పారు. నిత్యం 3–4 గుడ్లతో తయారుచేసింది గ్రీక్‌ యోగర్ట్‌లో ప్రోటీన్‌ పౌడర్‌, బెర్రీలు, కొద్దిగా తేనె కలిపిన మిశ్రమం, అలాగే తాజాగా పిండిన నారింజరసం ఇవన్నీ ఆయన బ్రేక్‌ఫాస్ట్‌ మెనూలో ఉంటాయి. ఇవి శరీరానికి అవసరమైన ప్రోటీన్‌, మంచి కొవ్వులు, సహజ చక్కెరల్ని అందించి, రోజంతా చురుకుగా ఉండేందుకు శక్తినిస్తాయని ఆయన అంటున్నారు.
చాలామంది కార్బోహైడ్రేట్లను తగ్గించేందుకు ప్రయత్నించే ఈ కాలంలో, గ్రిల్స్ మాత్రం తనకు రోజు మొత్తం శక్తినిచ్చేది మంచి కార్బోహైడ్రేట్సేనని చెబుతున్నారు. అందుకే మధ్యాహ్నం, సాయంత్రం సమయంలో ఆయన ఎక్కువగా ఆలుగడ్డలు, తెల్ల బియ్యం, తేనె వంటి పదార్థాలను తీసుకుంటారు. ఇవి తన శరీరానికి నిరంతర శక్తిని అందిస్తాయని ఆయన వివరిస్తున్నారు.
రాత్రి భోజనం విషయానికి వస్తే, ఆయన మెనూ మరింత సరళంగా ఉంటుంది. సాధారణంగా రిబ్ఐ స్టేక్‌ లేదా వేయించిన పెద్ద ఆలుగడ్డపై వెన్నపూసి, కొంచెం ఉప్పు చల్లుకుని తింటారు. ఇది ఒక విధంగా ప్రోటీన్‌తో నిండిన కంఫర్ట్‌ ఫుడ్‌ అని కూడా చెప్పవచ్చు. చాలా సంవత్సరాలుగా ఈ అలవాటే తన ఆరోగ్యాన్ని మెరుగ్గా ఉంచుతుందని గ్రిల్స్ పేర్కొన్నారు.
రోజు చివరిలో ఆయన తీసుకునేది రా మిల్క్ (raw milk) తో చేసిన ప్రోటీన్‌ షేక్‌. ఇందులో ప్రోటీన్‌ పౌడర్‌, కొద్దిగా తేనె, బనానా, ఐస్‌—చాలా సహజమైన పదార్థాలే ఉంటాయి. “ఈ షేక్‌ చాలా సింపుల్. కానీ అది నాకు అవసరమైన శక్తిని వెంటనే అందిస్తుంది,” అని గ్రిల్స్ వివరిస్తున్నారు.
సాహస యాత్రలకు ప్రసిద్ధుడైన బేర్ గ్రిల్స్ ఆహారంలో చూపే సరళత ప్రస్తుతం పోషకాహార నిపుణులను కూడా ఆకట్టుకుంటోంది. సహజమైన పదార్థాలు, అసలు రూపంలో ఉన్న ఆహారం, రైతు వద్ద నుంచే లభించే పదార్థాలు ఇవే ఆరోగ్యానికి నిజమైన పునాది అని ఆయన చెబుతున్న తీరు ప్రజల్లో ఆహారపు అలవాట్లపై కొత్త అవగాహనను తీసుకువస్తోంది.
