ఆంధ్రప్రదేశ్ ప్రభుత్వం రాష్ట్ర రహదారుల అభివృద్ధికి పెద్ద ఎత్తున చర్యలు ప్రారంభించింది. వాహనాల రద్దీ ఎక్కువగా ఉన్న మొత్తం ఏడు రాష్ట్ర రహదారులను అభివృద్ధి చేయడానికి రూ.936 కోట్లు ఖర్చు చేసేందుకు మంత్రివర్గం ఆమోదం తెలిపింది. ఈ ప్రాజెక్ట్లో భాగంగా మొత్తం 470 కిలోమీటర్ల రోడ్లను రెండువరుసలుగా ఆధునికంగా అభివృద్ధి చేయనున్నారు.
ఈ రోడ్ల అభివృద్ధి పనులను పీపీపీ విధానంలో చేపట్టాలని ప్రభుత్వం నిర్ణయించింది. అంటే, కాంట్రాక్టర్లే రోడ్ల నిర్మాణం, మెరుగుదల, నిర్వహణ బాధ్యతలను తీసుకుంటారు. ప్రతిగా వారికి కొన్నేళ్ల పాటు టోల్ వసూలు చేసే హక్కును ప్రభుత్వం ఇవ్వనుంది. దీనివల్ల రోడ్ల నాణ్యత మెరుగవడం తోపాటు ప్రభుత్వ ఖర్చు కూడా తగ్గుతుంది.
ప్రాథమిక అంచనాల ప్రకారం, ఈ ఏడు రహదారుల అభివృద్ధికి కిలోమీటరుకు రెండు కోట్ల రూపాయలు అవసరమవుతాయని అధికారులు తెలిపారు. రోడ్ల అభివృద్ధి పూర్తయిన తర్వాత టోల్ ద్వారా సంవత్సరానికి రూ.96 కోట్లకుపైగా ఆదాయం వచ్చే అవకాశం ఉందని అంచనా. టోల్ వసూళ్లను ప్రభుత్వం చేపట్టితే, ఈ ఆదాయాన్ని చూపించి మరిన్ని రోడ్ల అభివృద్ధికి లోన్లు తీసుకునే అవకాశం ఉందని ఆర్అండ్బీ శాఖ పేర్కొంది.
ఇక ఈ రోడ్ల ప్రాజెక్టుల కోసం సమగ్ర నివేదికలు సిద్ధం చేయడానికి సలహా సంస్థలకు బాధ్యతలు అప్పగించనున్నారు. రోడ్లను విస్తరించేందుకు అదనపు భూమి అవసరం లేకపోవడం కూడా ఒక పెద్ద ప్రయోజనంగా అధికారులు చెబుతున్నారు. ప్రాజెక్ట్ నివేదికలు రెడీ అయిన వెంటనే టెండర్లు ఆహ్వానించనున్నారు.
అభివృద్ధి చేయబోయే ఏడు కీలక రహదారులు ఇవి: కర్నూలు–బళ్లారి (101 కి.మీ), గుంతకల్లు–తుంగభద్ర (74 కి.మీ), గుత్తి–పత్తికొండ–ఆదోని (71 కి.మీ), చిత్తూరు–పుత్తూరు (64 కి.మీ), మార్టేరు–ప్రక్కిలంక (63 కి.మీ), విజయవాడ–విస్సన్నపేట (51 కి.మీ), తాడ–శ్రీకాళహస్తి (46 కి.మీ). ఈ రహదారుల అభివృద్ధితో సంబంధిత జిల్లాల ఆర్థిక, వాణిజ్య, రవాణా సదుపాయాలు మరింత మెరుగుపడనున్నాయి.
