వాహనదారులు తమ వాహనాలపై దీర్ఘకాలంగా పేరుకుపోయిన పెండింగ్ చలాన్లను ఎలాంటి సుదీర్ఘ చట్టపరమైన చర్యలు లేకుండా పరిష్కరించుకోవడానికి ఒక అద్భుతమైన అవకాశం వచ్చింది. ఈ సంవత్సరం చివరి, నాల్గో జాతీయ లోక్ అదాలత్ డిసెంబర్ 13వ తేదీన (శనివారం) దేశవ్యాప్తంగా నిర్వహించనున్నారు.
నేషనల్ లీగల్ సర్వీసెస్ అథారిటీ (NALSA) పర్యవేక్షణలో లోక్ అదాలత్‌లు నిర్వహించబడతాయి. వీటి ముఖ్య ఉద్దేశం: వాహనాలపై పెండింగ్‌లో ఉన్న బకాయిలను తగ్గించడం.
సుదీర్ఘ చట్టపరమైన ప్రక్రియ లేకుండా, సామరస్యంగా కేసులను పరిష్కరించుకునేందుకు వేదిక కల్పించడం. ముఖ్యంగా కాంపౌండబుల్ లేదా చిన్న ట్రాఫిక్ ఉల్లంఘనలకు సంబంధించిన కేసులను ఇక్కడ పరిష్కరిస్తారు.
ఈ ఏడాదికి ఇదే చివరి లోక్ అదాలత్ కాబట్టి, ఈ అవకాశాన్ని తప్పక వినియోగించుకోవాలి. లోక్ అదాలత్‌లో ముఖ్యంగా కోర్టు వెలుపల సామరస్యంగా పరిష్కరించగల చిన్న ట్రాఫిక్ ఉల్లంఘనలను పరిగణనలోకి తీసుకుంటారు. వాటిలో కొన్ని..
హెల్మెట్ లేకుండా బైక్ నడపడం (No Helmet)
సీటు బెల్ట్ పెట్టుకోకపోవడం (No Seat Belt)
ట్రాఫిక్ సిగ్నల్స్ ఉల్లంఘన (Traffic Signal Violation)
పార్కింగ్ నియమాలను ఉల్లంఘించడం (Parking Violations)
PUC సర్టిఫికెట్ లేకపోవడం (Pollution Under Control Certificate)
వాహన బీమా గడువు ముగియడం (Expired Insurance)
ఈ ఏడాది నాల్గో జాతీయ లోక్ అదాలత్‌లు దేశవ్యాప్తంగా నిర్వహించనున్నారు. ముఖ్యంగా ఢిల్లీ, హర్యానా, పంజాబ్, మహారాష్ట్ర, ఉత్తరప్రదేశ్, గుజరాత్, తమిళనాడు, తెలంగాణ, కర్ణాటక, రాజస్థాన్, పశ్చిమ బెంగాల్ వంటి అనేక రాష్ట్రాల్లో జరిగే అవకాశం ఉంది. తెలుగు రాష్ట్రాల్లోని వాహనదారులు కూడా తమ పెండింగ్ చలాన్లను క్లియర్ చేసుకునేందుకు ఇది మంచి అవకాశం.
లోక్ అదాలత్‌లో మీ కేసును పరిష్కరించుకోవడానికి, వాహన యాజమానులు ముందుగానే ఆన్‌లైన్‌లో దరఖాస్తు చేసుకోవాల్సి ఉంటుంది. ఈ ప్రక్రియ చాలా సులభం.. ముందుగా https://nalsa.gov.in/ వెబ్‌సైట్‌ను సందర్శించండి. అక్కడ అందుబాటులో ఉన్న 'లోక్ అదాలత్' లేదా 'టోకెన్ రిజిస్ట్రేషన్' ఆప్షన్‌ను ఎంచుకోవాలి.
మీ వాహనం మరియు ఇతర అవసరమైన సమాచారాన్ని ఆన్‌లైన్‌లో సరిగ్గా నమోదు చేయండి. దరఖాస్తు పూర్తయిన తర్వాత, మీకు ఒక టోకెన్ నంబరు వస్తుంది. ఆ టోకెన్ నంబరుతో మీరు నిర్దేశించిన లోక్ అదాలత్ ప్రాంతానికి చేరుకుని, మీ ట్రాఫిక్ చలాన్ల కేసులను పరిష్కరించుకోవచ్చు.
కొన్ని సందర్భాల్లో లోక్ అదాలత్‌లో మీ పెండింగ్ చలాన్ల జరిమానాలను మినహాయించే అవకాశం కూడా ఉంటుంది. పాత చలాన్లు క్లియర్ చేసుకోకపోతే భవిష్యత్తులో వాహనం అమ్మకం, రిజిస్ట్రేషన్ లేదా ఇతర చట్టపరమైన సమస్యలు వచ్చే అవకాశం ఉంది. లోక్ అదాలత్ ద్వారా ఈ ఇబ్బందులన్నీ తొలగిపోతాయి.
ఈ అవకాశాన్ని సద్వినియోగం చేసుకొని, మీ వాహనాలపై ఉన్న పెండింగ్ చలాన్లను చెక్ చేసుకుని, అవసరమైన పత్రాలను సిద్ధం చేసుకోండి. ఎలాంటి చట్టపరమైన ఇబ్బందులు లేకుండా కొత్త సంవత్సరాన్ని ప్రశాంతంగా మొదలుపెట్టండి!
