Prawns Fry Telugu: ఒక్కసారి ఇలా రొయ్యల వేపుడు చేశారంటే.. ప్లేట్ ఖాళీ అవ్వాల్సిందే!

రొయ్యలు అంటే  ఇష్టపడని వారంటూ ఎవరు ఉండరేమో  బహుశా ముఖ్యంగా రొయ్యల వేపుడు ఉంటే ఆ మజాయే వేరు. అయితే చాలామంది హోటల్స్‌లో దొరికే ఆ రుచి ఇంట్లో రావడం లేదని బాధపడుతుంటారు. కొన్ని చిన్న చిట్కాలు పాటిస్తే రెస్టారెంట్ కంటే అద్భుతమైన రుచితో రొయ్యల వేపుడును మనం కిచెన్‌లోనే సిద్ధం చేసుకోవచ్చు. దీనికోసం పెద్దగా కష్టపడాల్సిన అవసరం లేదు, ఇంట్లో ఉండే మసాలాలతోనే ఈ వంటకాన్ని పూర్తి  చేసుకోవచ్చు.

ముందుగా రొయ్యల వేపుడు పక్కాగా రావాలంటే రొయ్యల ఎంపిక, వాటి శుభ్రత చాలా ముఖ్యం. మార్కెట్ నుండి తెచ్చిన రొయ్యలను ఉప్పు, నిమ్మరసం వేసి రెండు మూడు సార్లు శుభ్రంగా కడగాలి. ఇలా చేయడం వల్ల రొయ్యల పైన ఉండే జిగురు, నీచు వాసన పూర్తిగా పోతాయి. ఆ తర్వాత రొయ్యల వెనుక భాగంలో ఉండే నల్లటి నరాన్ని తీసేయడం మర్చిపోవద్దు. ఇలా శుభ్రం చేసుకున్న రొయ్యల్లో కొద్దిగా పసుపు, ఉప్పు వేసి కలిపి పక్కన పెట్టుకుంటే అవి గట్టిపడకుండా మెత్తగా ఉంటాయి.

వంట ప్రారంభించేటప్పుడు ఒక మందపాటి బాణలిని తీసుకుని అందులో నూనె వేడి చేయాలి. నూనె కాగాక జీలకర్ర, పచ్చిమిర్చి, సన్నగా తరిగిన ఉల్లిపాయ ముక్కలు వేసి దోరగా వేయించాలి. ఉల్లిపాయలు త్వరగా వేగాలంటే చిటికెడు ఉప్పు వేయడం మంచిది. ఉల్లిపాయలు బంగారు రంగులోకి వచ్చాక, తాజా అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి. అల్లం వెల్లుల్లి పేస్ట్ ఎప్పటికప్పుడు తాజాగా నూరుకుంటే కూరకు మంచి సువాసన వస్తుంది.

ఇప్పుడు ముందుగా సిద్ధం చేసుకున్న రొయ్యలను బాణలిలో వేయాలి. రొయ్యల నుండి నీరు ఊరుతుంది కాబట్టి, ఆ నీరంతా పోయి నూనె పైకి తేలే వరకు ఉడికించాలి. ఆ తర్వాత తగినంత కారం, ధనియాల పొడి, గరం మసాలా వేసి బాగా కలపాలి. రొయ్యలను మరీ ఎక్కువ సేపు వేయిస్తే అవి రబ్బరులా సాగుతాయి, కాబట్టి జాగ్రత్తగా చూసుకోవాలి. మసాలాలన్నీ రొయ్యలకు పట్టి, ముక్కలు ఎర్రగా వేగాక చివరగా కరివేపాకు, సన్నగా తరిగిన కొత్తిమీర చల్లుకుంటే వేడి వేడి రొయ్యల వేపుడు సిద్ధం.

ఈ రొయ్యల వేపుడును పప్పుచారుతో గానీ లేదా సాంబార్‌తో గానీ సైడ్ డిష్‌గా తింటే అమృతంలా ఉంటుంది. కేవలం అన్నంలోకే కాకుండా చపాతీల్లోకి కూడా ఇది మంచి కాంబినేషన్. తక్కువ సమయంలో, తక్కువ ఖర్చుతో ఇంటి మెంబర్స్‌ అందరికీ నచ్చేలా ఇలాంటి రుచికరమైన వంటకాన్ని మీరు కూడా ఒకసారి ప్రయత్నించి చూడండి. మీ ఇంట్లో వాళ్లంతా కచ్చితంగా మిమ్మల్ని మెచ్చుకుంటారు..