Chinthakaya Pappu Charu: పక్కా పల్లెటూరి స్టైల్ ‘చింతకాయ పప్పుచారు’.. వేడి అన్నంలోకి అదిరిపోయే కాంబినేషన్!
Chinthakaya Pappu Charu: నోరూరించే చింతకాయ పప్పుచారును పక్కా కొలతలతో, రుచిగా ఎలా తయారు చేసుకోవాలో తెలుసుకోండి ఈ పప్పుచారు అన్నం, అప్పడాలతో తింటే అమృతంలా ఉంటుంది.
Chinthakaya Pappu Charu: మార్కెట్లోకి పచ్చి చింతకాయలు వచ్చాయంటే చాలు.. ఆ పులుపుని తలచుకోగానే నోట్లో నీళ్లూరుతాయి. కేవలం పచ్చడికే పరిమితం కాకుండా, ఈ సీజన్లో దొరికే పచ్చి చింతకాయలతో పప్పుచారు చేసుకుంటే ఆ రుచే వేరు. వేడివేడి అన్నంలోకి కాస్త నెయ్యి వేసుకుని, అప్పడాలు నంచుకుని తింటే ఆ మజానే వేరు. మరి ఈ కమ్మని చింతకాయ పప్పుచారును ఇంట్లోనే సులభంగా ఎలా తయారు చేసుకోవాలో ఇప్పుడు చూద్దాం.
కావలసిన పదార్థాలు:
కందిపప్పు: 200 గ్రాములు
పచ్చి చింతకాయలు: 150 - 180 గ్రాములు
పసుపు: అర టీస్పూన్
కారం: ఒక టీస్పూన్
కల్లు ఉప్పు: రుచికి సరిపడా
తాలింపు కోసం: ఆవాలు, జీలకర్ర, ఎండుమిర్చి, కరివేపాకు, వెల్లుల్లి రెబ్బలు
అదనపు రుచి కోసం: ఇంగువ, ఉల్లిపాయ ముక్కలు, టమాటా (ఆప్షనల్), పచ్చిమిర్చి, కొత్తిమీర.
ముందుగా 200 గ్రాముల కందిపప్పును శుభ్రంగా కడిగి, తగినన్ని నీళ్లు పోసి కనీసం అరగంట పాటు నానబెట్టాలి. ఇలా చేయడం వల్ల పప్పు త్వరగా ఉడుకుతుంది. ఆ తర్వాత అందులో పసుపు, కొద్దిగా కరివేపాకు, పచ్చిమిర్చి ముక్కలు, కొంచెం నూనె వేసి కుక్కర్లో మూడు, నాలుగు విజిల్స్ వచ్చే వరకు మెత్తగా ఉడికించుకోవాలి. పప్పు ఉడికిన తర్వాత పప్పుగుత్తితో మరీ మెత్తగా కాకుండా లైట్గా మెదుపుకుని పక్కన పెట్టుకోవాలి.
మరోపక్క చింతకాయలను శుభ్రంగా కడిగి, అవి మునిగేంత వరకు నీళ్లు పోసి స్టవ్ మీద ఉడికించాలి. చింతకాయ మీద పొట్టు విడిపోయి మెత్తబడే వరకు ఉడికించి, చల్లారబెట్టాలి. చల్లారిన తర్వాత వాటిని బాగా పిసికి చింతరసాన్ని వేరు చేయాలి. ఇలా రెండు మూడు సార్లు నీళ్లు పోస్తూ చింతకాయలోని పులుపును పూర్తిగా తీసుకోవాలి. మెదిపి పెట్టుకున్న పప్పులో ఈ చింతరసాన్ని కలపాలి. దీనికి సుమారు 700 ml వరకు నీళ్లు పోసి, కారం మరియు రుచికి సరిపడా ఉప్పు (కల్లు ఉప్పు అయితే రుచి బాగుంటుంది) వేసి బాగా కలుపుకోవాలి.
స్టవ్ మీద గిన్నె పెట్టి రెండు టేబుల్ స్పూన్ల నూనె వేయాలి. నూనె వేడయ్యాక ఆవాలు, జీలకర్ర, దంచిన వెల్లుల్లి, ఎండుమిర్చి, ఉల్లిపాయ ముక్కలు వేసి ఎర్రగా వేయించాలి. ఇందులో చిటికెడు ఇంగువ, కరివేపాకు వేసి, చివరగా ఒక టమాటా ముక్కలు వేసి మగ్గనివ్వాలి. తాలింపు వేగాక తయారు చేసుకున్న పప్పుచారు మిశ్రమాన్ని అందులో పోయాలి.
ఈ మిశ్రమాన్ని ఐదు నుండి పది నిమిషాల పాటు మీడియం ఫ్లేమ్ మీద బాగా మరిగించాలి. పప్పుచారు ఎంత బాగా మరిగితే అంత రుచి వస్తుంది. చివరగా సన్నగా తరిగిన కొత్తిమీర చల్లుకుని స్టవ్ ఆఫ్ చేస్తే.. ఎంతో రుచికరమైన చింతకాయ పప్పుచారు రెడీ. ఈ పప్పుచారులోకి మిరపకాయ బజ్జీలు లేదా ఆలూ ఫ్రై కాంబినేషన్ అదిరిపోతుంది.
Be the first to react
