దక్షిణ భారత చిత్రసీమలో ‘లేడీ సూపర్ స్టార్’గా గుర్తింపు తెచ్చుకున్న నయనతార తన సినీ కెరీర్‌లో మరో మైలురాయిని అందుకుంది. ఆమె సినిమా ఇండస్ట్రీలోకి అడుగుపెట్టి 22 ఏళ్లు పూర్తయ్యాయి. ఈ ప్రత్యేక సందర్భాన్ని గుర్తుచేసుకుంటూ నయనతార సోషల్ మీడియాలో ఒక ఎమోషనల్ పోస్ట్ చేశారు.
తన హృదయానికి దగ్గరైన మాటల్లో నయనతార ఇలా రాసింది నేను కెమెరా ముందుకు మొదటిసారి నిల్చొని 22 ఏళ్లు అవుతోంది. ఆ సమయంలో ఇది నా జీవితం అవుతుందని, సినిమాలు నా ప్రపంచమవుతాయని ఊహించలేదు. ప్రతి ఫ్రేమ్, ప్రతి షాట్, ప్రతి సైలెన్స్ కూడా నన్ను తీర్చిదిద్దాయి. నన్ను బలంగా మార్చాయి. నా జీవితాన్ని మారుస్తూ ముందుకు నడిపించాయి. ఈ ప్రయాణంలో నన్ను ప్రేమించిన, నమ్మిన, నాతో పాటు నడిచిన ప్రతి ఒక్కరికీ హృదయపూర్వక ధన్యవాదాలు” అని పేర్కొంది.
2003లో మలయాళంలో ‘మనస్సినక్కరే’ అనే సినిమాతో నయనతార తన సినీ ప్రస్థానాన్ని ప్రారంభించింది. మలయాళంలో చిన్న పాత్రలతో మొదలైన ఈ ప్రయాణం కొద్దికాలానికే తమిళం, తెలుగు, హిందీ సినిమాల వరకు విస్తరించింది. కొద్దికాలంలోనే ఆమె స్టార్ హోదాను సంపాదించింది. తన ప్రతిభతో, కష్టపడే తత్వంతో, స్క్రీన్ ప్రెజెన్స్‌తో నయనతార దక్షిణాదిలో అత్యధిక పారితోషికం పొందే నటిగా మారింది.
తన కెరీర్‌లో నయనతార ఎన్నో రకాల పాత్రల్లో నటించింది రొమాంటిక్ గర్ల్‌గా, యాక్షన్ హీరోయిన్‌గా, సోషల్ సబ్జెక్ట్‌లలో బలమైన మహిళా పాత్రల్లో. ‘అరమ’, ‘మాయా’, ‘రాజరాణి’, ‘శ్రీరామరాజ్యం’ వంటి చిత్రాలు ఆమెకు ప్రత్యేక గుర్తింపు తెచ్చాయి. సూపర్ స్టార్ రజనీకాంత్, కమల్ హాసన్, విజయ్, అజిత్, బాలకృష్ణ, చిరంజీవి, నాగార్జున వంటి స్టార్ హీరోలతో నటించి తన స్థాయిని నిరూపించుకుంది.
22 ఏళ్ల పాటు నిరంతరం టాప్ పొజిషన్‌లో కొనసాగడం సాధారణ విషయం కాదు. కానీ నయనతార తన క్రమశిక్షణ, డెడికేషన్, పాత్రల ఎంపికలో చూపిన జాగ్రత్తతో ఈ స్థాయిని నిలబెట్టుకుంది. ఇటీవల హిందీలో షారుక్ ఖాన్‌తో కలిసి ‘జవాన్’ సినిమాలో నటించి, దేశవ్యాప్తంగా గుర్తింపు పొందింది.
తన భర్త, ఫిల్మ్ మేకర్ విఘ్నేశ్ శివన్‌తో కలిసి నిర్మాణ రంగంలోకూ అడుగుపెట్టి ‘నయన్ విఘ్నేష్’ అనే బ్యానర్ కింద కొన్ని ప్రాజెక్టులు ప్రారంభించింది. తన జీవితం, కెరీర్ రెండింటినీ సమతూకంగా నడిపిస్తూ అభిమానుల హృదయాల్లో ప్రత్యేక స్థానం సంపాదించింది. ప్రస్తుతం నయనతార కొన్ని కొత్త ప్రాజెక్టుల్లో నటిస్తోంది. దక్షిణాదిలో ‘లేడీ సూపర్ స్టార్’గా పిలవబడే ఈ నటి తన ప్రతిభతో, కృషితో, అంకితభావంతో మరో కొత్త మైలురాయిని చేరేందుకు సిద్ధంగా ఉంది.
22 ఏళ్ల ఈ సినీ ప్రయాణం ఆమెకే కాదు, అభిమానులకు కూడా గర్వకారణంగా మారింది. “నయనతార అంటే అందం మాత్రమే కాదు, ఆత్మవిశ్వాసం, కృషి, సమర్పణకు ప్రతీక” అని అభిమానులు సోషల్ మీడియాలో కామెంట్స్ చేస్తున్నారు.
