అమెరికా అధ్యక్షుడు డొనాల్డ్‌ ట్రంప్, ఈజిప్ట్‌ అధ్యక్షుడు అబ్దెల్‌ ఫతాహ్‌ అల్‌ సిసీ సంయుక్తంగా నిర్వహిస్తున్న గాజా శాంతి సదస్సుకు భారత ప్రధాని నరేంద్ర మోదీకి ఆహ్వానం అందింది. ఈ సదస్సు ఈజిప్ట్‌లోని షార్మ్‌ ఎల్‌ షేక్‌లో రేపు, అక్టోబర్ 13న జరగనుంది.
ప్రధానమంత్రి కార్యాలయం (పీఎంఓ) ఇప్పటివరకు మోదీ పాల్గొనడం గురించి అధికారికంగా ధృవీకరించలేదు. ఈ సదస్సు గాజా ప్రాంతంలో జరుగుతున్న యుద్ధానికి ముగింపు పలకడం మధ్యప్రాచ్య ప్రాంతంలో శాంతి మరియు స్థిరత్వం నెలకొల్పడం ప్రధాన ఉద్దేశ్యంగా ఉంది.
శనివారం అమెరికా మరియు ఈజిప్ట్‌ ప్రభుత్వాల ద్వారా చివరి నిమిషంలో ఈ ఆహ్వానం పంపినట్టు సమాచారం. ఈజిప్ట్‌ అధ్యక్ష భవనం ప్రకటించిన ప్రకారం, సదస్సు సోమవారం మధ్యాహ్నం ప్రారంభమవుతుంది. దీనికి అమెరికా అధ్యక్షుడు ట్రంప్ మరియు ఈజిప్ట్‌ అధ్యక్షుడు సిసీ సంయుక్త అధ్యక్షత వహించనున్నారు. 20కి పైగా దేశాల నాయకులు పాల్గొనబోతున్నట్లు సమాచారం.
ఈ సదస్సు ద్వారా మధ్యప్రాచ్యంలో శాంతి ప్రయత్నాలను బలోపేతం చేయడం ప్రాంతీయ భద్రతకు కొత్త దారులు చూపడం లక్ష్యంగా ఉందని ఈజిప్ట్‌ అధ్యక్ష భవనం తెలిపింది. ట్రంప్ దృష్టిలో ఇది ప్రపంచవ్యాప్తంగా శాంతి సాధనకు మరో ప్రయత్నంగా పేర్కొన్నారు.
మోదీ ఈ సదస్సులో పాల్గొంటే అమెరికా అధ్యక్షుడు ట్రంప్‌తో భేటీ అవ్వడానికి అవకాశం లభిస్తుంది. అలాగే, ఈజిప్ట్‌తో ద్వైపాక్షిక సంబంధాలు మరింత బలోపేతం కావడమే కాకుండా పాలస్తీనా ప్రజల పట్ల భారతదేశం సానుభూతిని చూపించేందుకు ఇది ఒక మంచి వేదికగా భావిస్తున్నారు.
ఇటీవల అమెరికా–భారత సంబంధాలు కొంత చల్లబడిన నేపథ్యంలో ఈ ఆహ్వానం విశేష ప్రాధాన్యత పొందింది. ఇటీవల 50 శాతం సుంకాలు, హెచ్–1బీ వీసా ఫీజు పెంపు వంటి చర్యలతో రెండు దేశాల మధ్య ఉద్రిక్తతలు ఏర్పడినట్లు గమనించవచ్చు. ఈ నేపథ్యంలో అమెరికా రాయబారి-నామినేట్‌ సెర్జియో గోర్‌ శనివారం నాడు మోదీని కలిశారు. ఆయన ఈ సమావేశాన్ని విశ్వాసం మరియు స్నేహం పునరుద్ధరణకు మొదటి అడుగు గా పేర్కొన్నారు.
సెర్జియో గోర్‌ అక్టోబర్ 9 నుండి 14 వరకు భారత పర్యటనలో ఉన్నారు. ఆయన విదేశాంగ మంత్రి ఎస్‌.జైశంకర్‌, జాతీయ భద్రతా సలహాదారు అజిత్‌ దోవల్‌, విదేశాంగ కార్యదర్శి విక్రమ్‌ మిశ్రీలను కూడా కలిసిన విషయం అందరికీ తెలిసిందే.
ఈ సదస్సు విజయవంతమైతే, మధ్యప్రాచ్యంలో శాంతి స్థాపన దిశగా ఒక ముఖ్యమైన ముందడుగు అవుతుంది. అంతర్జాతీయ రాజకీయ వర్గాలు ఈ సమావేశంపై దృష్టి పెట్టాయి.
