ఆంధ్రప్రదేశ్‌లో అత్యవసర వైద్య సేవలైన 108 అంబులెన్స్‌లు త్వరలో కొత్త లుక్‌లో ప్రజల ముందుకు రానున్నాయి. గత ప్రభుత్వం అంబులెన్స్‌లపై వేసిన నీలం రంగును కూటమి ప్రభుత్వం తొలగిస్తోంది. కొత్తగా తెలుపు, ఎరుపు, పసుపు రంగుల్లో ఈ వాహనాలను రూపొందిస్తున్నారు. ఇవి కేవలం రంగు మార్పుతోనే కాకుండా అత్యాధునిక పరికరాలతో కూడా సమృద్ధిగా ఉండనున్నాయి. రాత్రివేళ స్పష్టంగా కనిపించేందుకు రిఫ్లెక్టివ్ టేపులు కూడా వాహనాలపై ఏర్పాటు చేస్తున్నారు. ఈ వాహనాల తయారీ కృష్ణా జిల్లాలోని మల్లవల్లి పారిశ్రామికవాడలో వేగంగా కొనసాగుతోంది.
ఇక 104 వాహనాలు కూడా పూర్తిగా కొత్త రూపాన్ని సంతరించుకోనున్నాయి. వీటిని 'సంజీవని' పేరిట మోడిఫై చేస్తున్నారు. ఈ వాహనాలపై ప్రధాన మంత్రి మోదీ, సీఎం చంద్రబాబు, డిప్యూటీ సీఎం పవన్ కళ్యాణ్, మంత్రి సత్యకుమార్‌ల ఫోటోలు ఉంటాయి. కుశలవ కోచ్ వర్క్‌షాప్‌లో ఈ మార్పులు కొనసాగుతున్నాయి. ప్రజలకు త్వరలోనే ఈ కొత్త వాహనాలను అందుబాటులోకి తీసుకురావడానికి ప్రభుత్వం ప్రణాళిక రూపొందిస్తోంది.
ఈ కొత్త వాహనాల రూపకల్పనతో పాటు, రోడ్డు ప్రమాదాల నివారణ కోసం రాష్ట్రవ్యాప్తంగా ప్రత్యేక drive చేపట్టనుంది. ఆగస్టు నెలంతా పోలీసులు ప్రత్యేక చర్యలు తీసుకోనున్నారు. 1 నుండి 10వ తేదీ వరకు డ్రంకెన్ డ్రైవ్ తనిఖీలు, 11 నుండి 17 వరకు అధిక వేగ వాహనాలపై నిఘా, 18 నుండి 24 వరకు హెల్మెట్ లేకుండా ప్రయాణించే వారిపై చర్యలు, 25 నుండి 31 వరకు బ్లాక్‌స్పాట్‌ల వద్ద enforcement డ్రైవ్ నిర్వహించనున్నారు.
ఈ అన్ని చర్యలూ ప్రజల భద్రత కోసం ప్రభుత్వంతో పాటు ఆరోగ్య, పోలీసు శాఖలు కలసి చేపడుతున్న సమగ్ర ప్రణాళికలో భాగం. అంబులెన్స్‌లు అత్యవసర పరిస్థితుల్లో మరింత వేగంగా స్పందించేలా, అందుబాటులో ఉండేలా ఈ మార్పులు చేయడం ఎంతో ఉపయోగకరంగా మారనుంది.
