ఆంధ్రప్రదేశ్ ప్రభుత్వం APSRTC బస్సుల్లో మహిళలకు ఉచిత ప్రయాణ పథకాన్ని ఆగస్టు 15 నుంచి అమలు చేయనుంది. మంగళగిరిలో ముఖ్యమంత్రి చంద్రబాబు నాయుడు ఈ పథకాన్ని అధికారికంగా ప్రారంభిస్తారు. ఈ పథకం కింద రాష్ట్రంలోని APSRTCకి చెందిన మొత్తం 11,449 బస్సుల్లో 74 శాతం అంటే 8,458 బస్సుల్లో మహిళలు ఉచితంగా ప్రయాణించవచ్చు. రెండు రోజుల్లో ఈ పథకానికి సంబంధించిన పూర్తి వివరాలు, అందులో ఉచిత ప్రయాణం వర్తించే బస్సుల జాబితా, అవసరమైన గుర్తింపు కార్డుల వివరాలతో ఉత్తర్వులు జారీ కానున్నాయి.
అయితే, కొన్ని బస్సుల్లో ఈ ఉచిత ప్రయాణం వర్తించదు. రాష్ట్రాల మధ్య నడిచే ఇంటర్‌స్టేట్ ఎక్స్‌ప్రెస్ బస్సులు, శ్రీశైలం, పాడేరు వంటి ఘాట్ రోడ్లలో నడిచే ఎక్స్‌ప్రెస్ బస్సులు, అలాగే నాన్‌స్టాప్ ఎక్స్‌ప్రెస్ బస్సులు ఈ పథకం పరిధిలో ఉండవు. ప్రయాణికుల రద్దీ పెరిగే అవకాశం ఉన్నందున డ్రైవర్లు, కండక్టర్ల కొరతను అధిగమించడానికి తాత్కాలిక నియామకాలు, విధుల పునర్విభజన వంటి చర్యలు చేపడుతున్నారు. కొన్ని బస్టాండ్లలో టికెట్ బుకింగ్ డెస్క్‌ల వద్ద ఉన్న సిబ్బందిని కూడా బస్సు డ్యూటీలకు కేటాయించనున్నారు.
ఈ పథకం ద్వారా మహిళలకు ప్రయాణ సౌలభ్యం పెరగడంతో పాటు, పల్లె నుండి పట్టణాలకు, అలాగే విద్య, ఉద్యోగాల కోసం ప్రయాణించే వారికి ఇది పెద్ద మద్దతు అవుతుందని ప్రభుత్వం భావిస్తోంది.
