యాలకులు వంటకాలకు ప్రత్యేకమైన సువాసన, రుచిని అందించే అద్భుతమైన సుగంధ ద్రవ్యం. అందుకే వాటిని సుగంధ ద్రవ్యాల రాణిగా పిలుస్తారు. తీపి వంటకాలకే కాకుండా, కూరలు, పులుసులు, బిర్యానీలు వంటి అన్ని రకాల వంటకాల్లో యాలకులు విస్తృతంగా ఉపయోగిస్తారు. వంటలకు రుచి మాత్రమే కాకుండా ఆరోగ్యాన్ని కూడా ఇవి అందిస్తాయి.
యాలకుల్లో ఉండే మూలికా లక్షణాలు, ఔషధ గుణాలు శరీరానికి ఎంతో మేలు చేస్తాయి. యాలకుల పొడి షుగర్ స్థాయిలను తగ్గించడంలో, అలాగే హైబీపీ నియంత్రణలో సహాయపడుతుంది. ఇందులోని ముఖ్యమైన నూనె అసిడిటీ, గ్యాస్, అపానవాయువు వంటి సమస్యలను తగ్గించి జీర్ణక్రియను మెరుగుపరుస్తుంది. కడుపులో మంటను తగ్గించి, ఆహారం సరిగా జీర్ణం కావడానికి దోహదపడుతుంది.
యాలకుల్లో యాంటీ ఆక్సిడెంట్లు, పొటాషియం, కాల్షియం, మెగ్నీషియం వంటి కీలక ఖనిజాలు ఉన్నాయి. ఇవి గుండె ఆరోగ్యాన్ని మెరుగుపరచడంతో పాటు చెడు కొలెస్ట్రాల్ పెరగకుండా చూస్తాయి. యాలకుల నీరు లేదా యాలకులు నమలడం వల్ల రక్తపోటు నియంత్రణలో ఉంటుంది. గుండె సంబంధిత వ్యాధుల ప్రమాదాన్ని తగ్గించడంలో ఇవి సహాయపడతాయి.
జీర్ణ సమస్యలు, మలబద్ధకం ఉన్నవారికి యాలకులు మంచి సహజ పరిష్కారం. ఇందులో ఉండే ఫైబర్ జీర్ణవ్యవస్థను బలపరచి, కడుపు సమస్యలను నివారిస్తుంది. భోజనం చేసిన తర్వాత యాలకులు నమలడం వల్ల తాజా శ్వాస లభిస్తుంది. నోటి ఆరోగ్యం మెరుగుపడి బ్యాక్టీరియా సమస్యలు తగ్గుతాయి.
రాత్రి భోజనం కాస్త భారంగా చేసినప్పుడు యాలకులు తినడం చాలా మంచిది. ఇవి పొట్టలోని కండరాలను రిలాక్స్ చేసి గ్యాస్ ఏర్పడకుండా చేస్తాయి. రెగ్యులర్గా యాలకులు తీసుకోవడం వల్ల గట్ మైక్రోబయోమ్ మెరుగుపడి శరీరానికి సరైన పోషకాలు అందుతాయి. స్ట్రెస్ లెవెల్స్ తగ్గి, హార్ట్ రేట్ నియంత్రణలో ఉండి ప్రశాంతమైన నిద్రకు సహాయపడతాయి. మొత్తం మీద యాలకులు శరీరాన్ని సహజంగా రిసెట్ చేసే ఆరోగ్యకరమైన మసాలాగా చెప్పవచ్చు.
