Benefits of Sugarcane Juice: చెరుకు రసంతో లాభాలే కాదు.. ముంచుకొస్తున్న ముప్పులు ఇవే! ఆరోగ్య నిపుణుల హెచ్చరిక..!!

Benefits of Sugarcane Juice: భానుడు భగభగలాడుతున్నాడు మార్చి నెలలోనే ఎండలు ముదురుతున్నాయి. బయటకు వెళ్తే చాలు చెమటలు కక్కాల్సిందే. ఇలాంటి టైంలో మన కళ్లు ముందుగా వెతికేది రోడ్డు పక్కన ఉండే చెరుకు రసం బండ్లనే. గ్లాసు పట్టుకుని గటగటా తాగేస్తే ఆ కిక్కే వేరు తక్షణమే శక్తి వస్తుంది, దాహం తీరుతుంది. అయితే, ఈ తీపి పానీయం అమృతంలా అనిపించినా, దీని వెనుక కొన్ని జాగ్రత్తలు కూడా ఉన్నాయని నిపుణులు హెచ్చరిస్తున్నారు. అవేంటో ఈ రోజు మనం  తెలుసుకుందాం.

ముందుగా మంచి విషయాల గురించి మాట్లాడుకుంటే.. చెరుకు రసం కేవలం రుచి కోసమే కాదు, ఇది ఒక పోషకాల గని. ఇందులో కాల్షియం, మెగ్నీషియం, ఐరన్ వంటి ఖనిజాలు పుష్కలంగా ఉంటాయి. ఎండలో తిరిగి నీరసించిపోయిన వారికి ఇది వెంటనే 'గ్లూకోజ్' లాగా పనిచేస్తుంది. అలాగే, కాలేయ సమస్యలు (లివర్ ప్రాబ్లమ్స్) ఉన్నవారికి ఇది చాలా మంచిది. మూత్రపిండాల్లో రాళ్లు ఉన్నా లేదా మూత్రంలో మంట వస్తున్నా చెరుకు రసం తాగడం వల్ల ఉపశమనం లభిస్తుంది. జీర్ణక్రియ మెరుగుపడటమే కాకుండా ముఖం మీద మొటిమలు కూడా తగ్గుతాయని చెబుతుంటారు.

ఏదైనా ఎక్కువైతే ఇబ్బందే అన్నట్లు ఒక గ్లాసు చెరుకు రసంలో దాదాపు 250 నుండి 300 కేలరీలు ఉంటాయి. ఇందులో చక్కెర శాతం చాలా ఎక్కువ. మీరు రోజుకు రెండు మూడు గ్లాసులు తాగితే, మీ శరీరంలోకి తెలియకుండానే భారీగా కేలరీలు వెళ్ళిపోతాయి. దీనివల్ల బరువు పెరిగే అవకాశం ఎక్కువగా ఉంది. ముఖ్యంగా డయాబెటిస్ లేదా షుగర్ వ్యాధి ఉన్నవారు దీనికి దూరంగా ఉండటమే మంచిది. లేదంటే రక్తంలో చక్కెర స్థాయిలు అదుపు తప్పుతాయి.

చెరుకు రసం తాగడం వల్ల కొందరిలో తల తిరగడం, నిద్రలేమి లేదా పొట్టలో గడబిడ వంటి సమస్యలు రావచ్చు. దీనికి ప్రధాన కారణం అందులో ఉండే 'పోలికోసనాల్' అనే పదార్థం. అలాగే రోడ్డు పక్కన తాగేటప్పుడు శుభ్రతను కూడా గమనించాలి. గ్లాసులు సరిగ్గా కడగకపోయినా, ఈగలు ముసిరే చోట తయారు చేసినా మనకు టైఫాయిడ్ లేదా కలరా వంటి జబ్బులు వచ్చే ప్రమాదం ఉంది. చెరుకు రసాన్ని తీసిన వెంటనే తాగేయాలి. అలా కాకుండా ఫ్రిజ్‌లో పెట్టినా లేదా కాసేపు బయట ఉంచినా అది ఆక్సీకరణం చెంది విషపూరితంగా మారుతుంది.

వేసవిలో శరీరాన్ని చల్లబరుచుకోవడానికి చెరుకు రసం మంచి ఎంపికే, కానీ అది పరిమితంగా ఉన్నప్పుడే. రోజుకు ఒక గ్లాసు తాగడం వల్ల పెద్దగా నష్టం ఉండదు. అయితే, మీకు ఇప్పటికే ఏదైనా ఆరోగ్య సమస్యలు ఉంటే మాత్రం డాక్టర్ సలహా తీసుకోవడం మర్చిపోవద్దు. దాహాన్ని తీర్చుకోవడానికి కేవలం జ్యూస్‌లపైనే ఆధారపడకుండా మంచినీళ్లు, కొబ్బరి నీళ్లు  మజ్జిగకు ఎక్కువ ప్రాధాన్యత ఇవ్వండి. ఆరోగ్యంగా ఉండండి, వేసవిని జాగ్రత్తగా ఎదుర్కోండి..