Hyderabad Transportation Updates: మెట్రోలో ఫోన్‌పే మ్యాజిక్.. సిగ్నల్ ప్రాబ్లమ్ ఉన్నా పేమెంట్ సక్సెస్, కొత్త కార్డు ఫీచర్లు చూడండి..!!

Hyderabad Transportation Updates: హైదరాబాద్‌ మెట్రోలో ప్రతిరోజూ ప్రయాణించే లక్షలాది మంది ప్రయాణికులకు ఇకపై టికెట్ కౌంటర్ల వద్ద వేచి ఉండే అవసరం ఉండదు. ప్రముఖ ఫిన్‌టెక్ సంస్థ 'ఫోన్‌పే' హైదరాబాద్ మెట్రో భాగస్వామ్యంతో 'రూపే ఆన్-ది-గో'  అనే సరికొత్త కామన్‌ మొబిలిటీ కార్డును మార్కెట్లోకి ప్రవేశపెట్టింది. సాధారణంగా మెట్రో స్టేషన్లలో యూపీఐ పేమెంట్స్ చేసే సమయంలో సిగ్నల్ అందక, లావాదేవీలు ఫెయిల్ అయ్యి ప్రయాణికులు ఇబ్బంది పడుతుంటారు. ఆ సమస్యకు ఈ కార్డు శాశ్వత పరిష్కారం చూపనుంది. ఇది పూర్తిగా ఆఫ్‌లైన్ పద్ధతిలో పని చేయడం దీని ప్రత్యేకత.

ఈ కార్డు పనితీరును గమనిస్తే.. ఇది 'నేషనల్ కామన్ మొబిలిటీ కార్డు'  నిబంధనల కింద రూపొందించబడింది. అంటే, కేవలం హైదరాబాద్ మెట్రోలోనే కాకుండా దేశవ్యాప్తంగా ఎన్‌సీఎంసీ సదుపాయం ఉన్న మెట్రోలు, బస్సులు, టోల్ ప్లాజాలు, పార్కింగ్ సెంటర్లలో కూడా దీనిని వాడుకోవచ్చు. ప్రయాణికులు టికెట్ కోసం లైన్లో నిలబడకుండా, కేవలం కార్డును ట్యాప్ చేయడం ద్వారా క్షణాల్లో చెల్లింపులు పూర్తి చేయవచ్చు. ఇంటర్నెట్ కనెక్షన్ లేకపోయినా సరే, కార్డులోని నిల్వ ఉన్న నగదు ద్వారా ఆఫ్‌లైన్ ట్రాన్సాక్షన్స్ జరిగిపోతాయి.

ఈ కార్డును పొందడం చాలా సులభం. హైదరాబాద్‌లోని అన్ని మెట్రో స్టేషన్ల టికెట్ కౌంటర్ల వద్ద ఈ కార్డులు అందుబాటులో ఉంటాయి. ప్రయాణికులు తమ ఫోన్ నంబర్‌కు వచ్చే ఓటీపీని ధ్రువీకరిస్తే చాలు, కౌంటర్ సిబ్బంది కార్డును జారీ చేస్తారు. ఈ కార్డు ఒక ప్రీపెయిడ్ వాలెట్ లాంటిది. ఇందులో వినియోగదారులు తమ ఫోన్‌పే యాప్ లేదా ఇతర బ్యాంక్ కార్డుల ద్వారా గరిష్ఠంగా రూ. 2,000 వరకు నగదును లోడ్ చేసుకోవచ్చు. ఒకేసారి గరిష్ఠంగా రూ. 500 వరకు ఆఫ్‌లైన్ చెల్లింపులు చేసే వీలును ఫోన్‌పే కల్పించింది.

ఈ సరికొత్త సాంకేతికత గురించి ఫోన్‌పే పేమెంట్స్ హెడ్ దీప్ అగర్వాల్ మాట్లాడుతూ.. ప్రయాణికులకు ఎక్కడా అడ్డంకులు లేని ప్రయాణ అనుభవాన్ని అందించడమే తమ లక్ష్యమని పేర్కొన్నారు. ప్రస్తుతం హైదరాబాద్‌లో ప్రారంభించినప్పటికీ, భవిష్యత్తులో దేశవ్యాప్తంగా మరిన్ని రవాణా సంస్థలతో దీనిని అనుసంధానిస్తామని ఆయన ధీమా వ్యక్తం చేశారు. కేవలం మెట్రో ప్రయాణమే కాకుండా, సాధారణ బస్సులు  ఇతర పబ్లిక్ ట్రాన్స్‌పోర్ట్ సేవలకు కూడా ఈ కార్డు ఒకే పాయింట్ చెల్లింపు సాధనంగా మారుతుందని కంపెనీ భావిస్తోంది.

భాగ్యనగర వాసులకు చిల్లర సమస్యల నుంచి, సర్వర్ డౌన్ సమస్యల నుంచి ఈ కార్డు ఉపశమనం కలిగించనుంది. ముఖ్యంగా రద్దీ సమయాల్లో ఆఫీసులకు వెళ్లేవారికి, కాలేజీ విద్యార్థులకు ఇది ఎంతో సమయాన్ని ఆదా చేస్తుంది. హైదరాబాద్‌ మెట్రో తన సేవలను మరింత డిజిటలైజ్ చేస్తున్న క్రమంలో, ఫోన్‌పే తీసుకొచ్చిన ఈ 'ఆన్-ది-గో' కార్డు ఒక విప్లవాత్మక మార్పుగా చెప్పవచ్చు. ఇప్పటికే స్మార్ట్ కార్డులు ఉన్నప్పటికీ, ఆఫ్‌లైన్ ట్యాప్-అండ్-పే ఫీచర్ ఉండటం వల్ల ఈ కార్డు వైపు ప్రయాణికులు మొగ్గు చూపే అవకాశం ఉంది.