Muntha Masala Recipe: గరం గరం "ముంత మసాలా" - ఇంట్లోనే రోడ్ సైడ్ టేస్ట్ పక్కా!

Muntha Masala Recipe: సాయంత్రం వేళ ఆఫీసు నుంచి వస్తున్నప్పుడో లేదా సరదాగా బయటకు వెళ్ళినప్పుడో రోడ్డు పక్కన వినిపించే ఆ గరిటె చప్పుడు వింటే చాలు.. ఎవరికైనా నోరూరాల్సిందే. అదేనండి, మనందరికీ ఇష్టమైన ముంత మసాలా. దీనినే కొన్ని ప్రాంతాల్లో పిడత కింద పప్పు లేదా బొరుగుల మసాలా అని కూడా పిలుస్తారు. వర్షం పడుతున్నప్పుడు లేదా చలిగా ఉన్నప్పుడు ఆ పుల్లపుల్లని, కారకారపు ముంత మసాలా తింటే వచ్చే కిక్కే వేరు. అయితే చాలామంది ఇంట్లో చేసుకుంటే బయట దొరికే ఆ రుచి రావడం లేదని అంటుంటారు. కానీ కొన్ని చిన్న చిన్న చిట్కాలు పాటిస్తే, అచ్చం బండి మీద అమ్మే స్టైల్‌లోనే మనం ఇంట్లో కూడా అద్భుతంగా తయారు చేసుకోవచ్చు.

ముంత మసాలా తయారీలో ప్రధానంగా కావాల్సింది కరకరలాడే మరమరాలు. ముందుగా స్టవ్ వెలిగించి ఒక కడాయిలో రెండు కప్పుల మరమరాలను కొద్దిగా వేడి చేయాలి. ఇలా చేయడం వల్ల అవి మరింత క్రిస్పీగా తయారవుతాయి. ఆ తర్వాత అదే కడాయిలో కొంచెం నూనె వేసి, ఒక కప్పు కార్న్ ఫ్లేక్స్   ఒక కప్పు పల్లీలను దోరగా వేయించి పక్కన పెట్టుకోవాలి. ఈ పల్లీలు, కార్న్ ఫ్లేక్స్ అనేవి ముంత మసాలాకు మంచి క్రంచీ ఫీల్‌ను ఇస్తాయి. కొత్తగా వంట చేసేవారు కూడా ఈ పద్ధతిని చాలా ఈజీగా ఫాలో అయిపోవచ్చు.

అసలైన మసాలా తయారీకి వెళ్లే ముందు.. ఉల్లిపాయలు, పచ్చిమిర్చి, టమోటాలను  సన్నగా తరిగి పెట్టుకోవాలి. ఇప్పుడు ఒక పెద్ద గిన్నె తీసుకుని అందులోకి వేయించిన మరమరాలు, కార్న్ ఫ్లేక్స్, పల్లీలను వేయాలి. దీనికి తరిగిన ఉల్లిపాయ ముక్కలు, టమోటా ముక్కలు, పచ్చిమిర్చి తరుగును జోడించాలి. ఇందులో అర టీ స్పూన్ జీలకర్ర పొడి, పావు టీ స్పూన్ ధనియాల పొడి, ఒకటిన్నర టేబుల్ స్పూన్ కారం, రుచికి సరిపడా ఉప్పు వేయాలి. ఇక్కడ ముఖ్యమైన విషయం ఏమిటంటే, ఈ పదార్థాలన్నీ ఒకదానికొకటి బాగా పట్టేలా చేత్తో గట్టిగా కలపాలి. అప్పుడే ఉల్లిపాయల్లోని తేమ మరమరాలకు తగిలి ఆ టేస్ట్ మారుతుంది.

ముంత మసాలాకు అసలైన రుచిని ఇచ్చేది అందులో వేసే చాట్ మసాలా  నిమ్మరసం. పైన చెప్పిన మిశ్రమంలో అర టేబుల్ స్పూన్ చాట్ మసాలా చల్లి, చివరగా ఒక చెక్క నిమ్మరసాన్ని పిండాలి. దీనివల్ల ఆ కారానికి పులుపు తోడై నోటికి మంచి రుచిని ఇస్తుంది. చివరగా సన్నగా తరిగిన కొత్తిమీరను పైన చల్లుకుంటే వేడివేడి ముంత మసాలా సిద్ధం. బండి మీద అమ్మే వ్యక్తి గరిటెతో ఎలాగైతే వేగంగా కలుపుతాడో, మనం కూడా ఇంట్లో వీలైనంత బాగా మిక్స్ చేస్తే ఆ ఫ్లేవర్స్ అన్నీ చక్కగా కలిసిపోతాయి.

పిల్లల నుంచి పెద్దల వరకు అందరూ ఇష్టపడే ఈ స్నాక్ కేవలం ఐదు నుంచి పది నిమిషాల్లోనే రెడీ అయిపోతుంది. బయట ఫుడ్ తినడం వల్ల వచ్చే ఆరోగ్య సమస్యలు లేకుండా, శుభ్రంగా మన కళ్ల ముందే ఇంట్లో ఇలా చేసి పెడితే పిల్లలు కూడా ఫుల్ ఖుష్ అయిపోతారు. సాయంత్రం పూట వేడి టీ లేదా కాఫీ తాగుతూ ఈ ముంత మసాలాను ఎంజాయ్ చేస్తే ఆ మజాయే వేరు. ఇంకెందుకు ఆలస్యం, ఈ రోజే మీరు కూడా ఈ స్టైల్‌లో ట్రై చేసి చూడండి మీకు ఖచ్చితంగా రోడ్ సైడ్ టేస్ట్ గుర్తిస్తుంది.