Summer Power Saving Tips: ఏసీ వాడుతున్నారా? నెలకు వేల రూపాయల కరెంటు బిల్లు ఆదా చేసే సింపుల్ ట్రిక్స్!

Summer Power Saving Tips: వేసవి కాలం పూర్తిగా రాకముందే భానుడు తన ప్రతాపాన్ని చూపిస్తున్నాడు. రోజురోజుకూ పెరుగుతున్న ఉష్ణోగ్రతల వల్ల ఇళ్లలో ఫ్యాన్లు, ఏసీలు, కూలర్లు గిర్రున తిరగడం మొదలయ్యాయి. అయితే, చల్లదనం మాట దేవుడెరుగు కానీ నెల తిరిగేసరికి వచ్చే కరెంటు బిల్లును చూసి సామాన్యుల గుండెల్లో రైళ్లు పరిగెడుతున్నాయి. వాడుక పెరిగే కొద్దీ బిల్లు కూడా తడిసి మోపెడవుతోంది. ఇలాంటి సమయంలో కొన్ని చిన్నపాటి జాగ్రత్తలు పాటిస్తే, జేబుకు చిల్లు పడకుండా జాగ్రత్త పడొచ్చని నిపుణులు సూచిస్తున్నారు.

ముందుగా మన ఇంట్లోని పాతకాలపు బల్బులను మార్చడం వల్ల పెద్ద మార్పు వస్తుంది. చాలామంది ఇప్పటికీ పాత ట్యూబ్ లైట్లు లేదా పసుపు రంగు బల్బులను వాడుతుంటారు. వాటి స్థానంలో ఎల్ఈడీ బల్బులను అమర్చుకుంటే సుమారు 80 శాతం వరకు విద్యుత్ ఆదా అవుతుంది. ఇవి తక్కువ కరెంటును వాడుకోవడమే కాకుండా, ఇంట్లో వేడిని కూడా తగ్గించి వెలుతురును ఎక్కువగా ఇస్తాయి. పగటిపూట కిటికీలు తెరిచి ఉంచితే సహజమైన గాలి, వెలుతురు వస్తాయి కాబట్టి, లైట్లు వేయాల్సిన అవసరం ఉండదు.

ఇక ఏసీ వాడే వారు కొన్ని ముఖ్యమైన విషయాలు గుర్తుంచుకోవాలి. ఏసీని ఎప్పుడూ 16 లేదా 18 డిగ్రీల వద్ద పెట్టకూడదు. బ్యూరో ఆఫ్ ఎనర్జీ ఎఫిషియన్సీ  ప్రకారం, ఏసీని 24 నుండి 26 డిగ్రీల మధ్య ఉంచడం వల్ల గది చల్లగా ఉండటమే కాకుండా కరెంటు బిల్లు భారీగా తగ్గుతుంది. అలాగే, ఏసీ ఫిల్టర్లను నెలకు ఒకసారి శుభ్రం చేయడం మర్చిపోవద్దు. ఫిల్టర్లలో దుమ్ము పేరుకుపోతే ఏసీ మీద ఒత్తిడి పెరిగి కరెంటు ఎక్కువగా లాగుతుంది. 

కిటికీలు, తలుపులు సరిగ్గా మూసి ఉంచడం వల్ల చల్లదనం బయటకు పోకుండా ఉంటుంది. మనం చేసే మరో పెద్ద తప్పు ఏమిటంటే.. ఫోన్ ఛార్జింగ్ అయిపోగానే ప్లగ్ తీయకుండా స్విచ్ ఆన్ లోనే ఉంచడం. టీవీ, కంప్యూటర్, ఓవెన్ వంటి పరికరాలను రిమోట్ తో ఆపేసినా, మెయిన్ స్విచ్ ఆన్ లో ఉంటే అవి కొంత విద్యుత్తును వాడుకుంటూనే ఉంటాయి. దీనినే 'ఫాంటమ్ పవర్' అంటారు. పని పూర్తయిన వెంటనే ప్లగ్ నుంచి వైరును తీసేయడం లేదా స్విచ్ ఆపేయడం అలవాటు చేసుకోవాలి. ఇలా చేయడం వల్ల చిన్న మొత్తంలోనే అయినా నెల మొత్తం మీద గణనీయమైన పొదుపు కనిపిస్తుంది.

 కొత్తగా ఏదైనా ఎలక్ట్రానిక్ వస్తువు కొనేటప్పుడు దానిపై ఉన్న 'స్టార్ రేటింగ్'ను తప్పకుండా గమనించాలి. 5-స్టార్ రేటింగ్ ఉన్న పరికరాలు కొంచెం ధర ఎక్కువైనా, అవి వాడే కరెంటు చాలా తక్కువగా ఉంటుంది. ఫ్రిజ్ ను గోడకు మరీ ఆనించి పెట్టకుండా కొంచెం గ్యాప్ ఇవ్వడం వల్ల అది వేడిని త్వరగా బయటకు పంపి సమర్థవంతంగా పనిచేస్తుంది. ఈ చిన్న చిన్న మార్పులు మన దైనందిన జీవితంలో భాగం చేసుకుంటే, ఎండకాలంలో కూడా కరెంటు బిల్లు భయం లేకుండా హాయిగా ఉండొచ్చు.