దేశవ్యాప్తంగా బంగారం ధరలు రోజురోజుకీ ఆకాశాన్ని తాకుతున్న నేపథ్యంలో సామాన్య ప్రజలకు ఊరటనిచ్చే శుభవార్త ఒకటి వెలుగులోకి వచ్చింది. ఆంధ్రప్రదేశ్లోని కర్నూలు జిల్లాలో బంగారు గనుల తవ్వకాలు అధికారికంగా ప్రారంభమయ్యాయి. దేశీయంగా బంగారం ఉత్పత్తి పెరిగితే, దిగుమతులపై ఆధారపడటం తగ్గడంతో పాటు భవిష్యత్తులో పసిడి ధరలు నియంత్రణలోకి వచ్చే అవకాశాలు ఉంటాయని నిపుణులు భావిస్తున్నారు. ఈ పరిణామం దేశ ఆర్థిక వ్యవస్థకే కాకుండా, బంగారం కొనుగోలు చేసే సామాన్యులకూ ఆశాజనకంగా మారనుంది.
కర్నూలు జిల్లా తుగ్గలి మండలం జొన్నగిరి ప్రాంతంలో ఈ బంగారు గనుల తవ్వకాలను ‘జియో మైసూర్’ అనే ప్రైవేట్ సంస్థ చేపట్టింది. జొన్నగిరి, పగిడిరాయి గ్రామాల పరిసర ప్రాంతాల్లో బంగారు నిక్షేపాలు ఉన్నట్లు జియోలాజికల్ సర్వే ఆఫ్ ఇండియా (జీఎస్ఐ) కొన్నేళ్ల క్రితమే నిర్ధారించింది. ఈ నివేదికల ఆధారంగా ప్రభుత్వం సుమారు 1,477 ఎకరాల విస్తీర్ణంలో గనుల తవ్వకాలకు అనుమతులు మంజూరు చేసింది. ప్రస్తుతం ఈ ప్రాంతంలో యంత్రాలు, సాంకేతిక సిబ్బంది సహకారంతో పనులు వేగంగా కొనసాగుతున్నాయి.
అధికారుల అంచనాల ప్రకారం, ఇక్కడ ఒక టన్ను మట్టిని శుద్ధి చేస్తే 1.5 నుంచి 2 గ్రాముల వరకు బంగారం లభించే అవకాశం ఉంది. ఇందుకోసం సుమారు రూ. 5 వేల వరకు ఖర్చవుతుందని చెబుతున్నారు. అలాగే వెయ్యి టన్నుల ముడి ఖనిజం నుంచి సుమారు 700 గ్రాముల బంగారాన్ని వెలికితీయడం సాధ్యమవుతుందని కంపెనీ ప్రతినిధులు వెల్లడించారు. ప్రస్తుతం రోజుకు సగటున 1,000 టన్నుల ఖనిజాన్ని శుద్ధి చేసేలా ఆధునిక యంత్రాలను వినియోగిస్తున్నారు. ఈ విధానం విజయవంతమైతే ఉత్పత్తి సామర్థ్యం మరింత పెరిగే అవకాశం ఉందని అంచనా వేస్తున్నారు.
ఈ ప్రాజెక్టులో భాగంగా రానున్న పదేళ్లలో సుమారు 6 వేల టన్నుల బంగారం ఉత్పత్తి చేయాలని జియో మైసూర్ సంస్థ లక్ష్యంగా పెట్టుకుంది. ఈ ప్రాంతంలో దాదాపు కోటి టన్నుల ఖనిజ నిల్వలు ఉన్నట్లు అంచనా. ముఖ్యంగా తూర్పు బ్లాక్లో భూమికి సుమారు 180 మీటర్ల లోతున 6.8 టన్నుల బంగారు ఖనిజం ఉన్నట్లు గుర్తించారు. ఈ గనుల అభివృద్ధితో స్థానికంగా ఉపాధి అవకాశాలు పెరగడమే కాకుండా, రాష్ట్రానికి ఆదాయం కూడా గణనీయంగా పెరిగే అవకాశాలు ఉన్నాయి. మొత్తంగా, కర్నూలు బంగారు గనులు భవిష్యత్తులో రాష్ట్రానికే కాకుండా దేశానికి కూడా కీలకంగా మారనున్నాయని విశ్లేషకులు అభిప్రాయపడుతున్నారు.
