క్యాబేజీలో (Cabbage) ఉండే టేప్వార్మ్ (బద్దెపురుగు) (Worm) కారణంగా ఒక విద్యార్థిని ప్రాణాలు కోల్పోయిన ఘటన దేశవ్యాప్తంగా ఆందోళన కలిగిస్తోంది. సాధారణంగా మనం రోజూ వండుకుని తినే క్యాబేజీ, కాలీఫ్లవర్, పాలకూర, వంకాయ వంటి కూరగాయల్లో ఇలాంటి పరాన్నజీవుల గుడ్లు ఉండే అవకాశముందని వైద్య నిపుణులు హెచ్చరిస్తున్నారు. ముఖ్యంగా కూరగాయలను సరిగ్గా కడగకుండా, పూర్తిగా ఉడికించకుండా తినడం వల్ల ఈ టేప్వార్మ్ గుడ్లు మన శరీరంలోకి ప్రవేశిస్తాయి. ఇవి ఆహార మార్గం ద్వారా రక్తంలో కలసి, చివరికి మెదడుకు చేరి బ్రెయిన్ ఇన్ఫెక్షన్ (న్యూరోసిస్టిసర్కోసిస్ వంటి సమస్యలు) కలిగించగలవు. ఢిల్లీలో చోటుచేసుకున్న ఘటనలో కూడా ఇదే కారణంగా ఒక విద్యార్థిని ఫిట్స్, తీవ్రమైన తలనొప్పితో ఆస్పత్రిలో చేరి, చివరికి ప్రాణాలు కోల్పోయినట్లు సమాచారం.
వైద్యుల మాటల్లో చెప్పాలంటే, టేప్వార్మ్ గుడ్లు కంటికి కనిపించవు. పొలాల్లో లేదా మార్కెట్ల్లో కూరగాయలపై మట్టితో పాటు ఈ గుడ్లు అంటుకుని ఉంటాయి. సరైన శుభ్రత పాటించకపోతే అవి నేరుగా మన శరీరంలోకి చేరుతాయి. ముఖ్యంగా ఆకుకూరలు, పొరలుగా ఉండే క్యాబేజీ వంటి కూరగాయల్లో ఈ ప్రమాదం ఎక్కువగా ఉంటుందని నిపుణులు చెబుతున్నారు. ఒకసారి ఇవి మెదడుకు చేరితే, ఫిట్స్, మూర్ఛ, చూపు సమస్యలు, తీవ్రమైన తలనొప్పి వంటి లక్షణాలు కనిపిస్తాయి. కొన్ని సందర్భాల్లో చికిత్స ఆలస్యం అయితే ప్రాణాంతకంగా కూడా మారవచ్చు.
ఈ నేపథ్యంలో వైద్యులు ప్రజలకు కీలక సూచనలు చేస్తున్నారు. కూరగాయలను వండే ముందు తప్పనిసరిగా ఉప్పు నీటిలో కనీసం 10–15 నిమిషాలు నానబెట్టి, తర్వాత శుభ్రమైన నీటితో పలుమార్లు కడగాలని సూచిస్తున్నారు. క్యాబేజీ వంటి కూరగాయలైతే పొరలుగా విడదీసి ఒక్కో పొరను జాగ్రత్తగా కడగడం చాలా అవసరం. అలాగే పూర్తిగా ఉడికించి మాత్రమే తినాలి. అర ఉడికిన కూరలు లేదా సలాడ్ల రూపంలో తినేటప్పుడు మరింత జాగ్రత్త అవసరమని చెబుతున్నారు.
తక్కువ రోగనిరోధక శక్తి ఉన్నవారు, చిన్న పిల్లలు, వృద్ధులు ఈ విషయంలో మరింత అప్రమత్తంగా ఉండాలని నిపుణులు సూచిస్తున్నారు. చిన్న నిర్లక్ష్యం కూడా పెద్ద ప్రమాదంగా మారే అవకాశం ఉందని హెచ్చరిస్తున్నారు. బయట హోటళ్లలో లేదా రోడ్డుపక్క ఫుడ్ స్టాల్స్లో సరిగా కడగని కూరగాయలతో చేసిన ఆహారం తీసుకోవడం కూడా ప్రమాదకరమే. కాబట్టి ఇంట్లోనే శుభ్రంగా కడిగి, బాగా ఉడికించిన ఆహారాన్ని తీసుకోవడం ఉత్తమమని వైద్యులు స్పష్టం చేస్తున్నారు. క్యాబేజీ తింటున్నారా అంటే భయపడాల్సిన అవసరం లేదు కానీ, సరైన శుభ్రత, జాగ్రత్తలు పాటించకపోతే ప్రాణాంతక పరిస్థితులు ఎదురయ్యే అవకాశం ఉందన్న విషయాన్ని ప్రతి ఒక్కరూ గుర్తుంచుకోవాలని నిపుణులు సూచిస్తున్నారు.
