నాన్-వెజ్ ప్రియులకి, ముఖ్యంగా మటన్ అంటే ప్రాణం ఇచ్చే వారికి 'పాయా' పేరు వింటేనే నోరూరుతుంది. చలికాలంలో వేడివేడి పాయా సూప్ తాగుతుంటే ఆ మజాయే వేరు. అయితే, పాయా అంటే కేవలం రుచి మాత్రమే కాదు, ఇది ఆరోగ్యానికి ఒక పెద్ద నిధి అని డైటీషియన్లు చెబుతున్నారు. మేక లేదా గొర్రె కాళ్లతో చేసే ఈ సూప్, శరీరంలోని అనేక సమస్యలకు పవర్ఫుల్ మందులా పనిచేస్తుంది.
ముఖ్యంగా ఎముకలు బలహీనంగా ఉన్నవారికి, శస్త్రచికిత్సల నుండి కోలుకుంటున్న వారికి పాయా ఒక సంజీవని లాంటిది. పాయా (Mutton Paya Soup) వల్ల కలిగే ఆరోగ్య ప్రయోజనాలు మరియు దానిని ఇంట్లోనే ఎలా తయారు చేసుకోవాలో వివరంగా చూద్దాం..
పాయాలో ఉండే పోషక విలువలు ఏమిటిఅంటే.?
పాయా సూప్ను ఎముకల రసం (Bone Broth) అని కూడా పిలుస్తారు. ఇందులో శరీరానికి అవసరమైన అత్యంత ముఖ్యమైన పోషకాలు ఉన్నాయి.
కొల్లాజెన్ (Collagen): ఇది చర్మం, కీళ్లు మరియు ఎముకల ఆరోగ్యానికి చాలా ముఖ్యం.
ఖనిజాలు: కాల్షియం, ఫాస్పరస్ మరియు మెగ్నీషియం ఇందులో సమృద్ధిగా ఉంటాయి.
ప్రోటీన్లు: శరీర కణజాలం మరమ్మతుకు అవసరమైన ప్రోటీన్లు ఇందులో దొరుకుతాయి.
అమైనో యాసిడ్స్: జీర్ణక్రియను మెరుగుపరిచే గ్లైసిన్, గ్లుటామైన్ వంటివి ఇందులో ఉంటాయి.
పాయా తినడం వల్ల కలిగే లాభాలు & తయారీ విధానం.?
పాయా (ఎముకల రసం) కీళ్లు, ఎముకల (bone Strength) ఆరోగ్యానికి మంచిది.
అలాగే రోగనిరోధక శక్తిని పెంచడానికి సహాయపడుతుంది.
ఇంకా చర్మ సౌందర్యాన్ని మెరుగుపరచడానికి పాయా అద్భుతంగా పనిచేస్తుంది.
దీనిని రెగ్యులర్ గా తీసుకుంటే జీర్ణక్రియ మెరుగుపడటంతోపాటు.. బలోపేతం అవుతుంది..
ఇంకా బలహీనత నుండి త్వరగా కోలుకోవడానికి పాయా సహాయపడుతుంది.
ఈ సూప్ తయారీకి, ముందుగా మేక కాళ్లను పసుపు, ఉప్పుతో శుభ్రం చేసి కడగాలి. ప్రెషర్ కుక్కర్లో నూనె వేసి, జీలకర్ర, మిరియాలు, లవంగాలు, ఇలాచి, దాల్చిన చెక్క, బిర్యానీ ఆకు వేసి వేయించాలి. దంచిన వెల్లుల్లి, అల్లం ముక్క, ఉల్లిపాయలు వేసి వేగిన తర్వాత మేక కాళ్లను సిమ్ లో ఐదు నిమిషాలు వేయించాలి. తగినంత ఉప్పు, నీరు (1 లీటర్ పైగా) పోసి 8 విజిల్స్ వచ్చే వరకు ఉడికించాలి. చివరిగా బాదం పొడి (లేదా జొన్న పిండి), దంచిన పచ్చిమిర్చి, కొత్తిమీర వేసి ఐదు నిమిషాలు ఉడికిస్తే రుచికరమైన, ఆరోగ్యకరమైన పాయ సూప్ సిద్ధం అవుతుంది. అయితే.. దాని పరిమాణాన్ని బట్టి పదార్థాలను జోడించుకోవాలి..
మటన్ వంట లాగానే దీనిని చేసుకోవచ్చు.. కానీ, వండే విధానం వేరు.. ఈ సూప్ పెద్దలతో పాటు చిన్నపిల్లలకు కూడా చాలా మంచిది. మీరు కూడా ఈ ఆరోగ్యకరమైన సూప్ను మీ ఇంట్లో ప్రయత్నించి, దాని ప్రయోజనాలను పొందండి. ఏమైనా సమస్యలుంటే తీసుకునే ముందు వైద్యులను సంప్రదించడం మంచిది.
