నగరంలో నేడు భారీ నుండి అతి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం ముందస్తు హెచ్చరిక జారీ చేసింది. వర్షాల తీవ్రత ఎక్కువగా ఉండటంతో లోతట్టు ప్రాంతాలు జలమయ్యే అవకాశముందని, ట్రాఫిక్కు అంతరాయం ఏర్పడే అవకాశం ఉందని అధికారులు తెలిపారు.
ముఖ్యంగా సాయంత్రం వర్షం కురిసిన పక్షంలో అమీర్పేట్, బేగంపేట్, రసూల్పురా, మాదాపూర్, గచ్చిబౌలి, రాయదుర్గం, లింగంపల్లి, చందానగర్, మియాపూర్, శిల్పారామం, నెక్టార్ గార్డెన్, మాదాపూర్ సీవోడీ, ఐకియా, గచ్చిబౌలి బయోడైవర్సిటీ, కేపీహెచ్బీ పరిసరాల్లో తీవ్ర ట్రాఫిక్ సమస్యలు తలెత్తే అవకాశముందని పేర్కొన్నారు. వాహనదారులు ముందస్తు జాగ్రత్తలు తీసుకుని ప్రయాణం చేయాలని సూచించారు.
నిన్నటి (శుక్రవారం) వర్షంతో హైదరాబాద్ నగరం పలు ప్రాంతాలు నీట మునిగాయి. లోతట్టు ప్రాంతాలు చిన్న నదులను తలపించేలా మారాయి. మణికొండ మున్సిపాలిటీ పరిధిలో అనేక కాలనీలు నీటిలో మునిగిపోయాయి. కొన్ని ఇళ్ల సెల్లార్లలోకి కూడా భారీగా వరద నీరు చేరింది. పుప్పాలగూడలో 35 అడుగుల ఎత్తైన రక్షణ గోడ కూలిపోయింది.
2008లో శివాలయానికి రక్షణగా నిర్మించిన ఈ గోడ వర్షాల ధాటికి ధ్వంసమైంది. అదృష్టవశాత్తు, గోడ కూలిన సమయంలో ఎవరూ లేకపోవడంతో ప్రాణనష్టం తప్పింది. వరద బీభత్సంలో మూడు ఇళ్లు కొట్టుకుపోయాయి.
హైదరాబాద్ వాతావరణ కేంద్రం ప్రకారం, తెలంగాణ రాష్ట్రవ్యాప్తంగా మరో ఐదు రోజుల పాటు మోస్తరు నుండి భారీ వర్షాలు కురిసే అవకాశం ఉంది. నల్గొండ, మహబూబ్నగర్, నాగర్కర్నూల్, వనపర్తి, నారాయణపేట్, జోగులాంబ గద్వాల్ జిల్లాల్లో ఆగస్టు 9, 10 తేదీల్లో భారీ వర్షాలు కురిసే అవకాశం ఉందని, 13వ తేదీన రాష్ట్రంలోని అన్ని జిల్లాల్లో వర్షాలు మోస్తరు నుండి భారీ స్థాయిలో పడతాయని తెలిపింది. ఈ జిల్లాలకు ఆరెంజ్ అలర్ట్ ప్రకటించింది.
