రష్యా నుంచి చమురు దిగుమతులపై భారత్పై అమెరికా అధ్యక్షుడు డొనాల్డ్ ట్రంప్ సుంకాలు విధించిన సున్నితమైన సమయంలో, ప్రధాని నరేంద్ర మోదీ రష్యా అధ్యక్షుడు వ్లాదిమిర్ పుతిన్తో ఫోన్లో మాట్లాడారు. ఈ పరిణామం అంతర్జాతీయ రాజకీయ వర్గాల్లో ఆసక్తికర చర్చకు దారితీసింది. ఈ ఫోన్ సంభాషణలో పలు కీలక వ్యూహాత్మక అంశాలు చర్చకు వచ్చినట్లు సమాచారం.
సంభాషణలో భాగంగా, ఉక్రెయిన్లో కొనసాగుతున్న తాజా పరిణామాలను పుతిన్ ప్రధాని మోదీకి వివరించారు. ఈ సందర్భంగా, ఉక్రెయిన్ సంక్షోభానికి హింస కాదు, శాంతియుత చర్చల ద్వారానే పరిష్కారం సాధ్యమని భారత్ తన స్థిరమైన వైఖరిని మరోసారి స్పష్టంగా తెలియజేసింది. వివాదాల పరిష్కారానికి సంభాషణే సరైన మార్గమని భారత్ ఎప్పటినుంచో నొక్కి చెబుతున్న విషయం తెలిసిందే.
ఇక, భారత్-రష్యాల మధ్య ఉన్న ప్రత్యేక వ్యూహాత్మక భాగస్వామ్యాన్ని మరింత బలపరిచే దిశగా చర్యలు తీసుకోవాలని ఇరువురు నేతలు ఏకాభిప్రాయానికి వచ్చారు. ద్వైపాక్షిక సంబంధాలను విస్తరించే కొత్త అవకాశాలపై కూడా చర్చ సాగింది. ఈ క్రమంలో, ఈ సంవత్సరం చివర్లో జరగనున్న 23వ భారత్-రష్యా వార్షిక సదస్సులో పాల్గొనాల్సిందిగా అధ్యక్షుడు పుతిన్ను ప్రధాని మోదీ ఆహ్వానించారు.
