ఇప్పటికే అనేక జాతీయ, అంతర్జాతీయ పురస్కారాలను సొంతం చేసుకున్న విశాఖపట్నం పోర్టు అథారిటీ విజయపథంలో మరో గౌరవాన్ని చేర్చుకుంది. కేంద్ర నౌకాశ్రయ, జలమార్గాల మంత్రిత్వశాఖ నిర్వహించిన స్వచ్ఛ పకడా అవార్డులు–2024లో విశాఖ పోర్టు దేశవ్యాప్తంగా మొదటి స్థానాన్ని దక్కించుకుంది. ఈ అవార్డులు నౌకాశ్రయాల్లో పరిశుభ్రత, వ్యర్థ నిర్వహణ, పర్యావరణ హిత చర్యలు, హరితపరిశుభ్రత ప్రమాణాల ఆధారంగా ఎంపిక చేస్తారు.
పోర్టు పరిసరాల్లో ప్లాస్టిక్‌ రహిత విధానాన్ని కచ్చితంగా అమలు చేయడం, వ్యర్థ జల శుద్ధి ప్లాంట్ల ద్వారా మురుగునీటిని శుద్ధి చేసి పునర్వినియోగం చేయడం, సౌరశక్తి వినియోగాన్ని పెంపొందించడం, హరిత కవచం విస్తరణ, పరిశుభ్రతపై క్రమం తప్పకుండా తనిఖీలు, కార్మికులు–సిబ్బందికి అవగాహన కార్యక్రమాలు నిర్వహించడం వంటి పలు కార్యక్రమాల ఫలితంగా ఈ ప్రతిష్టాత్మక గుర్తింపు లభించింది.
దీనిపై ఛైర్మన్ అంగముత్తు హర్షం వ్యక్తం చేశారు. “పోర్టు కార్యకలాపాలతో పాటు పర్యావరణ పరిరక్షణ, పరిశుభ్రత పరంగా కూడా దేశంలోనే మోడల్ పోర్టుగా నిలిచినందుకు ఇది నిదర్శనం. ఈ గౌరవం పోర్టు సిబ్బంది, కార్మికులు, స్థానికుల అందరి కృషికి ఫలితం” అని అన్నారు.
విశాఖ పోర్టు గతంలో కూడా పలు కేటగిరీల్లో జాతీయ అవార్డులు గెలుచుకున్న విషయం తెలిసిందే. తాజా స్వచ్ఛ పకడా గుర్తింపు పోర్టు ప్రతిష్టను మరింత ఎత్తుకు తీసుకెళ్లిందని అధికారులు పేర్కొన్నారు.
