Forgery Case: ఇంటర్ కాలేజీల ఫోర్జరీ స్కామ్‌లో సంచలనం... అధికారుల సంతకాలతోనే ఆటలా?

Forgery Case:  హైదరాబాద్‌లోని ప్రైవేట్ ఇంటర్మీడియట్ కళాశాలల నకిలీ ఎన్‌ఓసీ (అభ్యంతర లేఖ) కుంభకోణంలో రోజుకో కొత్త విస్తుపోయే నిజం వెలుగులోకి వస్తోంది. ఇంటర్మీడియట్ బోర్డు నుంచి గుర్తింపు (అఫిలియేషన్) పొందేందుకు కొన్ని ప్రైవేట్ కాలేజీలు అక్రమాలకు తెరలేపాయి. ఇటీవల 'హైడ్రా' (HYDRAA) కమిషనర్ రంగనాథ్ సంతకాలను ఫోర్జరీ చేసిన ఉదంతం తీవ్ర కలకలం రేపిన సంగతి తెలిసిందే. కాగా, అదే బాటలో మరికొన్ని ప్రైవేట్ జూనియర్ కాలేజీలు అగ్నిమాపక శాఖ (ఫైర్ డిపార్ట్‌మెంట్) మాజీ డీజీ నాగిరెడ్డి సంతకాలను కూడా ఫోర్జరీ చేసినట్లు అధికారులు గుర్తించారు.

పోస్టులో లేని అధికారి పేరుతో ఫోర్జరీ: ప్రస్తుతం టీజీఎస్‌ఆర్టీసీ (TGSRTC) మేనేజింగ్ డైరెక్టర్‌గా పనిచేస్తున్న నాగిరెడ్డి, గతంలో అగ్నిమాపక శాఖ డీజీగా సేవలు అందించారు. ఆయన స్థానంలో ఇతర అధికారులు బాధ్యతలు చేపట్టినప్పటికీ, కొన్ని కాలేజీ యాజమాన్యాలు పాత డీజీ నాగిరెడ్డి పేరుతోనే నకిలీ ఫైర్ ఎన్‌ఓసీ పత్రాలను సృష్టించాయి. నాగిరెడ్డి ప్రస్తుతం ఆ శాఖలో లేకపోయినా, ఆయన సంతకాలతో సర్టిఫికెట్లు ఇంటర్ బోర్డుకు అందడంపై అనుమానం వచ్చిన అధికారులు సమగ్ర విచారణ చేపట్టారు. దీంతో ఇది ముమ్మాటికీ ఫోర్జరీయేనని తేలింది.

8 ప్రైవేట్ కాలేజీల అక్రమాలు రట్టు: అగ్నిమాపక శాఖ జరిపిన అంతర్గత విచారణలో మొత్తం 8 ప్రైవేటు జూనియర్ కాలేజీలు మాజీ డీజీ నాగిరెడ్డి పేరుతో ఫోర్జరీ సంతకాలు చేసి దొంగ ఎన్‌ఓసీలు తయారు చేసినట్లు అధికారులు నిర్ధారించారు. భవనాల అగ్నిప్రమాద భద్రత నియమాలు పాటించకుండా, అగ్నిమాపక శాఖ అనుమతులు లేకుండానే నామమాత్రపు నకిలీ పత్రాలతో ఇంటర్ బోర్డును బురిడీ కొట్టించేందుకు కాలేజీ యాజమాన్యాలు ప్రయత్నించాయి.

చట్టపరమైన చర్యలకు సిద్ధం: ఐపీఎస్ అధికారుల సంతకాలనే ఫోర్జరీ చేస్తూ విద్యార్థుల జీవితాలతో, భద్రతతో చెలగాటమాడుతున్న కాలేజీ యాజమాన్యాలపై కఠిన చర్యలు తీసుకునేందుకు అధికారులు సిద్ధమవుతున్నారు. ఈ కుంభకోణంలో ప్రమేయం ఉన్న 8 కాలేజీల గుర్తింపును రద్దు చేయడంతో పాటు వారిపై క్రిమినల్ కేసులు నమోదు చేసేందుకు చర్యలు వేగవంతం చేశారు. ఈ ఫోర్జరీ దందా వెనుక ఇంకా ఎంతమంది హస్తం ఉందనే కోణంలో పోలీసులు, ఇంటర్ బోర్డు అధికారులు దర్యాప్తును ముమ్మరం చేశారు.