Chandra Grahanam March 3 2026: మార్చి 3వ తేదీ, మంగళవారం (నేడు) ఆకాశంలో ఒక అద్భుత దృశ్యం ఆవిష్కృతం కానుంది. ఫాల్గుణ శుద్ధ పౌర్ణమి రోజున 'సంపూర్ణ అపసవ్య చంద్ర గ్రహణం' ఏర్పడబోతోంది. ఈ గ్రహణం భారతదేశంలో సూర్యాస్తమయ సమయంలో కనిపిస్తుంది కాబట్టి, గ్రహణ నియమాలను తప్పనిసరిగా పాటించాలని జ్యోతిష్య పండితులు సూచిస్తున్నారు. ముఖ్యంగా గర్భిణీ స్త్రీలు ఈ సమయంలో చాలా అప్రమత్తంగా ఉండాలి.
గ్రహణ సమయాలు ఇవే..
ఈ గ్రహణం మధ్యాహ్నం 3 గంటల 19 నిమిషాలకు ప్రారంభమై, సాయంత్రం 6 గంటల 46 నిమిషాలకు ముగుస్తుంది. సూర్యాస్తమయం తర్వాత చంద్రుడు గ్రహణ రూపంలోనే దర్శనమిస్తాడు.
గ్రహణ స్పర్శ కాలం: మధ్యాహ్నం 3:19 నిమిషాలు.
గ్రహణ మోక్ష కాలం: సాయంత్రం 6:46 నిమిషాలు.
స్నాన సమయం: సాయంత్రం 6:46 తర్వాత అందరూ గ్రహణ స్నానాలు ఆచరించాలి.
ముఖ్యంగా గర్భిణీ స్త్రీలు ఈ సమయంలో ఇంటి నుంచి అస్సలు బయటకు రాకూడదు. కిటికీలు, తలుపులు అన్నీ మూసివేసి లోపలే ప్రశాంతంగా కూర్చోవాలి. గ్రహణ కిరణాలు నేరుగా శరీరంపై పడితే కడుపులో ఉన్న బిడ్డకు ఇబ్బంది కలిగే అవకాశం ఉందని పెద్దలు చెబుతుంటారు. అందుకే ఈ సమయంలో కూరగాయలు కోయడం, బట్టలు కుట్టడం లేదా పదునైన వస్తువులతో పనులు చేయడం అస్సలు చేయకూడదు. వీలైనంత వరకు భగవంతుడి నామాన్ని స్మరించుకుంటూ ఉండటం వల్ల మనసు ప్రశాంతంగా ఉంటుంది.
ఈ గ్రహణం సింహ రాశిలో, పుబ్బా నక్షత్రంలో పడుతోంది. అందుకే సింహ రాశి వారు, మఖ నక్షత్రం వారు ఈ గ్రహణాన్ని అస్సలు చూడకూడదు. అలాగే మేషం, కన్య, వృశ్చికం, కుంభం మీన రాశి వారికి కూడా ఈ గ్రహణం వల్ల అంతగా కలిసిరాదు. అందుకే వీరు గ్రహణం తర్వాత స్నానం చేసి, బియ్యం లేదా ఉలవలు వంటివి దానం చేస్తే మంచిది. గర్భిణీలు మాత్రం ఎటువంటి భయం లేకుండా 'ఓం నమఃశివాయ' లేదా 'కృష్ణాయ నమః' అని మనసులో అనుకుంటూ ఉంటే ఏ దోషం దరిచేరదు.
