యాపిల్ ఫోల్డబుల్ ఫోన్‌లో లోపాలు... కస్టమర్ల లబోదిబో!
Apple iPhone Duo Foldable Phone Issues: యాపిల్ సంస్థ భారీ ధరకు మార్కెట్లోకి తీసుకొచ్చిన తొలి ఫోల్డబుల్ మోడల్ 'ఐఫోన్ డుయో' తీవ్ర విమర్శలను ఎదుర్కొంటోంది. దాదాపు ₹3 లక్షలు వెచ్చించి కొనుగోలు చేసిన వినియోగదారులకు బాక్స్ తెరవగానే డిస్‌ప్లేపై ట్యూబ్‌లైట్ లాంటి గీతలు రావడం, హింజ్ లోపాల వల్ల స్క్రీన్ దెబ్బతినడం వంటి సమస్యలు బయటపడుతున్నాయి. దీనికితోడు క్రీజ్ దాచేందుకు వాడిన మ్యాట్ లేయర్ వల్ల అవుట్‌డోర్ బ్రైట్‌నెస్ తగ్గడం, యాప్‌లు క్రాష్ అవ్వడం వంటి లోపాలు వేధిస్తున్నాయి. స్క్రీన్ పాడైతే రిపేర్ ఖర్చు ₹1 లక్ష దాటుతుండటంతో కొత్తగా మార్కెట్లోకి వచ్చే ప్రథమ తరం ఉత్పత్తుల విషయంలో తొందరపాటు నిర్ణయాలు తీసుకోవద్దని నిపుణులు హెచ్చరిస్తున్నారు.
ఫోన్‌ను ఎలా ఓపెన్ చేయాలో వివరిస్తూ యాపిల్ వీడియో.. సోషల్ మీడియాలో నెటిజన్ల ట్రోలింగ్!
పొరపాటున కిందపడితే స్క్రీన్ రీప్లేస్‌మెంట్ ఖర్చు ₹1 లక్ష పైమాటే.. కొత్త ఐఫోన్ కొనేంత భారం!
సర్వీస్ సెంటర్ల చుట్టూ తిరుగుతున్న యూజర్లు.. భారీగా డబ్బు వెచ్చించినా తప్పని తిప్పలు!
Business: శాంసంగ్, టెక్నో వంటి పలు బ్రాండ్లు మార్కెట్లో ఫోల్డబుల్ ఫోన్లను ప్రవేశపెట్టి ఏళ్లు గడిచిన తర్వాత యాపిల్ సంస్థ ఎట్టకేలకు తన తొలి ఫోల్డబుల్ మొబైల్ 'ఐఫోన్ డుయో'ను మార్కెట్లోకి తీసుకొచ్చింది. సాధారణ ఐఫోన్లు ఈ-కామర్స్ ఆఫర్లు, ఈఎంఐల ద్వారా అందుబాటులోకి వచ్చి సాధారణమైపోవడంతో, తాము సంపన్నులమని చూపించుకునే సరికొత్త స్టేటస్ సింబల్‌గా చాలామంది ఈ ₹3 లక్షల ఫోన్‌ను కొనుగోలు చేశారు. అయితే భారీ అంచనాలతో కొని బాక్స్ ఓపెన్ చేసిన వెంటనే డిస్‌ప్లేపై ట్యూబ్‌లైట్ తరహా తెల్లటి గీత రావడం, స్క్రీన్ బ్రేక్ అయి కనిపించడం వంటి సమస్యలతో సోషల్ మీడియా వేదికగా యూజర్లు తీవ్ర అసహనం వ్యక్తం చేస్తున్నారు.
హింజ్ వైఫల్యం మరియు క్రీజ్ మాస్కింగ్ సమస్యలు
ఈ డిస్‌ప్లే సమస్యలకు ప్రధాన కారణం ఫోన్ లోపల ఉండే హింజ్ (Hinge) మెకానిజం సక్రమంగా లేకపోవడమేనని వెల్లడైంది. హింజ్ అమరిక సరిగ్గా లేకపోవడం వల్ల ఫోల్డ్ చేసిన ప్రతిసారీ అంతర్గత స్క్రీన్‌పై తీవ్ర ఒత్తిడి పడి డిస్‌ప్లే ప్యానెల్ దెబ్బతింటోంది. మరోవైపు ఫోల్డబుల్ ఫోన్లలో సహజంగా కనిపించే మధ్య గీత (Crease) కనిపించకుండా ఉండేందుకు యాపిల్ స్క్రీన్‌పై ఒక ప్రత్యేక మ్యాట్ లేయర్‌ను ఉపయోగించింది. దీనివల్ల క్రీజ్ కనిపించకుండా పోయినప్పటికీ, ఫోన్‌ను ఎండలో లేదా విభిన్న కోణాల నుంచి చూసినప్పుడు రంగులు నాణ్యత కోల్పోవడం, బ్రైట్‌నెస్ గణనీయంగా తగ్గడం వంటి ప్రతికూలతలు తలెత్తుతున్నాయి.
సాఫ్ట్‌వేర్ ఆప్టిమైజేషన్ వైఫల్యం – నెటిజన్ల ట్రోలింగ్
హార్డ్‌వేర్ పరంగానే కాకుండా సాఫ్ట్‌వేర్ అనుసంధానంలోనూ ఐఫోన్ డుయో అనేక సవాళ్లను ఎదుర్కొంటోంది. యాపిల్ తీసుకొచ్చిన తొలి ఫోల్డబుల్ మోడల్ కావడంతో యాప్స్ స్క్రీన్ సైజుకు తగినట్లుగా సరిగ్గా అడాప్ట్ కావడం లేదు. థర్డ్ పార్టీ అప్లికేషన్లు మాత్రమే కాకుండా యాపిల్ అధికారిక యాప్‌లు సైతం తరచూ క్రాష్ అవుతున్నాయి. దీనికితోడు ఫోల్డింగ్ ఫోన్‌ను ఎలా ఓపెన్ చేయాలి, ఎలా క్లోజ్ చేయాలనే దానిపై యాపిల్ ప్రత్యేక వివరణ వీడియోను విడుదల చేయడంతో "ఒక ఫోల్డ్ ఉన్న ఫోన్‌ను తెరవడానికి కూడా ట్యుటోరియల్స్ చూడాలా?" అంటూ సోషల్ మీడియాలో భారీ ఎత్తున ట్రోల్స్ వస్తున్నాయి.
తడిసిమోపెడవుతున్న రిపేర్ ఖర్చులు
ఒకవేళ కొనుగోలు చేసినప్పుడు ఫోన్ బాగానే ఉన్నా, పొరపాటున చేయిజారి కిందపడితే డిస్‌ప్లే లేదా హింజ్ పాడైపోతే దాని రిపేర్ ఖర్చు ఏకంగా ₹1 లక్షకు పైగా ఉంటుందని అంచనా. అంటే రిపేర్ కోసం పెట్టే ఖర్చుతో మరొక కొత్త ప్రీమియం ఐఫోన్‌ను సులభంగా కొనుగోలు చేయవచ్చు. కొన్ని అధీకృత సర్వీస్ కేంద్రాల్లో సరైన విడిభాగాలు లేక, సర్వీస్ అందించలేమంటూ నిరాకరిస్తుండటంతో ₹3 లక్షలు ఖర్చు చేసిన వినియోగదారులు సర్వీస్ సెంటర్ల చుట్టూ తిరగాల్సిన దుస్థితి ఏర్పడుతోంది.
కొనుగోలుదారులకు హెచ్చరిక – కొత్త టెక్నాలజీపై సంయమనం
స్మార్ట్‌ఫోన్ తయారీ సంస్థలు క్రియేటర్లకు ఫోన్లు లేదా నిధులు అందిస్తుంటాయని, భవిష్యత్ ఆహ్వానాల కోసం చాలామంది ఇన్‌ఫ్లుయెన్సర్లు ఇలాంటి లోపాలను బహిరంగంగా చెప్పకుండా కప్పిపుచ్చుతారని వీడియోలో స్పష్టం చేశారు. మార్కెట్లోకి సరికొత్త సాంకేతికత అడుగుపెట్టిన వెంటనే ఆవేశపడి లక్షల రూపాయలు కుమ్మరించడం సరైన నిర్ణయం కాదు. ఏ బ్రాండ్ అయినా మొదటి తరం (1st Generation) ఉత్పత్తుల్లో లోపాలు సహజమని, ఆ టెక్నాలజీ పూర్తిగా స్థిరపడి, కంపెనీలు బగ్స్‌ను సరిదిద్దేంత వరకు వేచి చూసి నిర్ణయం తీసుకోవాలని టెక్ విశ్లేషకులు సూచిస్తున్నారు.
