ఆంధ్రప్రదేశ్ ప్రభుత్వం ప్రజల భూములకు సంబంధించిన దీర్ఘకాలిక సమస్యలపై ప్రత్యేక దృష్టి పెట్టింది. ముఖ్యంగా ప్రభుత్వ రికార్డుల్లో 22-ఏ నిషిద్ధ జాబితాలో చేర్చబడిన భూములకు విముక్తి కల్పించేందుకు చర్యలు చేపట్టింది. ఇటీవల కలెక్టర్ల సదస్సులో ఈ అంశంపై చర్చ జరగగా, ముఖ్యమంత్రి చంద్రబాబు నాయుడు స్పష్టమైన పరిష్కారాలు తీసుకురావాలని అధికారులకు ఆదేశించారు. ఈ క్రమంలో ఏలూరు జిల్లాలో విజయవంతంగా నిర్వహించిన తర్వాత, తాజాగా శ్రీకాకుళం జిల్లాలో ప్రత్యేక డ్రైవ్ చేపట్టారు.
శ్రీకాకుళం జిల్లా పరిషత్ సమావేశ మందిరంలో ‘మీ చేతికి.. మీ భూమి – 22ఏ భూ స్వేచ్ఛ’ పేరుతో నిర్వహించిన ఈ స్పెషల్ డ్రైవ్కు రైతులు, భూ యజమానులు పెద్ద ఎత్తున హాజరయ్యారు. గతంలో భూముల రీ-సర్వే సమయంలో అర్హత ఉన్న భూములు కూడా పొరపాటున 22-ఏ జాబితాలో చేర్చడంతో చాలా మంది తీవ్ర ఇబ్బందులు ఎదుర్కొన్నారు. ఈ డ్రైవ్ ద్వారా అటువంటి తప్పులను సరిదిద్దుతూ, అర్హులైన వారికి న్యాయం చేస్తున్నారు.
రైతులు తమ భూమి పత్రాలు, ఆధార్ ఆధారాలు, ఇతర అవసరమైన రికార్డులతో నేరుగా అధికారులను సంప్రదించారు. అధికారులు అక్కడికక్కడే ఫిర్యాదులను స్వీకరించి, పరిశీలన చేపట్టి పరిష్కారాలు చూపించారు. ఈ ప్రక్రియ ద్వారా భూ రికార్డుల్లో పారదర్శకత పెంచడమే లక్ష్యంగా ప్రభుత్వం ముందుకు సాగుతోంది. తప్పుగా 22-ఏ జాబితాలో చేర్చిన భూములకు త్వరలోనే విముక్తి లభించనుంది.
ఈ మెగా డ్రైవ్లో జిల్లాలోని మూడు రెవెన్యూ డివిజన్లకు చెందిన అధికారులు పాల్గొన్నారు. ఆర్డీవోలు, తహసీల్దార్లు, రెవెన్యూ సిబ్బంది రైతుల సమస్యలను నేరుగా విని పరిష్కరించారు. జిల్లా కలెక్టర్ స్వప్నిల్ దినకర్ పుండ్కర్ స్వయంగా ఈ ప్రక్రియను పర్యవేక్షిస్తూ అధికారులకు సూచనలు ఇచ్చారు. ప్రజలకు ఎలాంటి అన్యాయం జరగకుండా వేగంగా నిర్ణయాలు తీసుకోవాలని ఆయన ఆదేశించారు.
ఈ డ్రైవ్ విజయవంతం కావడంతో ఏళ్ల తరబడి 22-ఏ భూముల సమస్యతో ఇబ్బంది పడిన ప్రజలకు ఊరట లభించింది. ఇప్పటివరకు క్రయవిక్రయాలకు అవకాశం లేకుండా నిలిచిపోయిన భూములు, సమస్యలు పరిష్కారమైతే మళ్లీ వినియోగంలోకి రానున్నాయి. శ్రీకాకుళం జిల్లాతో పాటు ఇతర జిల్లాల్లో కూడా ఇలాంటి ప్రత్యేక డ్రైవ్లు నిర్వహించాలని ప్రభుత్వం భావిస్తోంది.
