యలహంక ఆస్తులు “నా పిల్లల హక్కు”! షర్మిల బహిరంగ లేక!

జగన్ సీఎం అయ్యేవరకు ఉమ్మడిగానే యలహంక ప్రాపర్టీ.. షర్మిల కీలక వ్యాఖ్యలు..

కుమార్తె అంజలి పెళ్లి యలహంక ఇంట్లోనే జరగాలని ఎందుకు కోరుకుంది?..

వైఎస్సార్ కాంగ్రెస్ పార్టీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్‌రెడ్డి కుటుంబానికి సంబంధించిన యలహంక ఆస్తుల అంశంపై వైఎస్ షర్మిల కీలక ప్రకటన చేశారు. తన కుమార్తె అంజలి వివాహం నేపథ్యంలో ఈ ఆస్తుల గురించి ఎక్స్‌ (గతంలో ట్విట్టర్‌) వేదికగా స్పందించిన ఆమె.. యలహంక ప్రాపర్టీ విషయంలో తన వైఖరిని స్పష్టం చేశారు. తనకు, తన పిల్లలకు రావాల్సిన వాటా పూర్తిగా వచ్చిందని, న్యాయంగా తనకు చెందని దాని కోసం ఆశపడే స్వభావం తనది కాదని పేర్కొన్నారు.

జగన్ ముఖ్యమంత్రి అయ్యే వరకు యలహంక ప్రాపర్టీ ఉమ్మడిగానే ఉందని షర్మిల వెల్లడించారు. అనంతరం జరిగిన ఆస్తుల పంపకాల్లో తనకు, తన పిల్లలకు రావాల్సిన వాటా వంద శాతం వచ్చిందని స్పష్టం చేశారు. ఈ విషయం దేవుడి సాక్షిగా నిజమని పేర్కొంటూ, యలహంక ఆస్తులు తన పిల్లల హక్కు అని ఆమె వ్యాఖ్యానించారు. తనకు చెందాల్సిన వాటా విషయంలో ఎలాంటి అస్పష్టత లేదని ఆమె ప్రకటన ద్వారా చెప్పే ప్రయత్నం చేశారు.

యలహంకలోని ఇంటితో తన కుటుంబానికి భావోద్వేగ అనుబంధం ఉందని షర్మిల వివరించారు. ఆ ఇల్లు తన తండ్రి, దివంగత ముఖ్యమంత్రి వైఎస్ రాజశేఖరరెడ్డి తిరిగిన ఇల్లు కావడంతో అక్కడే తన వివాహం జరగాలని కుమార్తె అంజలి కోరుకున్నట్లు తెలిపారు. బిడ్డ కోరిక మేరకు అదే ఇంట్లో వివాహ వేడుక నిర్వహించాలని తాము భావించినట్లు చెప్పారు.

సొంత ఇంట్లో పిల్లల వివాహం జరిపించడం ప్రతి తల్లిదండ్రులకు ఒక అదృష్టమని షర్మిల పేర్కొన్నారు. అయితే, తన ఇల్లే పెళ్లి వేదిక కావాలన్న కుమార్తె ఆకాంక్షను నెరవేర్చలేకపోయామని ఆవేదన వ్యక్తం చేశారు. అంజలి కోరుకున్నట్లుగా యలహంక ఇంట్లో పెళ్లి జరగకపోవడం తమకు బాధ కలిగించిందని ఆమె తెలిపారు.

అయినప్పటికీ, కుమార్తె వివాహాన్ని వాయిదా వేయకుండా బంధుమిత్రులు, ఆత్మీయుల సమక్షంలో మరో వేదికలో నిర్వహించనున్నట్లు షర్మిల వెల్లడించారు. యలహంక ఆస్తులపై తన హక్కు గురించి స్పష్టతనిస్తూనే, కుమార్తె వివాహ వేదిక మారాల్సి వచ్చిన పరిస్థితిపై తన భావోద్వేగాన్ని కూడా ఆమె ప్రకటనలో వ్యక్తం చేశారు.

కుటుంబ ఆస్తుల పంపకం, యలహంక ఇంటి వినియోగం వంటి అంశాలు రాజకీయంగా కూడా చర్చకు వస్తున్న నేపథ్యంలో షర్మిల చేసిన ఈ ప్రకటన ప్రాధాన్యం సంతరించుకుంది.