Tiger Missing: ఏలూరు జిల్లాలో హై అలర్ట్... రేడియో కాలర్ పులి అదృశ్యం.. అధికారుల్లో ఆందోళన!

• వేలేరుపాడు అడవుల్లో పెద్దపులి మిస్టరీ.. నిలిచిపోయిన రేడియో ట్రాకర్ సిగ్నల్స్

• బిక్కుబిక్కుమంటున్న ఏజెన్సీ గ్రామాలు.. జాడ లేని పెద్దపులితో ప్రజల భయం

• ఆవును వేటాడి అడవిలోకి.. ఆపై కనుమరుగైన రేడియో కాలర్ టైగర్

Tiger Missing: ఏలూరు జిల్లా ఏజెన్సీ పరిధిలోని వేలేరుపాడు మండలంలో గత కొన్ని రోజులుగా పశువులపై దాడులు చేస్తూ ప్రజలను, అటవీ అధికారులను ముప్పతిప్పలు పెడుతున్న పెద్దపులి రెండు రోజులుగా అకస్మాత్తుగా జాడ లేకుండా పోయింది. గతంలో ఒకసారి అటవీ శాఖ సిబ్బంది దీనిని బంధించి, దాని కదలికలను నిరంతరం పర్యవేక్షించేందుకు వీలుగా 'రేడియో ట్రాకర్' (Radio Collar) అమర్చి అడవిలోకి వదిలిపెట్టారు. ఆ పులి కొద్దిరోజుల క్రితం వేలేరుపాడు అటవీ ప్రాంతానికి చేరుకుని పశువుల మందలపై దాడులు చేస్తూ వస్తోంది.

ఇటీవల బుధవారం తెల్లవారుజామున ఈ పెద్దపులి చింతలపాడు గ్రామం వద్ద ఒక ఆవును వేటాడి చంపేసింది. సమాచారం అందుకున్న రెస్క్యూ బృందాలు, అటవీ సిబ్బంది రేడియో ట్రాకర్ సిగ్నల్స్ ఆధారంగా పులి అడవిలోనే ఉన్నట్లు గుర్తించి, దానికి ఆహారంగా ఆవు కళేబరాన్ని ఎరగా వేశారు. ఆ తర్వాత పులి ఎడవల్లి, కటుకూరు గ్రామాల మధ్య ఉన్న గుట్టపైకి వెళ్లినట్లు బుధవారం రాత్రి వరకు సిగ్నల్స్ వచ్చాయి. అయితే, ఆ తర్వాత నుండి రేడియో కాలర్ నుండి సిగ్నల్స్ నిలిచిపోవడంతో పులి ఎటు వెళ్లిందనేది తెలియక అధికారులు తీవ్ర ఆందోళన చెందుతున్నారు.

పులి ఆచూకీ కనుగొనడానికి అటవీ శాఖ డ్రోన్ కెమెరాలను రంగంలోకి దించినప్పటికీ ఎలాంటి ఫలితం లేకపోయింది. మరోవైపు సిగ్నల్స్ నిలిచిపోవడంతో ఆ పులి ఏ క్షణంలో ఏ గ్రామంపై పడుతుందోనని ఎడవల్లి, కటుకూరు, చింతలపాడు పరిసర ప్రాంతాల గిరిజన ప్రజలు తీవ్ర భయాందోళనల మధ్య బిక్కుబిక్కుమంటూ గడుపుతున్నారు. పులిని పట్టుకోవడానికి రెస్క్యూ బృందాలు నిర్లక్ష్యం వహించాయని, ఎర వేసిన సమయంలో సరైన నిఘా పెట్టలేదని స్థానికులు ఆరోపిస్తున్నారు.