National Highway: 100 అడుగుల వెడల్పుతో రూ.172 కోట్లతో కనెక్టివిటీ... వైజాగ్ టూ భోగాపురం కేవలం 58 నిమిషాల్లోనే... !
National Highway: భోగాపురం అంతర్జాతీయ విమానాశ్రయానికి విశాఖపట్నం నగరం నుంచి ప్రయాణికులు సులువుగా చేరుకునేందుకు వీలుగా ఆంధ్రప్రదేశ్ ప్రభుత్వం ₹172 కోట్ల వేయంతో 5 ప్రధాన రహదారులను అభివృద్ధి చేస్తోంది. గ్రీన్ ఏసీ బస్సులు, 100 అడుగుల విస్తరణ రోడ్లతో పాటు ఆగస్టు 17 నుంచి ఎయిర్ ఇండియా బెంగళూరు సర్వీసులతో కమర్షియల్ విమాన కార్యకలాపాలు ప్రారంభం కానున్నాయి.
National Highway: విశాఖపట్నానికి దాదాపు 45 నుండి 50 కిలోమీటర్ల దూరంలో విజయనగరం జిల్లా పరిధిలో నిర్మించిన అల్లూరి సీతారామరాజు ఇంటర్నేషనల్ ఎయిర్పోర్ట్ (భోగాపురం) ప్రారంభోత్సవానికి సర్వసన్నద్ధమైంది. ఏడాదికి సుమారు 60 లక్షల మంది ప్రయాణికులను చేరవేసే సామర్థ్యంతో, దేశంలోనే అతిపెద్ద రన్వేలలో ఒకదానిని కలిగి ఉన్న ఈ గ్రీన్ఫీల్డ్ ఎయిర్పోర్ట్కు కోర్ సిటీ విశాఖ నుండి ప్రయాణికులు సులువుగా చేరుకోవడానికి వీలుగా మౌలిక వసతులు మరియు రోడ్డు కనెక్టివిటీపై ప్రభుత్వం ప్రత్యేక శ్రద్ధ వహించింది.
విశాఖపట్నం మరియు ఎయిర్పోర్ట్ ఏరోసిటీ మధ్య వేగవంతమైన ప్రయాణం కోసం ₹172 కోట్ల అంచనా వ్యయంతో ప్రధానమైన ఐదు నుండి ఆరు రహదారుల విస్తరణ, అభివృద్ధి పనులు శరవేగంగా సాగుతున్నాయి. ఇందులో భాగంగా అడవివరం-సౌండ్ మధ్య 47 కిలోమీటర్ల మేర 100 అడుగుల వెడల్పుతో నిర్మించిన 4 లేన్ల రహదారి దాదాపు పూర్తయి అందుబాటులోకి వచ్చింది. ఈ రోడ్డు మార్గం ద్వారా ప్రయాణికులు కేవలం 58 నిమిషాల్లోనే ఎయిర్పోర్ట్కు చేరుకునే సదుపాయం లభిస్తుంది.
ఎయిర్పోర్ట్ ప్రయాణికుల కోసం పర్యావరణహిత గ్రీన్ ఎనర్జీతో నడిచే 70 నుండి 80 వరకు బ్యాటరీ ఏసీ బస్సులను నిరంతరం నడపడానికి ప్రణాళిక రూపకల్పన చేశారు. జాతీయ రహదారి (NH-16)కి అనుసంధానంగా ప్రతి 200 మీటర్లకు ఒక బస్ బే చొప్పున మొత్తం 20 ప్రత్యేక బస్ బేలు, 4 అత్యాధునిక సిగ్నల్ జంక్షన్లు మరియు రహదారులకు ఇరువైపులా పచ్చదనాన్ని పెంపొందించే గ్రీన్ కారిడార్లను డెవలప్ చేస్తున్నారు. తాళ్లవలస-నేరేళ్లవలస (22 కిమీ), తిమ్మాపురం-మారికవలస (32 కిమీ), కాపులుప్పాడ-బోయిపాలెం (30 కిమీ) వంటి మార్గాలను ప్రయాణ సమయం తగ్గేలా తీర్చిదిద్దారు.
ఎయిర్పోర్ట్ను ప్రధానమంత్రి ప్రారంభించిన అనంతరం ఆగస్టు 17వ తేదీ నుండి కమర్షియల్ విమాన సర్వీసులు ప్రారంభం కానున్నాయి. ఇప్పటికే 'ఎయిర్ ఇండియా' ఆగస్టు 17 నుండి భోగాపురం నుంచి బెంగళూరుకి ప్రతిరోజూ రెండు విమాన సర్వీసులను నడుపుతున్నట్లు షెడ్యూల్ విడుదల చేసింది. భవిష్యత్తులో రహదారుల రద్దీని తగ్గించేందుకు విశాఖ మెట్రో మొదటి దశతో పాటు ఎయిర్పోర్ట్ను అనుసంధానించే రెండో దశ మెట్రో పనులపై కూడా ప్రభుత్వం దృష్టి సారించనుంది.
భోగాపురం ఎయిర్పోర్ట్ చుట్టుపక్కల ప్రాంతాలైన కాపులుప్పాడ, తగరపువలస బీచ్ ఫ్రంట్ ఏరియాలు ఐటీ కారిడార్గా, హోటళ్ళు, రిసార్టులు మరియు ఏరోసిటీగా రూపాంతరం చెందుతున్నాయి. ఈ ₹172 కోట్ల రహదారుల నెట్వర్క్ పనులు పూర్తయితే ప్రయాణికులకు సులభతర రవాణాతో పాటు ఉత్తరాంధ్ర రీజియన్లో ఆర్థిక మరియు పర్యాటక రంగాలు కొత్త పుంతలు తొక్కడం ఖాయమని విశ్లేషకులు భావిస్తున్నారు.
Tags
Be the first to react
