కుప్పంలో సీఎం చంద్రబాబు పర్యటన.. రెండు రోజుల పర్యటనలో కీలక అభివృద్ధి కార్యక్రమాలు!

సీఎం చంద్రబాబు కుప్పం పర్యటన.. జలహారతి నుంచి అభివృద్ధి కార్యక్రమాల వరకు..

‘స్వర్ణ కుప్పం’ అచీవ్‌మెంట్స్ గ్యాలరీని సందర్శించనున్న సీఎం చంద్రబాబు..

అమరావతి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు రెండు రోజుల పాటు కుప్పం(Kuppam) నియోజకవర్గంలో పర్యటించనున్నారు. ఈ పర్యటనలో పలు అభివృద్ధి కార్యక్రమాలను ప్రారంభించడంతో పాటు కొత్త పనులకు శంకుస్థాపనలు చేయనున్నారు. అలాగే రైతులు, లబ్ధిదారులు, పారిశ్రామికవేత్తలతో సమావేశమై వివిధ అంశాలపై చర్చించనున్నారు.

బెంగళూరు పర్యటనతో సీఎం పర్యటన ప్రారంభం

చంద్రబాబు ఆదివారం హైదరాబాద్ నుంచి బెంగళూరుకు బయలుదేరి వెళ్తారు. సాయంత్రం 6 గంటల నుంచి రాత్రి 8 గంటల వరకు బెంగళూరులోని ‘ది ఎర్త్ సెంటర్, విస్టా స్పేసెస్’ ప్రారంభోత్సవ కార్యక్రమంలో పాల్గొంటారు. కార్యక్రమం అనంతరం బెంగళూరులోనే రాత్రి బస చేస్తారు.

సోమవారం ఉదయం బెంగళూరు నుంచి నేరుగా చిత్తూరు జిల్లా శాంతిపురం మండలం గుండిశెట్టిపల్లికి చేరుకుంటారు. అక్కడ హెచ్ఎన్ఎస్ఎస్ కాలువ జలహారతి కార్యక్రమంలో పాల్గొంటారు. అనంతరం కుప్పం నియోజకవర్గంలో పలు అభివృద్ధి కార్యక్రమాలకు హాజరవుతారు.

రూ.289.5 కోట్ల పనులకు ప్రారంభోత్సవాలు

కుప్పం నియోజకవర్గంలో రైతు బజార్‌కు(Rythu Bazaar Thambiganipalli) శంకుస్థాపనతో పాటు కుప్పం మున్సిపాలిటీలో పలు అభివృద్ధి పనులను సీఎం ప్రారంభించనున్నారు. మొత్తం రూ.289.5 కోట్ల విలువైన అభివృద్ధి పనులకు ప్రారంభోత్సవాలు చేయనుండగా, మరో రూ.38.5 కోట్ల విలువైన పనులకు శంకుస్థాపనలు చేయనున్నారు.

ఈ సందర్భంగా ‘స్వర్ణ కుప్పం’ సాధించిన పురోగతిని వివరించే వీడియోను సీఎం వీక్షిస్తారు. అనంతరం లబ్ధిదారులతో ముఖాముఖి మాట్లాడనున్నారు. 

కుప్పం కొత్తపేటలో నిర్వహించే భారీ బహిరంగ సభలో ముఖ్యమంత్రి చంద్రబాబు ప్రసంగించనున్నారు. అనంతరం ‘స్వర్ణ కుప్పం’ అచీవ్‌మెంట్స్ గ్యాలరీని సందర్శిస్తారు. పర్యటనలో భాగంగా హిందాల్కో ప్రతినిధులతో సీఎం సమావేశం కానున్నారు. జాతీయ రహదారి ప్రాజెక్టుల పురోగతిపై కూడా సమీక్ష నిర్వహించనున్నారు.

కుప్పం రైల్వే స్టేషన్‌లో అదనపు హాల్ట్

సోమవారం రాత్రి కుప్పం రైల్వే స్టేషన్‌లో దాదర్–పుదుచ్చేరి ఎక్స్‌ప్రెస్‌కు అదనపు హాల్ట్‌ను ముఖ్యమంత్రి ప్రారంభించనున్నారు. ఈ అదనపు రైలు నిలుపుదలతో కుప్పం నుంచి రైలు ప్రయాణం చేసే వారికి మరింత సౌకర్యం కలిగే అవకాశం ఉంది.

మంగళవారం రూ.9,000 కోట్ల HAM పనులకు శ్రీకారం

కుప్పం పర్యటనలో రెండో రోజైన మంగళవారం కూడా సీఎం చంద్రబాబు వరుస కార్యక్రమాల్లో పాల్గొంటారు. ఉదయం 11 గంటలకు రాష్ట్రంలోని అన్ని మున్సిపాలిటీల్లో చేపట్టిన రూ.9,000 కోట్ల విలువైన హైబ్రిడ్ యాన్యుటీ మోడల్ (HAM) పనులను ప్రారంభించనున్నారు.

అనంతరం మధ్యాహ్నం పారిశ్రామికవేత్తలతో ముఖ్యమంత్రి ముఖాముఖి సమావేశం నిర్వహిస్తారు. రాష్ట్రంలోని పారిశ్రామిక అభివృద్ధి, పెట్టుబడులకు సంబంధించిన అంశాలపై ఈ సమావేశంలో చర్చించే అవకాశం ఉంది.

కేడర్ సమావేశం అనంతరం అమరావతికి తిరుగు

మంగళవారం మధ్యాహ్నం 2 గంటల నుంచి సాయంత్రం 4 గంటల వరకు సీఎం చంద్రబాబు కేడర్ సమావేశంలో పాల్గొంటారు. అనంతరం మంగళవారం సాయంత్రానికి అమరావతికి తిరిగి చేరుకుంటారు.

రెండు రోజుల కుప్పం పర్యటనలో అభివృద్ధి పనుల ప్రారంభం, కొత్త ప్రాజెక్టులకు శంకుస్థాపనలు, లబ్ధిదారులతో ముఖాముఖి, పారిశ్రామికవేత్తలతో సమావేశం, జాతీయ రహదారులపై సమీక్షతో పాటు రైల్వే సౌకర్యానికి సంబంధించిన కార్యక్రమాలు చోటుచేసుకోనున్నాయి.