నేతన్నల పెన్షన్లపై కీలక ఆదేశాలు.. అక్రమ వసూళ్లకు చెక్!

నేతన్నల పెన్షన్ కోసం ఎవరికీ ఒక్క రూపాయి ఇవ్వొద్దు.. మంత్రి సవిత..

నేతన్నల పెన్షన్లకు 16,521 దరఖాస్తులు.. ఇంటింటికీ వెళ్లి పరిశీలన..

50 ఏళ్లు నిండిన అర్హులైన నేతన్నలందరికీ ఎన్టీఆర్ భరోసా పెన్షన్లు అందించేందుకు కూటమి ప్రభుత్వం చర్యలు చేపట్టిందని రాష్ట్ర చేనేత, జౌళి శాఖ మంత్రి ఎస్. సవిత తెలిపారు. పెన్షన్ దరఖాస్తుల పరిశీలనలో ఎలాంటి అక్రమాలు, అవినీతికి తావు లేకుండా చూడాలని అధికారులను ఆదేశించారు. దరఖాస్తుల పరిశీలన పేరుతో చేనేతల నుంచి అక్రమంగా డబ్బులు వసూలు చేస్తున్నట్లు వచ్చిన ఫిర్యాదులపై మంత్రి తీవ్రంగా స్పందించారు.

శ్రీసత్యసాయి జిల్లా పెనుకొండలోని తన క్యాంపు కార్యాలయం నుంచి శనివారం అన్ని జిల్లాల చేనేత, జౌళి శాఖ అధికారులతో మంత్రి సవిత వీడియో కాన్ఫరెన్స్ నిర్వహించారు. నూతన ఎన్టీఆర్ భరోసా పెన్షన్లతో పాటు ‘నేతన్నల సేవలో’ పథకం అమలు తీరును ఆమె సమీక్షించారు. కొత్త పెన్షన్ల కోసం వచ్చిన దరఖాస్తుల సంఖ్య, వాటి పరిశీలన ప్రక్రియ, అర్హుల గుర్తింపు తదితర అంశాలపై అధికారులను అడిగి తెలుసుకున్నారు.

16,521 కొత్త దరఖాస్తులు

రాష్ట్రవ్యాప్తంగా కొత్త పెన్షన్ల కోసం 16,521 దరఖాస్తులు వచ్చినట్లు చేనేత, జౌళి శాఖ ప్రత్యేక ప్రధాన కార్యదర్శి ఆర్పీ సిసోడియా మంత్రికి వివరించారు. అర్హులైన లబ్ధిదారులను గుర్తించేందుకు అధికారులు ఇంటింటికీ వెళ్లి దరఖాస్తులను పరిశీలిస్తున్నట్లు తెలిపారు. ప్రస్తుతం రాష్ట్రంలో 84 వేలకుపైగా చేనేత కార్మికులకు పెన్షన్లు అందుతున్నాయని పేర్కొన్నారు.

అర్హత ఉంటే పెన్షన్.. ఎవరికీ డబ్బులు ఇవ్వొద్దు

50 ఏళ్లు నిండిన అర్హులైన ప్రతి నేతన్నకూ పెన్షన్ అందించడమే ప్రభుత్వ లక్ష్యమని మంత్రి సవిత స్పష్టం చేశారు. పెన్షన్ పొందేందుకు ఎవరూ అధికారులకు డబ్బులు చెల్లించాల్సిన అవసరం లేదని ఆమె తెలిపారు. అర్హత ఉన్న ప్రతి ఒక్కరికీ ప్రభుత్వ నిబంధనల ప్రకారం పెన్షన్ అందుతుందని, మధ్యవర్తులు లేదా ఉద్యోగుల మాటలు నమ్మి డబ్బులు ఇవ్వవద్దని నేతన్నలకు సూచించారు.

శ్రీసత్యసాయి, అనంతపురం సహా పలు జిల్లాల్లో దరఖాస్తుదారుల నుంచి అక్రమ వసూళ్లు జరుగుతున్నట్లు ఫిర్యాదులు అందాయని మంత్రి తెలిపారు. నేతన్నలకు ఆర్థిక భరోసా కల్పించాలన్నదే సీఎం చంద్రబాబు, మంత్రి నారా లోకేశ్ లక్ష్యమని పేర్కొన్నారు. ఉచిత విద్యుత్, ‘నేతన్నల సేవలో’ పథకం వంటి కార్యక్రమాలతో పాటు ఇప్పుడు 50 ఏళ్లు నిండిన అర్హులైన చేనేతలకు కొత్త పెన్షన్లు అందించే నిర్ణయం తీసుకున్నట్లు వివరించారు.

అక్రమ వసూళ్లపై కఠిన చర్యలు

శ్రీసత్యసాయి జిల్లాలో పెన్షన్ దరఖాస్తుల పరిశీలన సమయంలో ఇద్దరు ఉద్యోగులు చేనేతల నుంచి డబ్బులు వసూలు చేస్తున్నట్లు ఫిర్యాదులు వచ్చినట్లు మంత్రి తెలిపారు. డీవో రమణారెడ్డి, ఏడీవో శీనా నాయక్ తమ అనుమతులతోనే పెన్షన్లు వస్తాయంటూ డబ్బులు వసూలు చేస్తున్నట్లు ఫిర్యాదులు అందాయని ఆమె పేర్కొన్నారు.

ప్రభుత్వ పథకం ప్రయోజనాలను పొందేందుకు నేతన్నల నుంచి అక్రమ వసూళ్లకు పాల్పడితే సహించేది లేదని మంత్రి సవిత హెచ్చరించారు. ఈ ఇద్దరు ఉద్యోగులపై తక్షణమే సస్పెన్షన్ చర్యలు తీసుకోవాలని ప్రత్యేక ప్రధాన కార్యదర్శి ఆర్పీ సిసోడియాను ఆదేశించారు. మంత్రి ఆదేశాల మేరకు కమిషనర్ రేఖారాణి సంబంధిత ఉద్యోగులపై సస్పెన్షన్ ఉత్తర్వులు జారీ చేసినట్లు శాఖ వెల్లడించింది.

అర్హుల గుర్తింపులో పారదర్శకత

నేతన్నలకు అందాల్సిన ప్రభుత్వ ప్రయోజనాల్లో ఎలాంటి అవకతవకలకు అవకాశం లేకుండా అర్హుల గుర్తింపు ప్రక్రియను పారదర్శకంగా నిర్వహించాలని మంత్రి అధికారులకు సూచించారు. లబ్ధిదారుల ఎంపిక కోసం జరుగుతున్న సర్వేలో రాష్ట్రస్థాయి అధికారులు కూడా జిల్లాల్లో పర్యటించి స్వయంగా పాల్గొనాలని ఆదేశించారు.

కూటమి ప్రభుత్వం నిర్దేశించిన లక్ష్యాన్ని నీరుగార్చే విధంగా ఎవరైనా వ్యవహరిస్తే చర్యలు తప్పవని మంత్రి సవిత స్పష్టం చేశారు. అర్హత ఉన్న నేతన్నలందరికీ పెన్షన్లు అందేలా అధికారులు సమన్వయంతో పనిచేయాలని సూచించారు.

నేతన్నలకు మంత్రి భరోసా

పెన్షన్ కోసం దరఖాస్తు చేసుకున్న చేనేత కార్మికులు ఎలాంటి ఆందోళనకు గురికావాల్సిన అవసరం లేదని మంత్రి తెలిపారు. అర్హత ఆధారంగా ప్రభుత్వమే పెన్షన్ మంజూరు చేస్తుందని స్పష్టం చేశారు. పెన్షన్ కోసం ఎవరికీ ఒక్క రూపాయి కూడా ఇవ్వవద్దని మరోసారి విజ్ఞప్తి చేశారు.

రాష్ట్రవ్యాప్తంగా జరిగిన ఈ వీడియో కాన్ఫరెన్స్‌లో అన్ని జిల్లాల చేనేత, జౌళి శాఖ అధికారులు పాల్గొన్నారు. కొత్త పెన్షన్ల దరఖాస్తుల పరిశీలనను నిష్పక్షపాతంగా పూర్తి చేసి, అర్హులైన నేతన్నలకు ప్రభుత్వ పథకం ప్రయోజనం అందేలా చర్యలు తీసుకోవాలని మంత్రి సవిత అధికారులను ఆదేశించారు.