ఎల్-నినో ప్రభావంపై అప్రమత్తం! పంటలపై నిరంతర పర్యవేక్షణ! యుద్ధప్రాతిపదికన చర్యలు!

284 మండలాల్లో పంటల పరిస్థితిపై నిరంతర పర్యవేక్షణ.. 2.44 లక్షల హెక్టార్లలో ప్రభావం..

ఏపీలో 26.50 లక్షల హెక్టార్లలో ఖరీఫ్ సాగు.. ఎల్-నినో ప్రభావంపై ప్రత్యేక దృష్టి..

అమరావతి: రాష్ట్రంలో ఎల్-నినో ప్రభావంతో వర్షాభావ పరిస్థితులు నెలకొన్న నేపథ్యంలో రైతులకు అండగా నిలిచేందుకు ప్రభుత్వం చర్యలను ముమ్మరం చేసింది. తేమ ఒత్తిడికి గురవుతున్న ప్రతి పంటను సాధ్యమైనంత వరకు కాపాడాలని, అందుబాటులో ఉన్న ప్రతి నీటి వనరును వినియోగించి అవసరమైన చోట రక్షక తడులు అందించాలని వ్యవసాయ శాఖ మంత్రి కింజరాపు అచ్చెన్నాయుడు అధికారులను ఆదేశించారు.

ఎల్-నినో పరిస్థితులు, వర్షపాతం లోటు, ఖరీఫ్ సాగు, పంటలపై ప్రభావం, పంట ఆరోగ్యం, ప్రత్యామ్నాయ పంటల సాగు వంటి అంశాలపై ఆదివారం మంత్రి అచ్చెన్నాయుడు అధ్యక్షతన ఉన్నతస్థాయి సమీక్ష జరిగింది. క్షేత్రస్థాయిలో అధికారులు నిరంతరం పర్యటిస్తూ పరిస్థితులను అంచనా వేయాలని, రైతులకు అవసరమైన సాంకేతిక సలహాలు, తక్షణ సహాయం అందేలా చూడాలని మంత్రి స్పష్టం చేశారు.

సాధారణం కంటే 54.2 శాతం తక్కువ వర్షపాతం

జూన్ 1 నుంచి సెప్టెంబర్ 12 వరకు రాష్ట్రంలో సాధారణంగా 476.1 మిల్లీమీటర్ల వర్షపాతం నమోదు కావాల్సి ఉండగా, కేవలం 218.2 మిల్లీమీటర్లు మాత్రమే నమోదైనట్లు అధికారులు మంత్రికి వివరించారు. దీంతో రాష్ట్రవ్యాప్తంగా 54.2 శాతం వర్షపాతం లోటు ఏర్పడింది.

ఈ పరిస్థితుల్లో వర్షాభావ ప్రభావిత ప్రాంతాలను ప్రత్యేకంగా గుర్తించి పంటలను రక్షించే కార్యాచరణ చేపట్టాలని మంత్రి ఆదేశించారు. కార్యాలయాలకే పరిమితం కాకుండా అధికారులు గ్రామాల్లో పర్యటించి వాస్తవ పరిస్థితులను తెలుసుకోవాలని సూచించారు.

26.50 లక్షల హెక్టార్లలో ఖరీఫ్ సాగు

సెప్టెంబర్ 12 నాటికి రాష్ట్రవ్యాప్తంగా 26.50 లక్షల హెక్టార్లలో ఖరీఫ్ పంటలు సాగైనట్లు అధికారులు తెలిపారు. ఇది సాధారణ సాగు విస్తీర్ణంలో 74 శాతం కాగా, గత ఏడాది ఇదే సమయంతో పోలిస్తే 78 శాతంగా ఉంది.

ప్రధాన పంటల్లో వరి 12.01 లక్షల హెక్టార్లు, పత్తి 4.11 లక్షల హెక్టార్లు, కంది 2.63 లక్షల హెక్టార్లు, వేరుశనగ 1.47 లక్షల హెక్టార్లు, మొక్కజొన్న 1.08 లక్షల హెక్టార్లలో సాగయ్యాయి.

284 మండలాల్లో ఎల్-నినో ప్రభావం

ఎల్-నినో కారణంగా రాష్ట్రంలోని 284 మండలాలు, 1,792 ఆర్‌ఎస్‌కేలు/గ్రామాల పరిధిలో పంటలపై ప్రభావం నమోదైనట్లు అధికారులు వెల్లడించారు. మొత్తం 2,44,443 హెక్టార్లలో వివిధ స్థాయుల్లో పంటలు ప్రభావితమయ్యాయి.

ఇందులో 1,92,387 హెక్టార్లలో తేమ ఒత్తిడి, 41,474 హెక్టార్లలో పంటలు వాడిపోవడం, 10,582 హెక్టార్లలో పంటలు ఎండిపోవడం నమోదైంది.

జిల్లాల వారీగా చూస్తే కర్నూలులో అత్యధికంగా 1,09,255 హెక్టార్లు ప్రభావితమయ్యాయి. నంద్యాలలో 80,751 హెక్టార్లు, అనంతపురంలో 32,456 హెక్టార్లలో పంటలకు నష్టం లేదా ప్రభావం నమోదైంది.

పంటల వారీగా కంది 74,301 హెక్టార్లు, పత్తి 73,733 హెక్టార్లు, వేరుశనగ 25,818 హెక్టార్లు, మొక్కజొన్న 24,819 హెక్టార్లు, వరి 18,443 హెక్టార్లలో ప్రభావితమైనట్లు అధికారులు తెలిపారు.

‘తేమ ఒత్తిడిలో ఉన్న పంటను ముందుగా కాపాడాలి’

ప్రస్తుత పరిస్థితుల్లో తేమ ఒత్తిడికి గురైన పంటలను కాపాడటమే ప్రభుత్వ ప్రధాన ప్రాధాన్యమని మంత్రి అచ్చెన్నాయుడు స్పష్టం చేశారు. అందుబాటులో ఉన్న ప్రతి నీటి వనరును గుర్తించి, అవసరమైన ప్రాంతాల్లో రక్షక తడులు అందించాలని వ్యవసాయ, జలవనరుల శాఖలను ఆదేశించారు.

ఏ ప్రాంతంలో పంటకు అత్యవసరంగా నీరు అవసరమో గుర్తించి, అందుబాటులో ఉన్న నీటిని ప్రాధాన్యతా క్రమంలో వినియోగించాలని సూచించారు. సాధ్యమైన ప్రతి పంటను కాపాడుతూ.. రైతుకు ప్రభుత్వం అండగా ఉందనే భరోసా క్షేత్రస్థాయిలో కనిపించాలని అధికారులకు దిశానిర్దేశం చేశారు.

99.76 శాతం ప్లాట్ల సర్వే పూర్తి

ఈ-పంట, ఎం అండ్ ఈ విధానాల ద్వారా రాష్ట్రవ్యాప్తంగా 2.7558 కోట్ల ప్లాట్లలో 2.7493 కోట్ల ప్లాట్ల సర్వే పూర్తయిందని అధికారులు తెలిపారు. దీంతో 99.76 శాతం సర్వే పూర్తయింది. ఇంకా 65,233 ప్లాట్ల సర్వే మాత్రమే పెండింగ్‌లో ఉందని వెల్లడించారు. పెండింగ్‌లో ఉన్న సర్వేను త్వరితగతిన పూర్తి చేసి క్షేత్రస్థాయి వాస్తవ పరిస్థితులను నమోదు చేయాలని మంత్రి ఆదేశించారు.

పంట ఆరోగ్య వివరాల నమోదులోనూ పురోగతి సాధించినట్లు అధికారులు తెలిపారు. మొత్తం 1.082 కోట్ల ప్లాట్లలో పంట ఆరోగ్య వివరాలను నవీకరించాల్సి ఉండగా, ఇప్పటివరకు 98.10 లక్షల ప్లాట్లలో వివరాలు నవీకరించారు. మరో 10.10 లక్షల ప్లాట్లు, అంటే 9.34 శాతం పెండింగ్‌లో ఉన్నాయి.

పంట ఆరోగ్య వివరాల నమోదు కేవలం గణాంకాల కోసమే కాదని, ఏ ప్రాంతంలో ఏ పంటకు ఎలాంటి సమస్య ఉందో గుర్తించి సకాలంలో రైతులకు సహాయం అందించేందుకు ఇది కీలకమని మంత్రి పేర్కొన్నారు. ప్రతి ప్లాట్‌ను పర్యవేక్షిస్తూ పెండింగ్ వివరాలను వేగంగా పూర్తి చేయాలని ఆదేశించారు.

ప్రత్యామ్నాయ పంటలకు ప్రోత్సాహం

వర్షాభావ పరిస్థితులను దృష్టిలో పెట్టుకుని పంటల వైవిధ్యీకరణపై ప్రత్యేక దృష్టి పెట్టాలని మంత్రి సూచించారు. ఇప్పటివరకు 34,567 హెక్టార్లలో ప్రత్యామ్నాయ పంటలు సాగు చేసినట్లు అధికారులు తెలిపారు. ఇంకా 95,112 హెక్టార్లను ప్రత్యామ్నాయ పంటల పరిధిలోకి తీసుకురావాల్సి ఉందని వెల్లడించారు.

తక్కువ నీటితో సాగయ్యే, ప్రస్తుత వాతావరణ పరిస్థితులను తట్టుకోగల పంటలను గుర్తించి రైతులను పెద్దఎత్తున ప్రోత్సహించాలని మంత్రి ఆదేశించారు. అవసరమైన విత్తనాలు, సాంకేతిక సలహాలు, ఇతర సహాయాన్ని రైతులకు అందుబాటులో ఉంచాలని సూచించారు.

వ్యవసాయ–జలవనరుల శాఖల సమన్వయంతో రక్షక తడులు

వర్షాభావ పరిస్థితుల్లో పంటలకు నీరు అందించడం కోసం వ్యవసాయ, జలవనరుల శాఖలు నిరంతర సమన్వయంతో పనిచేయాలని మంత్రి అచ్చెన్నాయుడు స్పష్టం చేశారు. నీటి లభ్యత, పంటల పరిస్థితి, అత్యవసర అవసరాలను బట్టి కార్యాచరణ రూపొందించాలని ఆదేశించారు.

నాగార్జునసాగర్, శ్రీశైలం జలాశయాల కింద సాగు చేసే రైతులు వరి కంటే ఆరుతడి పంటలకు ప్రాధాన్యం ఇవ్వాలని నీటిపారుదల శాఖ మంత్రి నిమ్మల రామానాయుడు సూచించారు.

ఎల్-నినో పరిస్థితులను ప్రభుత్వం నిరంతరం పర్యవేక్షిస్తోందని, పరిస్థితులకు అనుగుణంగా కార్యాచరణను ఎప్పటికప్పుడు మార్చుకోవాలని మంత్రి అచ్చెన్నాయుడు తెలిపారు. రైతుల ప్రయోజనాలను కాపాడటమే ప్రభుత్వ ప్రధాన లక్ష్యమని స్పష్టం చేశారు.

రైతుకు భరోసా కల్పించడమే లక్ష్యం

వర్షాభావం కారణంగా రైతులు ఇబ్బందులు పడకుండా ముందస్తు చర్యలు చేపట్టాలని ప్రభుత్వం అధికార యంత్రాంగాన్ని అప్రమత్తం చేసింది. పంటల పరిస్థితిని నిరంతరం పర్యవేక్షించడం, నీటి వనరులను సమర్థంగా వినియోగించడం, తక్కువ నీటి అవసరమయ్యే పంటలను ప్రోత్సహించడం, పంట ఆరోగ్య వివరాలను సమగ్రంగా నమోదు చేయడం వంటి చర్యలకు ప్రాధాన్యం ఇస్తోంది.

ఈ ఉన్నతస్థాయి సమీక్షలో నీటిపారుదల శాఖ మంత్రి నిమ్మల రామానాయుడు, వ్యవసాయ–సహకార శాఖ ప్రత్యేక ప్రధాన కార్యదర్శి బి.రాజశేఖర్, ఉద్యానవన శాఖ డైరెక్టర్ శ్రీనివాసులు, పశుసంవర్ధక శాఖ డైరెక్టర్ రాజుని కుమారి, మత్స్య శాఖ కమిషనర్ రామశంకర్ నాయక్, జలవనరుల శాఖ ఇంజనీర్-ఇన్-చీఫ్, జలవనరుల శాఖ కార్యదర్శి ఐఏఎస్ రాజమౌళి, వ్యవసాయ, జలవనరుల శాఖల వివిధ విభాగాధిపతులు, ఇతర ఉన్నతాధికారులు పాల్గొన్నారు.