మురసు తుపాను బీభత్సం... పలు జిల్లాల్లో పొంగిపొర్లుతున్న వాగులు, వంకలు!

• గుంటూరు, పల్నాడు జిల్లాల్లో నలుగురి మృతి: తీవ్ర విషాదం!

• గుంటూరు జిల్లాలో రెండు రోజుల్లో సగటున 18.3 సెం.మీ వర్షపాతం నమోదు!

• కాకుమాను మండలంలో 26 సెం.మీ వర్షం: నాలుగు వైపులా జలదిగ్బంధంలో గార్లపాడు గ్రామం!

Andhrapradesh: తీవ్ర తుపాను 'మురసు' ఆంధ్రప్రదేశ్‌లోని పలు జిల్లాలను అతలాకుతలం చేసింది. వర్షాలు తగ్గుముఖం పట్టినప్పటికీ ఎగువ నుంచి భారీగా వరద పోటెత్తడంతో వాగులు, వంకలు ఉగ్రరూపం దాల్చాయి. రెండు రోజుల వ్యవధిలో గుంటూరు జిల్లాలో సగటున 18.3 సెంటీమీటర్ల వర్షపాతం నమోదు కావడంతో జిల్లా చిగురుటాకులా వణికిపోయింది. రోడ్లు కొట్టుకుపోయి, విద్యుత్ స్తంభాలు నేలకూలడంతో 55 గ్రామాలకు విద్యుత్ సరఫరా నిలిచిపోయింది. ముంపు బాధితుల కోసం 58 కేంద్రాల్లో 4,217 మందికి పునరావాసం కల్పించారు.

నలుగురి మృతి – ప్రాకారం కూలిన మంగళగిరి పానకాల స్వామి ఆలయం

వరద ఉద్ధృతి కారణంగా గుంటూరు, పల్నాడు జిల్లాల్లో తీవ్ర ప్రాణనష్టం సంభవించింది. గుంటూరు జిల్లా మేడికొండూరు మండలం కొర్రపాడుకు చెందిన రాయపాటి బాలాజీ (30) ప్రమాదవశాత్తు వరద నీటిలో పడి మృతి చెందగా, తాడేపల్లి మండలం పెనుమాక వడ్డెరపాలెంలో కొండచరియలు విరిగిపడి షేక్ మీరాబి (50) మృతి చెందారు. యడ్లపాడు మండలం తిమ్మాపురం వద్ద సర్వీసు రోడ్డు వరదలో గల్లంతైన షణ్ముఖబాబు, రాగి రాజ్‌కుమార్‌ల మృతదేహాలను పోలీసులు వెలికితీశారు. మరోవైపు వర్షాల ధాటికి ప్రముఖ పుణ్యక్షేత్రం మంగళగిరి శ్రీ పానకాల లక్ష్మీ నరసింహస్వామి ఆలయ ప్రాకారం కొంతభాగం కూలిపోయింది.

నల్లమడ, ఓగేరు వాగులకు గండ్లు – వేల హెక్టార్లలో పంట నష్టం

పల్నాడు నుంచి వచ్చిన వరద నీటితో నల్లమడ వాగు ఉగ్రరూపం దాల్చింది. నల్లమడ వాగుకు 6 చోట్ల, ఓగేరు వాగుకు 2 చోట్ల గండ్లు పడ్డాయి. గుంటూరు వాహినిలోకి భారీగా నీరు చేరడంతో కట్ట 6 చోట్ల తెగి పొలాలను ముంచెత్తింది. కొమ్మమూరు కాలువకు గండ్లు పడటంతో భారీ నష్టం వాటిల్లింది. కాకుమాను మండలంలో ఏకంగా 26 సెం.మీ వర్షం కురవడంతో గార్లపాడు, కొప్పర్రు గ్రామాలు జలదిగ్బంధంలో చిక్కుకున్నాయి. గుంటూరు జిల్లాలో 38,062 హెక్టార్లలో, పల్నాడు జిల్లాలో సుమారు 9,600 హెక్టార్లలో పత్తి, వరి, మిరప పంటలు నీటమునిగాయి.

గోపాలపురంలో ఎన్నికల సిబ్బందికి తప్పిన ప్రాణాపాయం

ఉమ్మడి తూర్పుగోదావరి జిల్లా గోపాలపురంలో బుధవారం మధ్యాహ్నం వ్యవసాయ మార్కెట్ యార్డులో ఏర్పాటు చేసిన ఎన్నికల సామగ్రి పంపిణీ కేంద్రాన్ని ఆకస్మిక వరద ముంచెత్తింది. లోపల చిక్కుకున్న ఎన్నికల అధికారులు, ఉద్యోగులను అగ్నిమాపక, ఎస్డీఆర్‌ఎఫ్ బృందాలు తాళ్ల సాయంతో అతికష్టంగా కాపాడాయి. ఈ సహాయక చర్యల్లో రెస్క్యూ చేస్తున్న సీఐ నాగేశ్వర నాయక్ నీటిలో పడిపోగా సిబ్బంది రక్షించారు. వరద ఉద్ధృతికి పలు కార్లు, బైకులు కొట్టుకుపోయాయి.

గోదావరి జిల్లాల్లో ముంపు – తడిసిన బ్యాలెట్ పత్రాలు

కాకినాడ జిల్లా కరప మండల పరిషత్ కార్యాలయంలోకి వరద నీరు చేరి, భద్రపరిచిన మూడు పెట్టెల్లోని వేళంగి గ్రామానికి చెందిన జెడ్పీటీసీ, ఎంపీటీసీ బ్యాలెట్ పత్రాలు తడిసిపోయాయి. దీంతో అధికారులు మిగతా బ్యాలెట్ బాక్సులను హైస్కూలుకు తరలించారు. రాజమహేంద్రవరం నగరంలోని కోటిపల్లి బస్టాండ్, ఆర్యాపురం, కంబాలచెరువు ప్రాంతాలు నీటమునిగి ప్రైవేట్ స్కూల్ బస్సులు చిక్కుకుపోయాయి. నిడదవోలులో రైలు పట్టాలపైకి నీరు చేరగా, తణుకు బస్టాండ్ పూర్తిగా జలమయమైంది.