TDP Office Greevence: 21 ఏళ్లుగా సాగు చేస్తున్న మామిడి తోట ధ్వంసం! 18 ఏళ్లుగా నివాసం ఉంటున్న ఇంటి డాక్యుమెంట్లు ఫోర్జరీ!

టీడీపీకేంద్రకార్యాలయంలో ప్రజావినతుల స్వీకరణ కార్యక్రమం.

పలు జిల్లాల నుంచి భూ వివాదాలపై బాధితుల ఫిర్యాదులు.

తప్పుడు పత్రాలతో ఆస్తుల రిజిస్ట్రేషన్లు జరిగాయంటూ కొన్ని అర్జీలు.

మామిడి తోట ధ్వంసం, భూ ఆక్రమణలపై ఫిర్యాదులు.

భూవివాదాలను ప్రశ్నించినందుకు బెదిరింపులు, దాడులు జరిగాయని పలువురి ఆరోపణలు.

వారసత్వ ఆస్తుల విషయంలో తమ హక్కులను పరిరక్షించాలని కొందరి విజ్ఞప్తి.

సాగు భూములకు రాకపోకల మార్గాలు మూసివేశారంటూ మరో ఫిర్యాదు.

పింఛన్లు, రేషన్, ఇళ్ల నిర్మాణం తదితర సమస్యలపై కూడా అర్జీలు.

ఉద్యోగ అవకాశాల కోసం కొందరు రెస్యూమ్‌లు అందజేశారు.

అనారోగ్యంతో బాధపడుతున్న వారు ఆర్థిక సహాయం కోరారు.

టీడీపీ కేంద్ర కార్యాలయంలో నిర్వహించిన ప్రజావినతుల స్వీకరణ కార్యక్రమానికి వివిధ ప్రాంతాల నుంచి ప్రజలు పెద్ద సంఖ్యలో హాజరై తమ సమస్యలను నేతల దృష్టికి తీసుకెళ్లారు. భూములు, ఆస్తులు, పోలీసు కేసులు, ప్రభుత్వ పథకాలు తదితర అంశాలపై పలువురు అర్జీలు సమర్పించారు.

పల్నాడు జిల్లా క్రోసూరు మండలానికి చెందిన ఓ మహిళ తమ కుటుంబం కొన్నేళ్లుగా సాగు చేసుకుంటున్న భూమికి పట్టా కల్పించాలని కోరారు. గత ప్రభుత్వ హయాంలో తమపై తప్పుడు కేసులు పెట్టి వేధించారని ఆరోపిస్తూ, సంబంధిత అంశంపై విచారణ జరిపి న్యాయం చేయాలని విజ్ఞప్తి చేశారు.

అన్నమయ్య జిల్లా చౌడేపల్లి మండలానికి చెందిన ఓ రైతు తన 21 ఏళ్ల మామిడి తోటను కొందరు వ్యక్తులు ధ్వంసం చేశారని ఆరోపించారు. ఈ ఘటనను అడ్డుకునే ప్రయత్నంలో తనతో పాటు భార్యపై కూడా దాడి జరిగిందని పేర్కొన్నారు. పోలీసులకు ఫిర్యాదు చేసినప్పటికీ సమస్య పరిష్కారం కాలేదని, తమకు న్యాయం చేయాలని కోరారు.

గుంటూరు జిల్లా మేడికొండూరు ప్రాంతానికి చెందిన మరో వ్యక్తి కుటుంబ ఆస్తికి సంబంధించి అక్రమ రిజిస్ట్రేషన్ జరిగిందని ఆరోపిస్తూ అర్జీ సమర్పించారు. తప్పుడు అసెస్మెంట్ నంబర్, ఇతర పత్రాలను ఉపయోగించి ఆస్తిని రిజిస్టర్ చేయడంతో పాటు, ఇతర వారసులకు సమాచారం లేకుండా రుణం తీసుకున్నారని ఆరోపించారు. ఈ వ్యవహారంపై ఇప్పటికే పోలీసు అధికారులకు ఫిర్యాదు చేసినట్లు తెలిపారు.

పల్నాడు జిల్లాలోని కారంపూడి మండలానికి చెందిన ఓ వ్యక్తి తమ పూర్వీకుల భూమి విషయంలో అక్రమ రిజిస్ట్రేషన్లు జరిగాయని ఆరోపించారు. భూమిలో రైస్ మిల్లు నిర్మించి, ఆస్తిని ఇతరులకు విక్రయించారని పేర్కొన్నారు. ఈ వ్యవహారాన్ని ప్రశ్నించినందుకు తనపై ఒత్తిడి, దాడి జరిగిందని ఆరోపిస్తూ చర్యలు కోరారు.

అల్లూరి సీతారామరాజు జిల్లాకు చెందిన ఓ వితంతువు తన భర్త పేరిట ఉన్న వ్యవసాయ భూమిని మరో వ్యక్తి ఆక్రమించుకున్నారని ఫిర్యాదు చేశారు. భూమికి సంబంధించిన పత్రాలు తమ వద్ద ఉన్నప్పటికీ రెవెన్యూ అధికారులకు పలుమార్లు ఫిర్యాదు చేసినా సమస్య పరిష్కారం కాలేదని తెలిపారు.

అన్నమయ్య జిల్లాలో మరో మహిళ తమ వ్యవసాయ భూమికి వెళ్లే సంప్రదాయ మార్గాన్ని పొరుగు భూముల యజమానులు మూసివేశారని పేర్కొన్నారు. దీంతో పంట పొలాలకు వెళ్లేందుకు ఇబ్బందులు ఎదురవుతున్నాయని, రాకపోకలకు మార్గం కల్పించాలని కోరారు.

తిరుపతి జిల్లా వరదయ్యపాలెం మండలానికి చెందిన మరో బాధితురాలు వారసత్వంగా వచ్చిన భూమిని కొందరు ఆక్రమించుకునేందుకు ప్రయత్నిస్తున్నారని ఆరోపించారు. పొలం వద్దకు వెళ్లినప్పుడు బెదిరింపులు, దాడులకు పాల్పడుతున్నారని పేర్కొంటూ రక్షణతో పాటు న్యాయం చేయాలని విజ్ఞప్తి చేశారు.

గుంటూరు ప్రాంతానికి చెందిన మరో మహిళ తన వ్యవసాయ భూమిని ఇతరులు ఆక్రమించేందుకు ప్రయత్నిస్తున్నారని, పొలంలో ఏర్పాటు చేసుకున్న తాత్కాలిక నిర్మాణాన్ని ధ్వంసం చేశారని ఆరోపించారు. ఇప్పటికే పోలీసు, జిల్లా అధికారులను ఆశ్రయించినా సమస్య పరిష్కారం కాలేదని తెలిపారు.

చిలకలూరిపేటకు చెందిన ఓ మహిళ ప్రభుత్వం కేటాయించిన నివాస స్థలంలో తాము సుమారు 18 ఏళ్లుగా నివసిస్తున్నామని తెలిపారు. ఆ స్థలానికి సంబంధించి నకిలీ పత్రాలతో రిజిస్ట్రేషన్ జరిగినట్లు ఆరోపిస్తూ, అక్రమ రిజిస్ట్రేషన్‌ను రద్దు చేసి తమ హక్కులను కాపాడాలని కోరారు.

అదేవిధంగా గుంటూరుకు చెందిన ఓ మహిళ తన భర్త పేరిట ఉన్న వ్యవసాయ భూములను తన పేరిట చట్టబద్ధంగా బదలాయించాలని విజ్ఞప్తి చేశారు. భర్త మరణించిన అనంతరం రెవెన్యూ రికార్డుల్లో వారసురాలిగా తన పేరు నమోదు చేయాలని కోరారు.

ఈ ఫిర్యాదులతో పాటు పింఛన్లు, రేషన్ కార్డులు, ఇళ్ల నిర్మాణం, ఉద్యోగాలు, వైద్య మరియు ఆర్థిక సహాయం వంటి వివిధ అంశాలపై కూడా ప్రజలు తమ సమస్యలను నేతల దృష్టికి తీసుకెళ్లారు. ప్రజల నుంచి వచ్చిన అర్జీలను పరిశీలించి, సంబంధిత శాఖల అధికారులతో మాట్లాడి సమస్యల పరిష్కారానికి చర్యలు తీసుకుంటామని కార్యక్రమంలో పాల్గొన్న నేతలు తెలిపారు.