అమరావతి రైల్వే లైన్‌లో భారీ మార్పులు... 1.5 కిలోమీటర్లు పెరిగిన రూట్!
Amaravati Railway Line: అమరావతి నూతన రైల్వే లైన్ నిర్మాణంలో రైల్వే శాఖ పలు మార్పులు చేర్పులు చేసింది. ఇన్నర్ రింగ్ రోడ్డుతో సమన్వయం కోసం మార్గంలో స్వల్ప వంపు ఇవ్వడంతో లైన్ పొడవు 56.53 కి.మీ నుంచి 58.1 కిలోమీటర్లకు పెరిగిందని తెలిపారు. అలాగే గతంలో అనుకున్న 1500 ఎకరాల భారీ జంక్షన్‌ను విభజించి, తాడికొండ సమీపంలో ప్రధాన రైల్వే స్టేషన్‌ను, కొప్పురావూరు వద్ద 230 ఎకరాల్లో భారీ టెర్మినల్ మరియు కోచ్ వర్క్‌షాప్‌ను ఏర్పాటు చేయాలని ప్రతిపాదించారని పేర్కొన్నారు.
1500 ఎకరాల మెగా జంక్షన్ ప్లాన్ స్ప్లిట్: రైల్వే స్టేషన్ వేరుగా.. వర్క్‌షాప్ టెర్మినల్ వేరుగా నిర్మాణం!
తాడికొండకు 5 కి.మీ సమీపంలో సరికొత్త ‘అమరావతి ప్రధాన రైల్వే స్టేషన్’!
కొప్పురావూరు వద్ద 230 ఎకరాల్లో భారీ కోచ్ మెయింటెనెన్స్ వర్క్‌షాప్ & టెర్మినల్!
Amaravati: ఆంధ్రప్రదేశ్ రాజధాని అమరావతిని జాతీయ రైల్వే నెట్‌వర్క్‌తో అనుసంధానించే ప్రాజెక్టు పనులను వేగవంతం చేసే ప్రక్రియలో భాగంగా రైల్వే శాఖ అలైన్‌మెంట్‌లో కొన్ని కీలక మార్పులు చేపట్టింది. ఖమ్మం జిల్లా ఎర్రుపాలెం నుంచి గుంటూరు జిల్లా నంబూరు వరకు ప్రతిపాదించిన ఈ రైల్వే లైన్, రాజధాని ప్రాంతంలో రానున్న ఇన్నర్ రింగ్ రోడ్డు (IRR) ప్రణాళికతో సమాంతరంగా వస్తూ కొన్ని ప్రాంతాల్లో ఇంటర్‌సెక్ట్ అవుతోంది. భూసేకరణలో ఎలాంటి న్యాయపరమైన, సాంకేతిక చిక్కులు తలెత్తకుండా ఉండేందుకు రైలు మార్గానికి స్వల్ప వంపు (కర్వ్) ఇచ్చేలా అధికారులు కొత్త డిజైన్ రూపొందించారు.
రైల్వే లైన్ పొడవు పెంపు – 58.1 కిలోమీటర్లకు చేరిక
ఈ రీ-అలైన్‌మెంట్ కారణంగా రైల్వే లైన్ మొత్తం పొడవులో సుమారు 1.5 కిలోమీటర్ల మేర పెరుగుదల చోటుచేసుకుంది. తొలుత ఖరారైన ప్రతిపాదనల ప్రకారం ఎర్రుపాలెం – నంబూరు మార్గం పొడవు 56.53 కిలోమీటర్లు కాగా, తాజా మార్పులతో ఇది 58.1 కిలోమీటర్లకు చేరింది. ఈ కారిడార్‌లో గంటకు 160 కిలోమీటర్ల వేగంతో ప్రయాణించే అత్యాధునిక ట్రాక్‌ను నిర్మిస్తున్నారు. కృష్ణా నదిపై దాదాపు 4.5 కిలోమీటర్ల పొడవైన భారీ ఐకానిక్ వంతెనతో పాటు 32 మేజర్ బ్రిడ్జిలు, 92 మైనర్ వంతెనలు, 12 రోడ్ ఓవర్/అండర్ బ్రిడ్జిలు (ROB/RUB) రానున్నాయి.
జంక్షన్ విభజన – స్టేషన్ వేరు.. వర్క్‌షాప్ వేరు
గతంలో పెదపరిమి సమీపంలో సుమారు 1500 ఎకరాల విస్తీర్ణంలో ప్రధాన రైల్వే స్టేషన్, కోచ్ ఫ్యాక్టరీ, వ్యాగన్ సర్వీసింగ్ డిపో, మెయింటెనెన్స్ యూనిట్లతో కూడిన భారీ జంక్షన్ ఏర్పాటు చేయాలని భావించారు. అయితే భూసేకరణ సౌలభ్యం, నిర్వహణ సమర్థత దృష్ట్యా ఈ ప్రాజెక్టును రెండు భాగాలుగా విభజిస్తున్నారు (స్ప్లిట్). ప్రయాణికుల కోసం నిర్మించే ప్రధాన రైల్వే స్టేషన్‌ను ఒకచోట, రైళ్ల నిర్వహణ, సర్వీసింగ్ చేపట్టే భారీ టెర్మినల్ వర్క్‌షాప్‌ను మరోచోట నిర్మించేలా ప్రణాళిక సవరించారు.
తాడికొండ వద్ద స్టేషన్.. కొప్పురావూరు వద్ద టెర్మినల్
సవరించిన ప్రణాళికల ప్రకారం.. ప్రధాన ‘అమరావతి రైల్వే స్టేషన్’ పెదపరిమి నుంచి ముందుకు జరిగి, తాడికొండకు సుమారు 5 కిలోమీటర్ల దూరంలో రాజధాని కోర్ క్యాపిటల్ ప్రాంతానికి మరింత అనువుగా రానుంది. మరోవైపు 24 ఎల్‌హెచ్‌బీ (LHB) కోచ్‌లు కలిగిన సుదీర్ఘ రైళ్లను నిలిపి సర్వీసింగ్ చేసేందుకు వీలుగా కొప్పురావూరు వద్ద 230 ఎకరాల విస్తీర్ణంలో ప్రత్యేక టెర్మినల్ ఏర్పాటు కానుంది. ఇందులో 9 ప్రధాన ప్లాట్‌ఫామ్‌లు, 6 సైడ్ లైన్లు, పిట్ లైన్లు, 12 స్టీరింగ్ లైన్లతో భారీ నిర్వహణ హబ్ సిద్ధం కానుంది. ఇందుకోసం భూమిని కేటాయించాలని రైల్వే శాఖ ఇప్పటికే ఏపీ సీఆర్‌డీఏ (APCRDA)ను కోరింది.
క్రాసింగ్ & హాల్ట్ స్టేషన్ల నెట్‌వర్క్ – కేంద్రం వద్ద ప్రతిపాదనలు
ఈ మార్గంలో ప్రయాణికుల సౌకర్యార్థం పెద్దపురం, పరిటాల, అమరావతి, కొప్పురావూరులలో లూప్ లైన్లతో కూడిన క్రాసింగ్ స్టేషన్లను ఏర్పాటు చేయనున్నారు. అలాగే చెన్నరావుపాలెం, గొట్టుముక్కల, కొత్తపల్లి, వడ్డమాను, తాడికొండల వద్ద హాల్ట్ స్టేషన్లు రానున్నాయి. ఇటీవలే రైల్వే ట్రాక్ నిర్మాణానికి సంబంధించిన టెండర్లను రైల్వే శాఖ ఆహ్వానించింది. పొడవు పెరుగుదల మరియు అలైన్‌మెంట్ సవరణలకు సంబంధించిన నివేదిక రైల్వే బోర్డు, కేంద్ర ప్రభుత్వ అనుమతుల కోసం చేరింది. కేంద్రం ఆమోదముద్ర పడిన వెంటనే పనులు గ్రౌండ్ కానున్నాయి.
Be the first to react
