Amaravathi: అమరావతి సీడ్ యాక్సిస్ రోడ్డు పనులపై మంత్రి నారాయణ సమీక్ష.. స్టీల్ బ్రిడ్జిల నిర్మాణం తుది దశకు!

బకింగ్‌హామ్ కాలువ, కొండవీటి వాగుపై స్టీల్ బ్రిడ్జిల నిర్మాణం దాదాపు పూర్తి..

విజయవాడ, మంగళగిరి నుంచి అమరావతికి నేరుగా అనుసంధానం కల్పించే సీడ్ యాక్సిస్ రోడ్డు..

అమరావతి: రాజధాని అమరావతిలో కీలక మౌలిక సదుపాయాల అభివృద్ధి పనులు వేగంగా కొనసాగుతున్నాయి. ఇందులో భాగంగా సీడ్ యాక్సిస్ రోడ్డును పాత గుంటూరు జాతీయ రహదారితో అనుసంధానించే పనులను రాష్ట్ర పురపాలక, పట్టణాభివృద్ధి శాఖ మంత్రి పొంగూరు నారాయణ ప్రత్యక్షంగా పరిశీలించారు. పనుల పురోగతిని అధికారులను అడిగి తెలుసుకుని, నిర్ణీత గడువులో పూర్తి చేయాలని సూచించారు.

రాజధాని ప్రాంతంలో అత్యంత కీలకంగా భావిస్తున్న సీడ్ యాక్సిస్ రోడ్డులో భాగంగా ప్రభుత్వం రెండు స్టీల్ బ్రిడ్జిలను నిర్మిస్తోంది. వీటిలో ఒకటి బకింగ్‌హామ్ కాలువపై, మరొకటి కొండవీటి వాగుపై నిర్మితమవుతోంది. ఈ రెండు స్టీల్ బ్రిడ్జిల నిర్మాణ పనులు ప్రస్తుతం దాదాపు పూర్తయ్యే దశకు చేరుకున్నాయని అధికారులు మంత్రికి వివరించారు.

సీడ్ యాక్సిస్ రోడ్డు పూర్తయితే విజయవాడ, మంగళగిరి ప్రాంతాల నుంచి అమరావతికి నేరుగా, వేగవంతంగా చేరుకునే అవకాశం కలుగుతుంది. రాజధాని ప్రాంతానికి రాకపోకలు మరింత సులభతరం కావడంతో పాటు ట్రాఫిక్ రద్దీ కూడా గణనీయంగా తగ్గే అవకాశం ఉందని అధికారులు తెలిపారు.

పనుల పరిశీలన సందర్భంగా మంత్రి నారాయణ అధికారులకు కీలక ఆదేశాలు జారీ చేశారు. స్టీల్ బ్రిడ్జిల నిర్మాణం పూర్తయ్యేలోపు రోడ్డుకు సంబంధించిన పెండింగ్ పనులను కూడా పూర్తి చేయాలని స్పష్టమైన సూచనలు చేశారు. అన్ని పనులు సమన్వయంతో వేగవంతంగా పూర్తి చేసి, ప్రజలకు వీలైనంత త్వరగా అందుబాటులోకి తీసుకురావాలని ఆదేశించారు.

రాజధాని అమరావతి అభివృద్ధిలో సీడ్ యాక్సిస్ రోడ్డు కీలక ప్రాజెక్టుగా భావిస్తున్నారు. ఈ రహదారి పూర్తయిన తర్వాత రాజధాని ప్రాంతానికి మెరుగైన అనుసంధానం ఏర్పడి, రవాణా సౌకర్యాలు మరింత బలోపేతం అవుతాయని ప్రభుత్వం ఆశాభావం వ్యక్తం చేస్తోంది.