దక్షిణ మధ్య రైల్వే పరిధిలో క్రీడా ప్రతిభ కలిగిన అభ్యర్థులకు శుభవార్త. రైల్వే రిక్రూట్మెంట్‌ సెల్‌ (RRC), సికింద్రాబాద్‌ 2025–26 సంవత్సరానికి సంబంధించి స్పోర్ట్స్‌ కోటా కింద ఉద్యోగాల భర్తీకి నోటిఫికేషన్ విడుదల చేసింది. వివిధ డివిజన్లలో మొత్తం 61 ఖాళీలను భర్తీ చేయనున్నారు. ఈ నోటిఫికేషన్ కింద హెడ్‌క్వార్టర్స్‌ స్థాయిలో 21 పోస్టులు, లెవెల్‌–1 కేటగిరీలో 10 పోస్టులు, అలాగే సికింద్రాబాద్‌, హైదరాబాద్‌, విజయవాడ, గుంటూరు, గుంతకల్‌, నాందేడ్‌ డివిజన్లలో చెరో 5 పోస్టులు ఉన్నాయి. ఆసక్తిగల అభ్యర్థులు 2025 నవంబర్‌ 24వ తేదీలోపు ఆన్లైన్ ద్వారా దరఖాస్తు చేసుకోవచ్చు.
ఈ ఉద్యోగాలకు దరఖాస్తు చేసుకునే వారు కనీసం పదో తరగతి లేదా ఐటీఐ లేదా ఇంటర్మీడియట్‌ విద్యార్హత కలిగి ఉండాలి. అలాగే అభ్యర్థులు క్రీడా రంగంలో తమ ప్రతిభను నిరూపించి ఉండాలి. అథ్లెటిక్స్‌, బ్యాడ్మింటన్‌, బాక్సింగ్‌, క్రికెట్, సైక్లింగ్‌, జిమ్నాస్టిక్స్‌, ఖోఖో, పవర్‌ లిఫ్టింగ్‌, వాలీబాల్‌, వెయిట్‌ లిఫ్టింగ్‌, హాకీ వంటి క్రీడల్లో రాష్ట్ర, జాతీయ లేదా విశ్వవిద్యాలయ స్థాయిలో పాల్గొన్న వారే అర్హులు. ఇది క్రీడాకారులకు ప్రభుత్వ రంగంలో మంచి అవకాశంగా మారింది.
వయస్సు పరిమితి విషయానికి వస్తే — అభ్యర్థులు 2025 జూలై 1 నాటికి 18 నుంచి 25 సంవత్సరాల మధ్య వయస్సు కలిగి ఉండాలి. అంటే 2000 జూలై 2 నుండి 2007 జూలై 1 మధ్య జన్మించినవారే అర్హులు. దరఖాస్తు ప్రక్రియ పూర్తిగా ఆన్లైన్ విధానంలో జరగనుంది. జనరల్‌ కేటగిరీ అభ్యర్థులు ₹500, ఎస్సీ/ఎస్టీ/ఓబీసీ/మైనారిటీ మరియు దివ్యాంగ అభ్యర్థులు ₹250 రుసుము చెల్లించాలి. ఈ మొత్తం డెబిట్‌ కార్డు, క్రెడిట్‌ కార్డు లేదా నెట్‌ బ్యాంకింగ్‌ ద్వారా చెల్లించవచ్చు.
ఎంపిక ప్రక్రియలో ఎలాంటి రాతపరీక్ష ఉండదు. అభ్యర్థుల క్రీడా ప్రదర్శన, స్పోర్ట్స్‌ ట్రయల్స్‌, ధ్రువపత్రాల పరిశీలన ఆధారంగా తుది ఎంపిక జరగనుంది. ఎంపికైన వారికి రైల్వేలో శాశ్వత ఉద్యోగం లభించనుంది. క్రీడాకారులు తమ ప్రతిభతో ప్రభుత్వ ఉద్యోగంలో చేరేందుకు ఇది బంగారు అవకాశం. అభ్యర్థులు దరఖాస్తు చేసుకునే ముందు అధికారిక నోటిఫికేషన్‌ను పూర్తిగా చదివి అర్హతలను నిర్ధారించుకోవాలని అధికారులు సూచించారు. వివరాలు దక్షిణ మధ్య రైల్వే అధికారిక వెబ్‌సైట్‌లో లభ్యమవుతాయి.
