Vietnam: భారత్లో హిల్ స్టేషన్ ట్రిప్ కంటే వియత్నాం హాలిడే చౌకా? సోషల్ మీడియాలో వైరల్ అయిన పోస్ట్!

దేశీయ పర్యాటక ఖర్చులపై కొత్త చర్చ.. ధరలు, సౌకర్యాలపై దృష్టి పెట్టాలని సూచనలు..

దేశీయ పర్యాటకం ఖరీదవుతోందా?.. విదేశీ ప్రయాణాలతో పోలికపై కొత్త చర్చ..

న్యూఢిల్లీ: భారతదేశంలోనే విహారయాత్రకు వెళ్లడం కంటే విదేశీ పర్యటన చౌకగా మారుతోందా? అనే చర్చ సోషల్ మీడియాలో మొదలైంది. భారత్లోని ప్రముఖ హిల్ స్టేషన్లకు వెళ్లే ఖర్చుతో పోలిస్తే వియత్నాం పర్యటన తక్కువ ఖర్చుతో పూర్తయిందంటూ ఓ సోషల్ మీడియా పోస్ట్ వైరల్ అవుతోంది.

ఎక్స్ (X)లో పంకజ్ అరోరా అనే యూజర్ షేర్ చేసిన ఈ పోస్టులో, దేశీయ పర్యాటక రంగంలో పెరుగుతున్న ఖర్చులపై తన అనుభవాన్ని పంచుకున్నారు. తన సహోద్యోగి నాలుగు రోజుల హిల్ స్టేషన్ ట్రిప్ ప్లాన్ చేయగా, భారత్లోని ప్రముఖ పర్యాటక ప్రాంతాల్లో ఖర్చులు ఊహించిన దానికంటే ఎక్కువగా ఉన్నాయని తెలిపారు.

ఆ పోస్టు ప్రకారం, ప్రముఖ భారతీయ హిల్ స్టేషన్లలో సాధారణ స్థాయి హోటల్ గదుల ధరలు ఒక్క రాత్రికి రూ.10 వేల నుంచి రూ.18 వేల వరకు ఉన్నాయని పేర్కొన్నారు. స్థానిక ప్రయాణాలకు టాక్సీ ఖర్చులు రోజుకు రూ.3 వేల నుంచి రూ.5 వేల వరకు ఉండగా, ఇద్దరి రిటర్న్ ఫ్లైట్ టికెట్లకు దాదాపు రూ.15 వేల నుంచి రూ.20 వేల వరకు ఖర్చు అవుతుందని వివరించారు. దీంతో నాలుగు రోజుల ట్రిప్ మొత్తం బడ్జెట్ సుమారు రూ.60 వేల నుంచి రూ.80 వేల వరకు చేరుతోందని తెలిపారు.

అదే సమయంలో వియత్నాం పర్యటనను పరిశీలించగా, ఆఫర్ల సమయంలో విమాన టికెట్లు బుక్ చేసుకోవడంతో తక్కువ ధరకు ప్రయాణం సాధ్యమైందని చెప్పారు. పర్యాటక ప్రాంతాలకు సమీపంలో మంచి హోటళ్లు రాత్రికి రూ.3 వేల నుంచి రూ.5 వేలకే లభించాయని, అక్కడ ప్రజా రవాణా సౌకర్యవంతంగా ఉండటం, ఆహారం తక్కువ ఖర్చుతో లభించడం, పర్యాటకులకు అనుకూలమైన వాతావరణం ఉండటం ఆకట్టుకున్నాయని పేర్కొన్నారు.

చివరకు భారత్లోని హిల్ ట్రిప్ కంటే వియత్నాం అంతర్జాతీయ పర్యటనకే తక్కువ ఖర్చు అయ్యిందని ఆ పోస్ట్లో తెలిపారు. ఈ పోస్ట్పై పలువురు నెటిజన్లు స్పందించారు. దేశీయ పర్యాటక ప్రాంతాల్లో ధరలు గత కొన్నేళ్లలో గణనీయంగా పెరిగాయని చాలామంది అభిప్రాయపడ్డారు. ముఖ్యంగా కరోనా తర్వాత దేశీయ పర్యాటక ప్రాంతాలకు డిమాండ్ భారీగా పెరగడంతో హోటళ్లు, ప్రయాణ ఖర్చులు పెరిగాయని కొందరు పేర్కొన్నారు.

ఒక యూజర్ స్పందిస్తూ, “కరోనా ముందు, తర్వాత పరిస్థితుల్లో చాలా మార్పు వచ్చింది. గతంలో భారతీయ పర్యాటక ప్రాంతాలు మరింత చౌకగా ఉండేవి” అని తెలిపారు. మరో యూజర్ “హోటల్ ధరలు, విమాన ఛార్జీలు అందుబాటులో ఉండేలా మారితే భారత పర్యాటకం మరింత అభివృద్ధి చెందుతుంది” అని అభిప్రాయపడ్డారు.

మరికొందరు దేశీయ పర్యాటకానికి ఉన్న అవకాశాలను గుర్తు చేస్తూ, భారత్లో అద్భుతమైన ప్రదేశాలు ఉన్నప్పటికీ, పర్యాటకుల కోసం మెరుగైన సౌకర్యాలు, శుభ్రత, సరైన ధరలు, మంచి అనుభవం కూడా అంతే ముఖ్యమని పేర్కొన్నారు.

ఈ చర్చ మరోసారి భారత పర్యాటక రంగం ఎదుర్కొంటున్న సవాళ్లను తెరపైకి తీసుకొచ్చింది. ప్రకృతి అందాలు మాత్రమే కాకుండా, ప్రయాణ ఖర్చులు మరియు పర్యాటక అనుభవం కూడా ప్రజల నిర్ణయాలను ప్రభావితం చేస్తున్నాయని నిపుణులు భావిస్తున్నారు.