Thailand: పర్యాటకులకు థాయ్లాండ్ గుడ్న్యూస్.. విదేశీ పర్యాటకులకు QR చెల్లింపుల సౌకర్యం!
Thailand: థాయ్లాండ్కు వెళ్లే విదేశీ పర్యాటకులకు మరింత సౌకర్యవంతమైన ప్రయాణ అనుభవాన్ని అందించేందుకు ఆ దేశ ప్రభుత్వం కొత్త డిజిటల్ చెల్లింపు విధానాన్ని తీసుకొచ్చింది. పర్యాటక శాఖ ఆధ్వర్యంలో "పే లైక్ ఎ లోకల్ (Pay Like a Local)" పేరుతో క్రాస్-బోర్డర్ క్యూ ఆర్ (QR) పేమెంట్ సేవలను ప్రారంభించింది.
'పే లైక్ ఎ లోకల్'.. థాయ్లాండ్లో కొత్త డిజిటల్ పేమెంట్ సేవలు ప్రారంభం..
సొంత దేశం బ్యాంకింగ్ యాప్తోనే థాయ్లాండ్లో చెల్లింపులు..
థాయ్లాండ్కు వెళ్లే విదేశీ పర్యాటకులకు మరింత సౌకర్యవంతమైన ప్రయాణ అనుభవాన్ని అందించేందుకు ఆ దేశ ప్రభుత్వం కొత్త డిజిటల్ చెల్లింపు విధానాన్ని తీసుకొచ్చింది. పర్యాటక శాఖ ఆధ్వర్యంలో "పే లైక్ ఎ లోకల్ (Pay Like a Local)" పేరుతో క్రాస్-బోర్డర్ క్యూ ఆర్ (QR) పేమెంట్ సేవలను ప్రారంభించింది. ఈ కొత్త విధానం ద్వారా ఎంపిక చేసిన దేశాల నుంచి వచ్చే ప్రయాణికులు తమ దేశంలో ఉపయోగించే మొబైల్ బ్యాంకింగ్ యాప్లు లేదా ఈ-వాలెట్లతోనే థాయ్లాండ్లో చెల్లింపులు చేయవచ్చు.
ఈ విధానంలో పర్యాటకులు నగదు తీసుకెళ్లాల్సిన అవసరం ఉండదు. అలాగే ఏటీఎంల కోసం వెతకడం లేదా కరెన్సీ మార్పిడి చేయాల్సిన ఇబ్బందులు కూడా తగ్గుతాయి. షాపింగ్ చేసినా, రెస్టారెంట్లో భోజనం చేసినా, టాక్సీలో ప్రయాణించినా లేదా పర్యాటక ప్రాంతాల్లో కొనుగోళ్లు చేసినా.. వ్యాపారి చూపించే క్యూ ఆర్ కోడ్ను స్కాన్ చేసి, తమ మొబైల్ బ్యాంకింగ్ యాప్లో మొత్తం నిర్ధారించి చెల్లింపు పూర్తి చేయవచ్చు. ఈ మొత్తం ప్రక్రియ కొన్ని సెకన్లలోనే పూర్తవుతుంది.
ఇటీవలి కాలంలో ముఖ్యంగా ఆసియా దేశాల ప్రయాణికులు నగదు కంటే డిజిటల్ చెల్లింపులకే ఎక్కువ ప్రాధాన్యం ఇస్తున్నారని థాయ్లాండ్ పర్యాటక సంస్థ తెలిపింది. అదే సౌకర్యాన్ని థాయ్లాండ్లో కూడా అందించాలనే ఉద్దేశంతో ఈ కార్యక్రమాన్ని ప్రారంభించినట్లు వెల్లడించింది. దీనివల్ల పర్యాటక రంగం ఆధునికీకరణతో పాటు స్థానిక వ్యాపారులకు కూడా కొత్త అవకాశాలు లభిస్తాయని అధికారులు భావిస్తున్నారు.
ఈ డిజిటల్ చెల్లింపు విధానాన్ని పర్యాటక ప్రాంతాలు, హోటళ్లు, రెస్టారెంట్లు, షాపింగ్ మాల్స్, సావనీర్ దుకాణాలు, చిన్న వ్యాపార సంస్థలు కూడా అమలు చేసేలా థాయ్లాండ్ ప్రభుత్వం ప్రోత్సహిస్తోంది. దీంతో విదేశీ పర్యాటకులకు సేవలు అందించడం మరింత సులభం కానుంది.
ప్రస్తుతం చైనా, సింగపూర్, మలేషియా, ఇండోనేషియా, వియత్నాం, దక్షిణ కొరియా, లావోస్, కంబోడియా, హాంకాంగ్ దేశాల నుంచి వచ్చే ప్రయాణికులు ఈ క్రాస్-బోర్డర్ క్యూ ఆర్ పేమెంట్ సేవలను ఉపయోగించుకోవచ్చు. భవిష్యత్తులో మరిన్ని దేశాలను కూడా ఈ జాబితాలో చేర్చనున్నట్లు థాయ్లాండ్ ప్రకటించింది.
ఈ ప్రాజెక్టును బ్యాంక్ ఆఫ్ థాయ్లాండ్ ఎనిమిది ప్రధాన బ్యాంకులతో కలిసి అమలు చేస్తోంది. అలాగే నేషనల్ ఐటీఎంఎక్స్ (National ITMX), అలీపే (Alipay), వీచాట్ పే (WeChat Pay), యూనియన్పే (UnionPay) వంటి అంతర్జాతీయ డిజిటల్ చెల్లింపు సంస్థలు కూడా ఇందులో భాగస్వామ్యంగా ఉన్నాయి. వీటి సహకారంతో చెల్లింపులు వేగంగా, సురక్షితంగా జరిగేలా ఏర్పాట్లు చేశారు.
ప్రపంచంలో అత్యంత ప్రజాదరణ పొందిన పర్యాటక దేశాల్లో ఒకటైన థాయ్లాండ్.. అందమైన బీచ్లు, ఆలయాలు, రుచికరమైన ఆహారం, నైట్లైఫ్తో ఇప్పటికే పర్యాటకులను ఆకర్షిస్తోంది. ఇప్పుడు నగదు అవసరం లేకుండా సులభంగా డిజిటల్ చెల్లింపులు చేసే సౌకర్యాన్ని అందుబాటులోకి తీసుకురావడంతో పర్యాటకులకు మరింత అనుకూలమైన గమ్యస్థానంగా మారుతోంది.
Be the first to react
