3 గంటల ప్రయాణం జస్ట్ 21 నిమిషాల్లోనే.. ఔటర్ రింగ్ రోడ్డుపై డ్రీమ్ రైడ్!
Karnataka ORR: బెంగళూరు ఔటర్ రింగ్ రోడ్డు (ORR) పరిధిలోని ఐటీ కంపెనీల్లో 6 లక్షల మంది ఉద్యోగులు ఉండటం, గంటకు 50 వేల వాహనాలు తిరుగుతుండటంతో ట్రాఫిక్ సమస్య తీవ్రమైంది. దీని పరిష్కారానికి కంపెనీలు 5 కిలోమీటర్ల చొప్పున రోడ్లను దత్తత తీసుకుని అభివృద్ధి చేసేందుకు ప్రభుత్వం ఒప్పందం చేసుకుంది. కాగా, దసరా వరుస సెలవుల వల్ల నగరవాసులు సొంతూళ్లకు వెళ్లడంతో సాధారణంగా 3 గంటలు పట్టే ప్రయాణం కేవలం 21 నిమిషాల్లోనే పూర్తయిందని టెకీలు ఆనందం వ్యక్తం చేస్తూ పెట్టిన పోస్టులు వైరల్ అయ్యాయి.
కిలోమీటరు దూరానికి ఏకంగా 10 నిమిషాల సమయం.. నగర రద్దీపై పలు సర్వేల షాకింగ్ నిజాలు!
సర్జాపుర, బెళ్లందూరు, మారతహళ్లి రోడ్ల దత్తతకు ఐటీ కంపెనీలు రెడీ.. బీడీఏ కార్యాచరణ సిద్ధం!
ప్రతి 5 కిలోమీటర్లను అభివృద్ధి చేయనున్న సంస్థలు.. సమగ్ర ప్రణాళికతో ట్రాఫిక్ నియంత్రణ లక్ష్యం!
Bengaluru: కర్ణాటక రాజధాని బెంగళూరు ప్రపంచవ్యాప్తంగా ప్రసిద్ధి చెందిన బహుళజాతి ఐటీ, బీటీ సంస్థలకు ప్రధాన కేంద్రంగా మారింది. ఏటా వేలాది మంది విద్యావంతులను ఉద్యోగాల్లోకి చేర్చుకుంటూ ఈ సంస్థలు తమ కార్యకలాపాలను విస్తరిస్తున్నాయి. అయితే, ఉద్యోగుల సంఖ్య పెరగడంతో పాటు కొన్ని ప్రధాన ప్రాంతాల్లో, ముఖ్యంగా 60 కిలోమీటర్ల నిడివి కలిగిన ఔటర్ రింగ్ రోడ్డు (ORR) పరిధిలో వాహన రద్దీ తీవ్రరూపం దాల్చింది. ఈ మార్గంలో ఉన్న టెక్ పార్కులలో దాదాపు 6 లక్షల మందికి పైగా ఉద్యోగులు మూడు షిఫ్టుల్లో విధులు నిర్వహిస్తుండటంతో రోడ్లన్నీ రద్దీగా మారుతున్నాయి.
గంటకు 50 వేల వాహనాలు – మెట్రో పనుల ఎఫెక్ట్
ట్రాఫిక్ పోలీసుల అంచనాల ప్రకారం.. పీక్ అవర్స్‌లో ఔటర్ రింగ్ రోడ్డుపై గంటకు దాదాపు 50,000 పైగా వాహనాలు రాకపోకలు సాగిస్తున్నాయి. కేవలం హెబ్బాళ రింగ్ రోడ్డు కూడలి వద్దే గంటకు 20,000 వాహనాలు కదులుతున్నట్లు గుర్తించారు. వీటికి తోడు మార్గమధ్యంలో జరుగుతున్న మెట్రో రైలు నిర్మాణ పనుల కారణంగా రోడ్లు కుంచించుకుపోయి, ఒక్క కిలోమీటరు దూరం ప్రయాణించడానికి ఏకంగా 10 నిమిషాలకు పైగా సమయం పడుతోందని పలు నివేదికలు స్పష్టం చేశాయి.
రోడ్ల దత్తత – బీడీఏ మరియు కంపెనీల కార్యాచరణ
ఈ ట్రాఫిక్ సమస్యను అధిగమించేందుకు కర్ణాటక రాష్ట్ర ప్రభుత్వం మరియు ఔటర్ రింగ్ రోడ్డు కంపెనీల అసోసియేషన్ ఉమ్మడి కార్యాచరణ పథకాన్ని రూపొందించాయి. ఇందులో భాగంగా అత్యంత రద్దీ ప్రాంతాలైన సర్జాపుర, బెళ్లందూరు, మారతహళ్లి, దొడ్డబేగూరు తదితర ప్రాంతాల్లోని ప్రతి 5 కిలోమీటర్ల మేర రోడ్లను ఆయా ఐటీ సంస్థలు దత్తత తీసుకుని అభివృద్ధి చేసేందుకు ముందుకొచ్చినట్లు బెంగళూరు డెవలప్‌మెంట్ అథారిటీ (BDA) వెల్లడించింది. దీని ద్వారా ట్రాఫిక్ రద్దీని అదుపులోకి తేవచ్చని అధికారులు భావిస్తున్నారు.
దసరా పండుగ వేళ టెకీల ‘డ్రీమ్ రైడ్’
దసరా పండుగ సందర్భంగా వరుస సెలవులు రావడంతో నగరవాసులు, సాఫ్ట్‌వేర్ ఉద్యోగులు పెద్ద సంఖ్యలో తమ సొంతూళ్లకు తరలివెళ్లారు. దీంతో గత శుక్రవారం నుంచి బుధవారం వరకు బెంగళూరు వీధులు, ప్రధాన కారిడార్లు పూర్తిగా నిర్మానుష్యంగా మారాయి. నిత్యం వాహనాలతో కిటకిటలాడే రహదారులు పూర్తిగా ఖాళీ అవ్వడంతో నగరంలో మిగిలిన టెక్కీలకు ప్రయాణం ఒక కలలా అనిపించింది.
3 గంటల ప్రయాణం 21 నిమిషాల్లోనే!
సాధారణ రోజుల్లో తన ఇంటి నుంచి కార్యాలయానికి ఉన్న 13 కిలోమీటర్ల దూరాన్ని చేరుకోవడానికి 2 నుంచి 3 గంటల సమయం పట్టేదని, అయితే దసరా సెలవుల్లో గూగుల్ మ్యాప్స్ కేవలం 21 నిమిషాలు మాత్రమే చూపడంతో ఒక టెకీ ఆశ్చర్యానికి గురయ్యాడు. మరొక ఉద్యోగి 2 గంటల ప్రయాణం కేవలం 35 నిమిషాల్లో పూర్తయిందని సోషల్ మీడియాలో పంచుకున్నాడు.
నెట్టింట వైరల్ అయిన సరదా పోస్టులు
ఈ ట్రాఫిక్ లేని ప్రయాణాన్ని ఆస్వాదిస్తూ టెక్కీలు సోషల్ మీడియాలో పెట్టిన పోస్టులు విపరీతంగా వైరల్ అయ్యాయి. "ఊళ్ల నుంచి మీరు వెనక్కి రాకపోవడంతో ప్రయాణ సమయం చాలా తగ్గిపోయింది. దయచేసి త్వరగా వచ్చేసి రోడ్లను మళ్లీ ఎప్పటిలాగే రద్దీగా మార్చండి" అంటూ ఒక టెకీ వ్యంగ్యంగా రాసుకొచ్చాడు. "మీరు ఇంకా ఎక్కువ సెలవులు తీసుకుంటే బాగుంటుంది, లేదా ఇంటి నుంచే వర్క్ ఫ్రమ్ హోమ్ (WFH) చేయండి.. అప్పుడే మాకు ఈ ప్రశాంతమైన రోడ్లు దక్కుతాయి" అంటూ నెటిజన్లు సరదా కామెంట్లు చేశారు.
Tags
Be the first to react
