Middle East Conflict: ఇది చెడు వార్త.. ఇరాన్ మా షరతులకు అంగీకరించలేదు..జేడీ వెన్స్ కీలక ప్రకటన..!

Middle East Conflict: మధ్యప్రాచ్యంలో గత ఆరు వారాలుగా జరుగుతున్న యుద్ధానికి ముగింపు పలకాలని పాకిస్థాన్ వేదికగా జరిగిన కీలక చర్చలు ఎటువంటి ఫలితం లేకుండానే ముగిశాయి. అమెరికా ఉపాధ్యక్షుడు జేడీ వెన్స్ నేతృత్వంలోని బృందం, ఇరాన్ ప్రతినిధులతో దాదాపు 21 గంటల పాటు మారథాన్ చర్చలు జరిపినప్పటికీ, ఇరు దేశాల మధ్య ఏకాభిప్రాయం కుదరలేదు. ఆదివారం ఉదయం ఇస్లామాబాద్‌లో విలేకరులతో మాట్లాడిన జేడీ వెన్స్, ఈ వార్తను స్వయంగా ధృవీకరిస్తూ ఇది ఒక "చెడు వార్త" అని అభివర్ణించారు.

అమెరికా తరపున జేడీ వెన్స్‌తో పాటు జేర్డ్ కుష్నర్, స్టీవ్ విట్కాఫ్ చర్చల్లో పాల్గొనగా, ఇరాన్ తరపున పార్లమెంట్ స్పీకర్ మహమ్మద్ బాకర్ గాలిబాఫ్ బృందం హాజరయ్యారు. శనివారం రోజున ఇరు దేశాలకు చెందిన సాంకేతిక నిపుణులు కూడా ఈ చర్చల్లో చేరారు. ప్రధానంగా స్ట్రెయిట్ ఆఫ్ హోర్ముజ్ (హోర్ముజ్ జలసంధి) ద్వారా నౌకల రాకపోకలు, కాల్పుల విరమణ పొడిగింపు,  ఇరాన్‌పై ఉన్న ఆంక్షలను దశలవారీగా ఎత్తివేయడం వంటి అంశాలపై సుదీర్ఘంగా చర్చలు జరిగాయి.

అయితే, అమెరికా విధించిన కఠినమైన షరతులకు ఇరాన్ అంగీకరించకపోవడమే ఈ విఫలానికి ప్రధాన కారణమని తెలుస్తోంది. "మేము దేనికి అంగీకరిస్తామో, దేనికి అంగీకరించబోమో చాలా స్పష్టంగా చెప్పాము. మా 'రెడ్ లైన్స్'  గురించి వారికి ముందే వివరించాము. కానీ వారు మా ప్రతిపాదనలను ఒప్పుకోలేదు," అని వెన్స్ పేర్కొన్నారు. దీనివల్ల గత వారం కుదిరిన రెండు వారాల తాత్కాలిక కాల్పుల విరమణకు ఇప్పుడు ముప్పు ఏర్పడే అవకాశం ఉంది.

ఈ చర్చల్లో ఇరాన్ అనుకూల మిలిటెంట్ గ్రూపుల మద్దతు, వారి అణు కార్యక్రమాలు  క్షిపణి ప్రయోగాల వంటి కీలక అంశాలపై ఎటువంటి పురోగతి లభించలేదు. మరోవైపు, లెబనాన్‌లో ఇజ్రాయెల్-హిజ్బుల్లా మధ్య జరుగుతున్న పోరాటం కూడా ఈ శాంతి చర్చలపై ప్రతికూల ప్రభావం చూపింది. హోర్ముజ్ జలసంధిలో సరుకు రవాణా నౌకలు, ముఖ్యంగా చమురు ట్యాంకర్లు స్వేచ్ఛగా తిరగలేకపోవడం అంతర్జాతీయంగా ఆందోళన కలిగిస్తోంది.

ప్రస్తుతానికి చర్చలు నిలిచిపోవడంతో అమెరికా ప్రతినిధుల బృందం తిరిగి వాషింగ్టన్‌కు బయలుదేరింది. ఈ వైఫల్యం వల్ల మధ్యప్రాచ్యంలో యుద్ధ మేఘాలు మళ్ళీ కమ్ముకుంటున్నాయి. ప్రపంచ దేశాలన్నీ ఇప్పుడు అగ్రరాజ్యం అమెరికా తీసుకోబోయే తదుపరి నిర్ణయాల వైపు ఆసక్తిగా చూస్తున్నాయి. శాంతి ఒప్పందం కుదురుతుందని ఆశించిన అంతర్జాతీయ సమాజానికి ఈ చర్చల విఫలం పెద్ద నిరాశనే మిగిల్చింది.