Prajavedhika: అధికారుల కుమ్మక్కుతో కోర్టు ఆర్డర్‌కే షాక్... కలెక్టర్ ఆర్డర్‌ను సైతం బుట్టదాఖలు చేసిన తహసీల్దార్! సొంత తోడబుట్టినవాడే శత్రువుగా మారితే?

• ప్రభుత్వ వాగు కనుమరుగు - పొలానికి దారి బంద్.. ధర్మవరంలో రైతుపై పగబట్టిన పొరుగు పొలం యజమానులు!
• కలెక్టర్ ఆర్డర్‌ను సైతం బుట్టదాఖలు చేసిన తహసీల్దార్.. మాచర్ల భూ కేటాయింపుల్లో బయటపడ్డ రహస్యం!
• 41.58 ఎకరాల భూమి మాయం.. వైఎస్సార్‌సీపీ నేతల అండతో గుంతకల్లులో నడిచిన పెద్ద స్కెచ్!

Prajavedhika: అనంతపురం జిల్లా గార్లదిన్నెకు చెందిన సుంకన్న, గుంతకల్లు మండలం కదిరిపల్లిలోని తమ కుటుంబానికి చెందిన 41.58 ఎకరాల భూమి వివాదంపై వినతిపత్రం సమర్పించారు. 2020లో ఆర్డీవో కోర్టు నుంచి అనుకూల తీర్పు వచ్చినా ఆన్‌లైన్‌లో పేరు ఎక్కించలేదని, నాటి తహసీల్దార్ వైఎస్సార్‌సీపీ నేతల ఒత్తిళ్లకు తలొగ్గి భూమిని ఆక్రమించిన శంకరయ్య, లక్ష్మన్న తదితరుల పేర్లపై రికార్డులు మార్చారని ఆరోపిస్తూ న్యాయం చేయాలని కోరారు.

సత్యసాయి జిల్లా ధర్మవరం మండలం గుట్ట క్రింద పల్లికి చెందిన ఏజ్జె రమేష్, తమ సర్వే నంబరు 501-4లోని 3.86 ఎకరాల పొలానికి వెళ్లకుండా పక్క పొలం యజమానులు అడ్డుపడుతున్నారని ఫిర్యాదు చేశారు. పొలానికి ఆనుకుని ఉన్న సర్వే నంబరు 502లోని ప్రభుత్వ "వాగు" భూమిని అక్రమంగా ఆక్రమించుకుని, తమ పొలానికి వెళ్లే దారిని పూర్తిగా మూసివేశారని, వరి నాట్లు వేసుకోకుండా వ్యవసాయానికి విఘాతం కలిగిస్తున్నారని ఆవేదన వ్యక్తం చేశారు.

పల్నాడు జిల్లా నకరికల్లు మండలానికి చెందిన వి. సంపూర్ణ బాయి, పుట్టింటి నుంచి తనకు వచ్చిన భూమిని తన ప్రమేయం లేకుండా తమ్ముడు బావత్ గోవింద్ నాయక్ వేరే వ్యక్తికి అమ్మేసి ఆన్‌లైన్ చేసేందుకు యత్నిస్తున్నాడని ఫిర్యాదు చేశారు. ఆస్తి కోసం తమ్ముడే శత్రువుగా మారి, బయటి వ్యక్తులను తెచ్చి గొడవలు చేస్తూ భయభ్రాంతులకు గురిచేస్తున్నాడని, కలెక్టర్‌కు విన్నవించినా ఫలితం లేకపోయిందని వాపోయారు.

అనకాపల్లి జిల్లా చోడవరం మండలానికి చెందిన వెంకటఅప్పారావు, తనకు వారసత్వంగా వచ్చిన 2.75 ఎకరాల భూమిలో 100 సెంట్లను కొందరు వ్యక్తులు తహసీల్దార్ కార్యాలయ సిబ్బందితో కుమ్మక్కై అక్రమంగా ఆన్‌లైన్ చేయించుకున్నారని ఆరోపించారు. అలాగే వెంకన్నపాలెం పరిధిలోని 3.60 ఎకరాల ఉమ్మడి భూమిని సమాచారం ఇవ్వకుండా ఇతరులకు తాకట్టు పెట్టి అమ్మేశారని, ప్రశ్నిస్తే భౌతిక దాడులకు తెగబడుతున్నారని తెలిపారు.

అనంతపురం జిల్లా గార్లదిన్నె మండలానికి చెందిన దంపెట్ల మునిరెడ్డి, తన తండ్రి సంపాదించిన విస్తారమైన ఆస్తుల్లో (సర్వే నంబర్లు 622, 583, 635, 699 తదితర భూములు) మొదటి భార్య కుమారులకే ప్రాధాన్యత ఇచ్చి, తనకు చట్టబద్ధంగా రావలసిన వాటా రాకుండా అడ్డుపడుతున్నారని, తనకు న్యాయంగా రావాల్సిన ఆస్తి వాటాను ఇప్పించాలని కోరారు.

నంద్యాల జిల్లా ఆలమూరుకు చెందిన కె. రామచంద్రుడు, తమ 4 సెంట్ల స్థలంలో ఇల్లు నిర్మించుకుంటుంటే పక్కనే ఉన్న గుడి విస్తరణ నెపంతో చేపాటి నారాయణ అనే వ్యక్తి నిర్మాణాన్ని అడ్డుకుంటున్నాడని తెలిపారు. అలాగే పల్నాడు జిల్లా మాచర్లకు చెందిన కేతావత్ గుండు రామ్‌నాయక్, నాగార్జునసాగర్ ప్రాజెక్టు నిర్మాణం కోసం 38 ఎకరాలు కోల్పోయామని, మాజీ కలెక్టర్ ఆదేశించినా తహసీల్దార్ ప్రత్యామ్నాయ భూమి కేటాయించలేదని వాపోయారు.

వీటితో పాటు రాష్ట్ర వ్యాప్తంగా పలువురు అర్జీదారులు పింఛన్లు, రేషన్ కార్డులు, ఇళ్ల నిర్మాణ సమస్యలపై అర్జీలు అందజేశారు. కొందరు నిరుద్యోగ యువకులు ఉద్యోగాల కోసం రెజ్యూమేలు అందజేయగా, అనారోగ్యంతో బాధపడుతున్న మరికొందరు వైద్య ఖర్చుల కోసం ఆర్థిక సహాయం అందించాలని నేతలను కోరారు. బాధితుల దరఖాస్తులను పరిశీలించిన నేతలు వెంటనే పరిష్కరించాలని అధికారులను ఆదేశించారు.