Pawan Kalyan: నల్లమలలో పులుల కోసం పవన్ కల్యాణ్ బిగ్ ప్లాన్.. మరో 4 పులుల రాకకు కేంద్రం ఓకే!

• తూర్పు కనుమల్లోకి మహారాష్ట్ర, మధ్యప్రదేశ్ నుంచి నాలుగు ఆడ పులులు..
  
  
• Politics: పులుల సంరక్షణలో ఏపీని ఆదర్శంగా నిలుపుతామన్న డిప్యూటీ సీఎం..

Pawan Kalyan: అంతర్జాతీయ పులుల దినోత్సవం (International Tiger Day) సందర్భంగా ఆంధ్రప్రదేశ్ ఉప ముఖ్యమంత్రి, అటవీ మరియు పర్యావరణ శాఖ మంత్రి పవన్ కల్యాణ్ అత్యంత కీలక ప్రకటనలు చేశారు. నల్లమల అడవుల్లో (Nallamala Forests) పులి గాండ్రింపులను శాశ్వతం చేయడమే ఏపీ కూటమి ప్రభుత్వ ప్రధాన లక్ష్యమని ఆయన స్పష్టం చేశారు. జీవ వైవిధ్య పరిరక్షణతో పాటు పులుల సంరక్షణలో ఆంధ్రప్రదేశ్‌ను దేశంలోనే సరికొత్త ఆదర్శ రాష్ట్రంగా తీర్చిదిద్దేందుకు చారిత్రక అడుగులు వేస్తున్నట్లు వెల్లడించారు.

అంతర్జాతీయ పులుల దినోత్సవాన్ని పురస్కరించుకుని బుధవారం విడుదల చేసిన ప్రకటనలో డిప్యూటీ సీఎం స్పందిస్తూ.. "పులులను కాపాడుకోవడం అంటే కేవలం ఒక జంతువును కాపాడటం కాదు, మన అడవులను, జలవనరులను మరియు భావితరాల పర్యావరణ వారసత్వాన్ని కాపాడుకోవడమే" అని పేర్కొన్నారు. తూర్పు కనుమల్లో (Eastern Ghats) పులుల సంఖ్యతో పాటు జన్యు వైవిధ్యాన్ని (Genetic Diversity) గణనీయంగా పెంచేందుకు మహారాష్ట్ర, మధ్యప్రదేశ్ రాష్ట్రాల నుంచి నాలుగు ఆడ పులులను ఆంధ్రప్రదేశ్‌కు తరలించేందుకు కేంద్ర ప్రభుత్వం సూత్రప్రాయ అంగీకారం తెలిపిందని పవన్ కల్యాణ్ సంతోషం వ్యక్తం చేశారు. ఈ ప్రతిపాదనకు ఆమోదం తెలిపిన కేంద్ర పర్యావరణ, అటవీ శాఖ మంత్రి భూపేందర్ యాదవ్‌కు ఆయన హృదయపూర్వక ధన్యవాదాలు తెలిపారు.

అటవీ సంరక్షణ చర్యలలో భాగంగా దేశంలోనే అతిపెద్ద టైగర్ రిజర్వ్‌గా పేరుగాంచిన నాగార్జునసాగర్-శ్రీశైలం టైగర్ రిజర్వ్ (NSTR) పరిధిలో వేట నిరోధక శిబిరాలను (Anti-Poaching Camps) 89 నుంచి 150కి పెంచుతున్నట్లు ఉప ముఖ్యమంత్రి ప్రకటించారు. దీనివల్ల అడవుల్లో నిఘా వ్యవస్థ పటిష్ఠమవ్వడమే కాకుండా, స్థానిక గిరిజన ప్రాంతాలకు చెందిన దాదాపు 800 మంది యువతకు నూతన ఉపాధి అవకాశాలు లభిస్తాయని వివరించారు. ప్రస్తుతం రాష్ట్రంలోని NSTR మరియు శేషాచలం అటవీ ప్రాంతాల్లో 68 పులులు, 11 పులి పిల్లలు ఉన్నాయని, ఇది ప్రభుత్వం తీసుకుంటున్న క్రమబద్ధమైన సంరక్షణ చర్యలకు ప్రత్యక్ష నిదర్శనమని అన్నారు.

నూతన కూటమి ప్రభుత్వం అధికారంలోకి వచ్చాక సాంకేతికతకు ప్రాధాన్యమిస్తూ డ్రోన్లు, కెమెరా ట్రాప్‌ల ద్వారా అటవీ నిఘాను వేగవంతం చేశామని పవన్ కల్యాణ్ తెలిపారు. నల్లమలలో అంతరించిపోతున్న 'గౌర్' (అడవి దున్న) జంతువుల పునఃప్రవేశంతో పాటు పాపికొండల అటవీ ప్రాంతంలోకి కొత్త ఆడ పులులను ప్రవేశపెట్టేందుకు శాస్త్రీయ ప్రణాళికలు సిద్ధం చేస్తున్నామని చెప్పారు. పర్యావరణ సమతుల్యత కోసం అహర్నిశలు శ్రమిస్తున్న అటవీ శాఖ అధికారులు, సిబ్బంది మరియు గిరిజన సమాజాలకు ఆయన అభినందనలు తెలిపారు.